[فرحة]

امس كان يوم حافل
رحنا لحديقة السميري ولكل من لا يعرف ينبع
حديقة السميري حديقه خاصه بالنساء فقط ممنوع دخول الرجال حتي ولدي الي عمرو سبعه سنوات لا يسمح له بالدخول
بس انا دايماً اكذب واقول انو في المتهيدي عشان يدخلولي هو
انا دايما مواعيدي امريكيه والله العظيم
بس حصلي ظرف وانا خارجه من البيت ولدي جاتو كته في نفسو واطريت احطلو الجهاز حق التنفس
وجلست جمبو وفكرت الغي روحتي للحديقه غير انو جلس يتوسلني عشان نروح
ورحت لجل عيونو هو قلبي وعقلي
اول ما دخلت الحديقه كان فيه اتفاق بيني وبين حلا الدنيا اني راح اوصل الساعه خمسه واتركلها ورقه عند المسؤله الي عند الباب هي مسؤله عند اخذ الفلوس رسوم الدخول تقريبا خمسه ريال للنفر
المهم انا وصلت متأخره بسبب الظرف حق ولدي الي حكيتكم عنو
اول ما دخلت قلت للمسؤله بعد ما سلمتها رسوم الدخول حقتي وبعد ما كذبت عليها زي العاده وقلتلها انو ولدي في المتهيدي بدال ما اقول انو سنه اولى يارب سامحني
المهم سألتها هل في وحده سألت عني انا اسمي فرحه
قالتلي في وحده رجتنا سألت عنك مره كتير بس تروح وتجي تسأل عنك وتقول مافي وحده اسمها فرحه تركت ورقه عنكم
قلتلها لاني اتأخرت ساعه كامله عن موعدي اتفقت اجي الساعه خمسه والساعه الان ستة
المهم تركت ورقه عندها فيها رقم جوالي وقلتلها لو جات بنت اسمها حلا الدنيا سلميها هيا
ودخلت للحديقه وانا مره زعلانه من نفسي لاني عمري ما اتأخرت على احد قد كدا ودايما التزم بمواعيدي
ولكن قدر الله وماشاء فعل احمد ولدي اخرني مره
المهم دخلت الحديقه وشفت صحبتي ........ جالسه مع وحده ما اعرفها اشرتلي من بعيد اشرتلها ورحت لعندها سلمت عليها
وابتسمت لزميلتها الي جالسه جمبها وقلت لصحبتي مين هادي عرفيني عليها قالتلي والله دي فلانه وانا ما اعرفها غير اني جيت بدري على موعدنا خمسه وانتي اتأخرتي وما لقيت مكان اجلس فيه ما كان عندي فرشه فطلبت من البنت هنا .....
انها تجلسنس معاها وهيا ما قصرت
المهم قلت لصحبتي طيب استأذنك لحظه اشوف الحرمه الي عند الباب تركت معاها ورقه فيها رقم جوالسي ابغا اشوف البنت الي من المنتدي حلا الدنيا استلمتها ولا لاء
الا البنت الي جالسه وجلست صحبتي معاها عشان صحبتي ما كان عندها فرشه
البنت طالعت فيه وابتسمت ابتسامه ناعمه وقالتلي
انتي فرحه من منتدي عبد العزيز
قلتلها ايوا انا هيا انتي مين ؟؟؟
قالت انا حلا الدنيا ابتسمت لها
واقسم بالله ان الارواح كما قال رسول الله الارواح جند مجنده ما تعارف منها ااتلف وما تنافر منها اختلف
حسيت براحه لحلا الدنيا
وجهها مره من الوجوه المنوره
وغير كدا لما جلست اتكلمت معاها لقيت كلامها كلو كلام راقي
ما في فشخره انا ما احب المظاهر ولا الفشخره
واذا اخترت صحبات اختارهم زيي عشان كدا ارتحت لحلا الدنيا
بعد شويه وصلت الماسة الحب اتصلت على جوالي ودليتها على محلنا
جلسنا كلنا من سته الي ....
انا خرجت بدري كانت الساعه تسعه لما خرجت لاني خرجت بدري بسبب احمد ولدي كان مره تعبان
وصدرو مره مكتوم
ادعولو يابنات
حبيت احكيكم عن الي صار معايا لاني حابه الموضوع يتحرك شويا
وجكوني يا حلوين ايش اخبار الدراسه معاكم ؟؟