[yasso]

الشيء الضار أقصد بيه السيجارة......التدخين.........المدخنين.

ماني متخيل قد ايش صرت أشوف الشيء ده في حياتنا......أشوفه بالجامعة والمدارس وبالأسواق وبالمكاتب وبالبيت .

أشوفه بيد عجاويز وبيد شباب وبيد بزورة وبيد بنات.......ماجات بس عالسيجارة ماهو فيه المعسل والشيشة والسيجار وماخفي كان أعظم

أظنه صار شيء عادي ولا ايش رأيكم؟؟......مدري بس كل الحملات التثقيفية عن مضار التدخين ونصايح أولاد الحلال والأمراض اللي نسمع بيها بسببه شكلها ماكان منها فايدة........طيب ليش؟؟؟؟

اللي أنا شايفه انه مافي شلة من الشباب الا وفيها واحد أو اثنين يدخنوا أو يعسلوا أو يشيشوا اذا ماكانوا كلهم ........ ماأظن انه التقدير ده سليم بالنسبة للبنات بس 100% كثير منكم يحبوا المعسل اذا ماكانت السجاير.

ياترى احنا حاسين بالوضع ده ولا كلنا صرنا ماشيين مع التيار ؟؟؟؟

جربوا تحسوا بالمرض اللي اتفشى في مجتمعنا هذا بأنه كل واحد يقرأ الموضوع يقول كم واحد يدخن أو يعسل أو يشيش من الناس اللي بيحتك فيهم وياترى هل هو صار مثلهم أو إنه عزيمته قوية مااتأثرت باللي حوله يمكن الواحد لمن يشوف العدد الكبير يبدأ يحس ويحاول يغير أو يتغير للأحسن وأبدأها بنفسي من غير ماتحتاجوا تقول الصلة الا اذا حبيتوا........العدد يكفي.

بالنسبة ليا ماحاولت أفكر بكل اللي أعرفهم من المدخنين بس حصرت العدد على يوم أمس والناس اللي قابلتهم أو كلمتهم بالتلفون خلال 24 ساعة وكان العدد تقريبا 37 شخص ( لاتستغربوا العدد لأني أمس كنت جالس في قهوة من قهاوي المطار وخطر ليا الموضوع وقتها )

سامحوني على الإطالة وأتمنى ان الموضوع يطلع بنتيجة طيبة......وسلامتكم