السلام عليكم ورحمة الله وبركاته
كل عام وانتم بخير وصحة وسلامة
هذه لرمضان والعيد مع بعض
وارحب بكل الاعضاء والعضوات اللي انضموا لطلاب وطالبات كلية الحاسبات
واتمنى لكم التوفيق
ومن غير ما اطولها
انا حابة آخذ آرائكم وافكاركم عشان نرتب هذا القسم "منتدى كلية الحاسبات وتقنية المعلومات"
بحيث انه يفيدكم اكثر ويكون مناسب لكم
وفي النهاية المفترض انه المنتدى يكون منكم واليكم
وحأبدأ بالأفكار اللي عندي
واللي يحب يساعدني بأي شي يتفضل لأني احس اني احتاج مساعدة
عاد تعرفوا كيف الواحد يتخرج وينشغل بأمور الحياة
المهم اتفضلوا على الخطة المستقبلية للقسم:
1-طبعا أكثر الاستفسارات هي عن "ايش اقسام الكلية" و "ايش الفرق ما بين هذه الاقسام" و "ايش افضل قسم"
اتكررت مواضيع كثير بنفس هذا الهدف او المضمون
وفي كل موضوع في مجموعة ردود مفيدة من الاعضاء...وعموما كل الردود سواء مؤيدة او معارضة تعتبر مفيدة
فالفكرة هي اننا نعمل موضوع واحد نكتب فيه شرح الاقسام الثلاثة للكلية (علوم حاسبات - تقنية معلومات - نظم معلومات) زي ما هي مكتوبة في موقع الكلية او البروشورات اللي كانت تتوزع في الكلية (وهذه عندي موجودة على ورق) وفي نفس الموضوع نجمع كل الردود حقت الاعضاء من المواضيع القديمة ونجيبها في موضوع واحد
ويصير الموضوع هذا هو مرجع شامل لأي احد يحب يأخذ فكرة عن الاقسام وآراء الناس فيها مرة وحدة
2- نعمل فهرس للملخصات والمواضيع المميزة (القسم الفرعي لمنتدى كلية الحاسبات)
حيكون موضوع فيه روابط لكل المواضيع الموجودة في قسم الملخصات والمواضيع المميزة لكن بشكل مرتب ومصنف حسب ارقام المواد او اهداف المواضيع
وبكدة يصير الوصول لأي موضوع مميز او ملخص سهل و واضح للجميع
واللي يبغى يدور على شي معين حيكتفي بأنه يدخل على الفهرس ويشوف العناوين المتوفرة في القسم
3- اي ملف سواء محاضرات او واجبات او ملخصات (مع انه ما عندنا منها في قسمنا كلية الحاسبات انا متأكدة) المهم اذا موجودة داخل اي موضوع ما بين الردود
افصل الرد واخليه موضوع لوحده...بحيث تستفيدوا منه و توصلوا له بشكل اسرع واسهل
واكيد عنوان الموضوع يكون يوضح محتواه...وهذا اهم شي
4- رقم 4 هذه علية انا من بداية الاجازة وانا ادور وقت لها
ان شاء الله رح اكتب لكم موضوع عن "المستقبل الوظيفي لخريجي علوم الحاسبات"
بناءً على المحاضرة التي تم إلقاءها في الكلية الترم الماضي بتنظيم من IEEE KAU student branch
هذا اللي طالع معاية اللين دحين
وانتظر آرائكم وأي افكار جديدة للقسم
مايند قلانس