السلام عليكم
اولا اهلين بيكِ في جدة نورتينا =)
وإن شاء الله مره حتنبسطي عندنا
والف مبروك على دخولك الجامعة , موفقة فيها باذن الله
وعقبال لما تدخلي الطب وربي يختارلك الخير فين ما كان
أنا كنت مثلك عزيزتي
كان طموحي اني أدخل الطب من زمان , و تساءلت كتير كيف ممكن تكون وكيف الوضع
لكن ولله الحمد كتير طمنوني وشرحولي كل شي
والحمد لله , قدرت أدخل الطب وتخصصت طب أسنان << ايش رايك بالتخصص حقنا
الحلو في طب الأسنان أنك لما تخلصي 7 سنين الدراسة تقدري تشتغلي بالبكالوريوس
وتُعتبري طبيبة خلاص وتقدري تفتحي عيادة خاصة بيكِ
مو زي البشري , لازم تكملي من بعد البكالوريوس وأقل تخصص ياخد منك 2-3 سنين
فتقريبا أكتر من 10 سنوات ولسه تعتبري مبتدئة وما كونتِ نفسك
وماشاء الله بما انه عندك هواية الرسم و مهارات يدوية
فهذا الشي جدا حيساعدك في طب الأسنان
فنسبة العمل و التطبيق العملي جدا كبير بالنسبة للبشري اللي يعتمد على النظري أكثر
على العموم عندك السنة التحضيرية تقدري تشوفي فين انتِ أكتر
و بنات من كليات الطب بكل أقسامها بيعملوا حملات تعريفية عن كل تخصص
وقتها حتتعرفي عليهم أكتر
والأهم ربي ايش حيختارك لك وموفقة في جميع أمورك
=)
وثالثا كيف دكاتـرة الطب عندكم بالنسبه للي درسوا طب واريد بعض الانفورميشن  عن الدراسه والتدريس والقاعات والاسلوب وكل ابو اي حاجه
|
دكاترة ممتازين الصراحة وتعاملهم حلو "أغلبهم"
وكتير درسوني حاصلين على اسم "بروفيسور" وليس دكتور فقط
بالنسبة للدراسة , فهي دسمة ومعلوماتها كثيرة لكن ممتعة جداااا
أهم شي تقدري تنظمي وقتك و تزاكري كويس
أهم شي تربطي المعلومات عشان مع كثرتها لا تتلخبطي
مباني الطب جدا رائعة
متطورة وفيها كل شي , والمعامل أهم شي
جميلة ومريحة
أجمل بكثير من مباني كلية الأداب اللي حتدرسي فيها
وسادسا هل تنصحوني باقتناء بعض الكتب من الآن قبل الدراسه تفيدني أم لا ؟
|
بالنسبة بكتب السنة التحضيرية فطالباتها ممكن يفيدوكِ
لكن اذا ناوية على طب فأنصحك تقري في كتب المصطلحات الطبية
جدا حتفيدك , وحتحببك للطب أكثر
هناك بعد أسماء الكتب المختصرة
إن شاء الله تلاقيها في قسم الطب بالمنتدى
لكن احنا درسنا من كتاب اسمه
Chabner's Language of Medicine
وسابعاً واخيراً انا قدمت على التعليم العالي وهنا حيرتي الكبرى فـ بكل صراحه هل تنصحوني بدراسة الطب هنا ام في الخارج علما بان الدوله المختاره في ( ايرلندا )
واللي يقدر بكل الصراحه يعطيني رأيه في الفرق لو درست هنا او درست برا من ناحية التدريس واشياء اخرى ؟
|
صراحة أنا أشوف أن دراسة الطب في مرحلة البكالوريوس الأفضل انها تكون هنا
وخاصة للبنات
لكن التعليم العالي للماستر و الدكتوراه فالأفضل بالخارج
امكانياتهم أفضل وشهاداتهم أقوى
وكل من أراد انه يصير طبيب ممتاز وله صيته وخبرته
لازم يدرس برّا
و هناك أكيد أصعب , لكن بعد البكالوريوس والمناهج الطبية و التعود على الانجليزية
حيسهل عليكِ كتير