رد: هندسة حاسب
نصيحتي لك ... هندسة حاسب بمعدل تحت 3.75 مالها قيمة أبداً في القطاع الخاص
ﻷن القطاع الخاص في دي الحالة بيفضل علوم الحاسب عليك ..
بشكل عام ... حتشتغل في أنظمة التحكم في المصانع سواء حكومي ولا قطاع خاص
إذا انقبلت بإذن الله في أي شركة اتصالات حيكون وضع عملك أحسن وأفضل ﻷنه حتشوف فايدة من دراستك
بالنسبة لشركات البترول .... حتسلك أحد مسارين إما شركات أجنبية أو حتى سعودية لكنها حتدربك على عمل الشركة ولا يهمها إنتا إيش في راسك المهم اسمك مهندس وحتشتغل على الشي اللي اتدربت عليه
أو انو الشركات دي تشغلك ضمن فريق اﻵي تي أو في قسم اﻵي تي عندها وحتشوف اللي معاك تشكيلة من مهندسين و علوم حاسبات ويمكن دبلومات - لا تستبعد-
عندك كمان شركات البتروكيماويات
وفي الشركات المتعاقدة مع شركات أخرى لتقديم خدمات المعلوماتية زي بي تي سي - تابعة لبن لادن السعودية - و شركة عبدالله فؤاد - وشركات أخرى
دي الشركات تقدم خدمات الشبكات واﻹتصالات و أنظمة الحاسوب للشركات الكبيرة زي أرامكو وسابك وغيرها
وفي عندك المؤسسة العامة لتحلية المياه عندهم برامج تدريبية لكن أغلبها حيكون ﻷنظمة التحكم اﻵلي يعني جزء من دراستك في هندسة الحاسبات هوا اللي حيكون ضمن عملك في التحلية
وفي شركة الكهرباء ... لكن ما عندي خلفية عنها ......
وفي الشركات العالمية بتعمل برامج تطويرية وتدريبية عشان تزيد مبيعاتها في السوق العربية وتحتاج موظفين لها في المنطقة ويبغوا خريجين بس -الله الله بالمعدل - زي ما قلتلك 3.75 وفوووووووق ... ومن دي الشركات ... إتش بي و سيسكو وأوراكل وسيمنز وإريكسون و إيه بي بي
وبالنسبة لمكان التوظيف .... الغالبية بتكون في الرياض والمنطقة الشرقية ....
في الغربية قلييل ... لكن لو عندك واسطة تقدر تزبط نفسك
أما بالنسبة لبرامج التدريب ... إلى اﻵن في الرياض ....
أما شركات البترول والبتروكيماويات .... فهي تغطي كل أنحاء المملكة في الشرقية وفي في الغربيةوفي في الوسطى وفي في الربع الخالي وحتى في خارج المملكة
--------------------------
أما لو معدلك تحت 3.75 ... برضواعندك فرص في الشركات الكبيرو القيادية والبرامج المتميزة ... لكن فرص ضعيفة ... ولا يزال قدامك شركات اﻹنترنت زي أول نت و نسما - ونسما شركة كبيرة لها أنشطة غير خدمات اﻹنترنت - وعندك شركات كثيير متوسطة وصغيرة لها أنشطة وخدمات للمؤسسات والشركات المتوسطة
----------------------
وفي النهاية الوظيفة رزق من الله ... والله يفتحها علينا وعليك ...
|