[خآطري مستهآمك]

صبآح الخير < حسب جوي كيفي


أول شي أنا بتكلم عن حاجة شدتني بهالموضوع ,

مسألة الحجاب :

معليش لو أطلب منكم تسفطون سالفة المذاهب والعقائد وووو خلكم منها الحين
ارجعوا لأساس هالمذاهب اللي ليومنا ذا وهو بين ايدينا
ولا عمرنا نتفكر ونتدبر ونقرأ سطوره
اللي هو القرآن .. كلام الله سبحان من أنزله ..


ربي سبحآنه وش قال لنا يابنات وقال لأمهات المؤمنين من قبلنا ,
ووصى الرسول عليه الصلاة والسلام بهالشي

آيه رقم (1) :

" وإذا سألتموهن متاعاً فسألوهن من وراء حجاب ذلك أطهر لقلوبكم وقلوبهن"

بالله مو أطهر ؟ بدل هالفتنة اللي صايره هاليومين ؟
سواء لكاشفات الوجه , أو العيون المكحلة فقط .
وأطهر لقلوبنا بدل هالنزاعات اللي صايره الحين بينكم ؟


آية رقم (2) :

" يا أيها النبي قل لأزواجك وبناتك ونساء المؤمنين
يدنين عليهن من جلابيبهن ذلك أدنى أن يُعرفن فلا يؤذين وكان الله غفوراً رحيماً "

يعني يابنات شلون نعرف بعض ؟
مو من وجيهنا ؟
من ملامحنا ؟
مو هي اللي تفرقنا عن بعض ؟
لأنك لو غطيتي الوجه حققتي المطلوب والغرض ف هالآية
نغطي وبالأخير إنتِ الكسبانه ( محد عارفك + محد راح يأذيك )


آيه رقم (3) :

" وليضربن بخمرهن على جيوبهن "

طبعاً حبيباتي إنتم عارفين وين ينحط الخمار أو العباة أو الطرحة ؟
ع الراس صح ؟
وجيوبهن ف الآية معناها - صدورهن -
أكيد هالخمار راح يغطي مابين الراس والصدر
اللي هو - الوجــه -

آية رقم (4) :

" ولا يبدين زينتهن إلا لبعولتهن أو آبائهن
أو آباء بعولتهن أو أبنائهن أو أبناء بعولتهن أو إخوانهن أو بني إخوانهن
أو بني أخواتهن أو نسائهن أو ما ملكت أيمانهن أو التابعين غير أولى الإربة من الرجال
أو الطفل الذين لم يظهروا على عورات النساء"


شايفين نبديها لمين ؟ بالله الحين فيه أحد يستاهل يشوف طرف منك ؟
غير اللي بالآيه ؟



والآيات والله كلها كثيرة عن الحجاب
والوقت مايسعفني إني أبحث
ونفس الشي من السنة فيه أدلة كثير


وأكيد تتذكرون حديث عائشة رضي الله عنها
يوم كانت محرمة مع الرسول صلى الله عليه وسلم
يوم كانت تكشف بس إذا مروا الرياجيل غطت وجهها

وهي مين يابنات ؟ عائشة أم المؤمنين
اللي وحنا من الإبتدائي ندرس ونحفظ أحاديثها
واللي ماحب الرسول مثلها
ليش مانصير زيها ؟


يعني بالأخير الأمر كله بيدنا
يعني مو عشان الوضع عاجبنا
نقول اختلفت المذاهب



بعدين عندي سؤال بديهي :
ليش الأسلام أجاز النظرة الشرعية ؟

عشان تدخلين تعطينه عصير وبس ؟
ولا جاي يشتري كنبكم مثلاً ؟

لا , هو جاي يشوفك إنتِ
لأن ماحصل له الشرف يشوفك برا
لأننا نغطي , ولو صدق الكشف جايز
ماكنا عرفنا شي اسمه النظرة أو الشوفه

كان يشوفها ويراقبها هي طالعه من البيت وخلصنا .. صح ؟

يابنات الله ماشفناه وبالعقل عرفناه

قبل فترة وصلني ايميل عن الحجاب ف النباتات وفي الجمادات وفي الانسان
واشياء كثيرة نسيتها للأسف , بس اللي اتذكره :

في الجمادات
مثلاً القلم عشان مايجف وتحافظين عليه وش تسوين فيه ؟
مو تغطينه ؟
السيف عشان مايصير فيه أي ثلم أو كسور , مو نحطه في غمده ؟
اللولو منين نطلعه يابنات ؟ مو نتعب عشان نوصله وغير كذا نحصله محفوظ داخل الصدف ؟


في النباتات
الثمرة زي التفاحة أو الموزة وغيرها
لو قشرتيها , شلون يصير لونها ؟
مو تسوّد ؟


في الإنسان
العين : إنتم عارفين وين مكانها ؟ داخل محاجرنا محفوظة ..
القفص الصدري : يحفظ أهم شي فينا القلب والرئتين ..
الجلد : تخيلوا أشكالنا يابنات إننا بدون جلد أو شفاف
نشوف عضلات بعض واللحم والعظام والأوعية الدموية ..


سبحانه ربي حافظنا من كل شي ممكن يؤذينا
ليش حنا مانحب أنفسنا ونحميها ونحفظها ؟

يابنات تكفون واللي يسعدكم حبوا أنفسكم اعشقوها
خاصة في أمور الخير , أذا انتِ ماأسعدتي نفسك وحبيتيها
من بيحبها ؟ من بينفعها غير اللي انتِ جنيتيه
عطيها من الحين عشان ترد الدين لك في يوم لاينفع فيه مال ولا بنون
إلا من أتى الله بقلب سليم ..

آسفه حبيباتي إذا كثرت كلام
وعارفه انه موب مرتب
لكن اسأل الله أن ينفع به


يآرب أدم علي حجابي وارزقني بالأفضل دااائماً
واحفظني وأخواتي المسلمات من شرور الكائدين

اللهم استرنا أنا وخواتي ومن يقرأ فوق الأرض وتحت الأرض ويوم العرض..
استغفر الله وأتوب إليه ~


هديتي لكم :




حافظكم ربـي ..

.