رد: د. طيب في لقاء صحفي: طلابنا بكلية الهندسة يمكن أن اتحدى بهم أي طالب آخر في العالم
اﻷخوة المنتقدين والناقمين على الكلية وعلى وضعها ... سواء شاركوا أو اكتفوا بمتابعة الموضوع
أعرف انكم حريصين على الكلية والجامعة وسمعتها حرصكم عل مستقبلكم ...
فياليت ... كل واحد فيكم يلخص في نقاط .... اﻷشياء اللي يشوفها سيئة ومحتاجة تغيير في الكلية ونظامها ... << بعيد عن التهجم وانتقاص الغير والكلام السوقي وعبارات الهمز واللمز
وأحب أقلكم ... من نظرتي وخبرتي في الكلية على مدى 6 سنوات مضت بين اﻹعتماد اﻷكاديمي المكافئ ... واﻹعتماد اﻷكاديمي الكامل ... فعلاً تطور نظام الكلية ومناهجها بشكل كبير جداً خلي موضوع سوق العمل و مقارنة الكلية بنظيراتها في الجامعات السعودية على جنب ﻷنو التغيير والتطور في الكلية ونظامها بدأ يظهر في العشر سنوات اﻷخيرة (صحيح هوا بطيئ) لكن الحمد لله انجازات الكلية تشهد ... والسنوات الجاية أحسن وأحسن بالنسبة لكلية الهندسة ..
من ناحية المباني ... لما ينتهي المشروع اللي جنب عمادة شؤون الطلاب راح تنتقل الكلية للمباني الجديدة وبالنسبة ﻷعضاء هيئة التدريس فالغالبية الموجودة حالياً راح تتغير ﻷنه المبتعثين من المعيدين والمحاضرين على أيامي خلاص قربوا يخلصوا بعثاتهم وبيرجعوا بشهادات عليا ويحلوا محل أعضاء هيئة التدريس الموجودة حالياً ... وبالنسبة للمناهج .. زي ما بتلاحظوا بتتغير وتتطور مع كل دفعة ... ودا شي له إيجابياته وسلبياته ... حتى التخصصات بتتطور .. وفي تخصصات استحدثت في بعض اﻷقسام وفي تخصصات هندسية تابعة للكلية لكنها في كليات ثانية .. زي الهندسة البحرية في كلية علوم البحار وزي الجيولوجيا الهندسية في كلية علوم اﻷرض وأعتقد في توجه لكلية الحاسبات للتوسع في تخصصات هندسة الحاسبات
بالمختصر التطور ما يجي بين يوم وليلة ... واللي بتشوفوه دحين بدأ من 6 سنوات وأكثر الشغل عليه .. يعني لا تستعجل بالحكم على الكلية
بالنسبة للطلاب ... ( مع أنظمة القبول الجديدة ونظام الكلية بالذات اللي يمنع الطالب من التخرج بمعدل أقل من جيد .. أقول ... "لا مكان للضعفاء في كلية الهندسة واللي يبغى الهندسة بسهولة لا يسجل في الكلية" )
وبالنسبة لتفاصيل اﻷعتماد إن شاء الله .. أبحث عنها ... ﻷنه مختلف جذرياً عن اﻹعتماد السابق حسب ما وضح وكيل الكلية للتطوير
شكراً لكل من أثرى الموضوع ... وأتمنى لكم الفائدة
تقبلوا تحياتي
Eng. Turky Gary
|