بصراحة أصابني انهيار نفسي شديد لما قلتي لي انو ما الوزارة ماهي معترفة بالفارم دي والكلينيكل فارمسي .. بس عندي شوية أسئلة أتمنى انك تجاوبيني عليها :
1/ أنا اللي أعرفه ان حامل البكالوريوس يسمى صيدلي , وحامل الفارما دي يسمى دكتور صيدلي .. لكن بما أن الوزارة ماهي معترفة بالفارما دي إلى الآن , هل صحيح ان حامل الفارما دي يُعامل على أنه حامل بكالوريوس ويتقاضى نفس راتب الحاصل على بكالوريوس؟؟
ابغى اسئلك سؤال كم في فارم دي في السعودية راح تلاقية قليل تاني شيء اول جامعه درست التخصص جامعتنا ودحين بقية الجامعات تقلدنا وكمان لسة ماخرجت ولا دفعة يعني الفارم دي بس 3 دفع والرابعه في الطريق الي معاهم الشهادة
وابدا ما يعامل معاملة الي معاه بكالوريوس وفي زيادة في الراتب لانو احنا درسنا سنة زيادة
2/ انتي قلتي لي أول انو اللي يكمل سنتين رزدنس يسير كلينيكل فارمسي .. طيب كيف أسير كلينيكل فارمسي والوزارة أصلا ماعندها مرتبة/درجة وظيفية اسمها كلينيكل فارمسي؟؟ من قال كدا انا ماقتلك
يسير استشاري
انا ما اعرف نظام وزارة الصحة بس الي معاهم كلنيكل راح يسيروا استشارين ودا شيء سمعتوا من شخص والله اعلم يعني يسير لنا تصنيف في وزارة الصحة لو سرنا كلنيكل
3/ بما أن الوزارة ماهي معترفة بمرتبة/درجة الكلينكل فارمسي .. بعد سنتين الرزدنس إيش حيكون مسماي الوظيفي؟؟ وإيش حتكون وظيفتي في المستشفى ؟؟ (هل حأكون صيدلي عادي بس يزودوا لي الراتب)
زي ما جاوبت استشاري ورواتبهم زي ما سمعت مرا حاجة محترمة اصلا كفاية استشاري موقع ممتاز وبرستيج كمان
4/ فهميني بالزبط كيف كنتي تقولي لي انت وناس كثيرين انه تخصص الكلينيكل فارمسي مــــــرررررررررررررررة مطلووووووووووووووب في المستشفيات , والمستشفيات أصلا مافيها وظيفة باسم كلينيكل فارمسي؟؟ ولا في الوزارة شي اسمه كلينيكل فارمسي (هل حأتعين في وظيفة أقل من مؤهلي يعني ولا كيف)
بتلف في نفس السركل احنا لما نتخرج يسير احنااا صيدلي عادي زي اي صيدلي يتخرج من اي جامعه بس مع الرزنس راح نفرق راح نسير على مرتبة استشاري يعني يسير معترف فينااا
واكيد مطلوب لانو بيتجهوا لتقليل الاخطاء الطبية وتلاتة ارباع الاخطاء بسبب الادوية
وترى في المستشفيات الكبيرة في اقسام كلنيكل بس في وزارة الصحة ما اعرف النظام
5/ هل فيه أمل على المدى القريب خلال الـ 7 سنوات القادمة ان الوزارة تعترف بالفارما دي والكلينيكل فارمسي ويعدلوا تقسيم درجات الصيادلة؟؟ وهل سبق وأن تواردت أنباء حول هذا الموضوع؟؟ ولا الوزارة ما فكرت أصلا في الشي هذا
الفارم دي من وجهة نظري مكانهم الصحيح انهم يشتغلوا في الصيدلة لانو لما نتخرج من الكلية في اشياء كتير في البراكتس مانعرفهاااا
6/ بالنسبة للمستشفيات اللي يعترفوا بالفارما دي والكلينيكل فارمسي ؟؟ هل تقسيمهم لمراتب/درجات الصيادلة الوظيفية يختلف عن تقسيم وزارة الصحة؟؟ وإذا انه يختلف قولي لي كيف تقسيمهم
ترى حتى الفارم دي في المستشفيات الي فيها اقسام كلنيكل بيشتغلوا فارمسست عادي
اما بالنسبة للتقسيم ما اعرف
7/ ماهو تقسيم وزارة الصحة لمراتب/درجات الصيادلة الوظيفية ؟؟
صيدلي وصيدلي اول واستشاري صيدلي
سؤالين خارج النص
:
8/ بالنسبة للتدريب الصيفي اللي بعد سنة ثالثة وابعة .. متى موعده أول الصيف ولا آخره ولا أنا أختار؟ وكم مدته (شهر شهرين)؟ وهل هو بشكل يومي ولا بعض الأيام في الأسبوع؟ والدوام من متى لمتى ؟؟ وإيش طبيعة التدريب
التدريب شهر اختياري في اي مستشفى كل المستشفيات في جدة 5 ايام في الاسبوع ماعدا العسكري (يومين ) وفتحي ( 6 ايام)في الاسبوع وعلى ما اعرف التدريب يختلف على حسب المستشفيات
9/ انتي قلتي سابقا انو اللي يدخل صيدلة لازم تكون قدرة الحفظ عنده عالية (والحمدلله هذه الصفة موجودة عندي) .. بس أبغى أعرف هل لازم أكون حفيظ عشان معظم المواد تعتمد على الحفظ ولا عشان في كذا كم مادة ثقيلة يبغالها الواحد يكون حفيظ؟؟
سؤال صعب بصراحة بس كتير مواد تعتمد على الحفظ وكمان في مواد تقيلة مرا
أعتذر على الاطالة وأتمنى انك تجاوبيني على أسئلتي بإجابات شافية ووافية , لأني والله محتاج لكل معلومة عن الصيدلة , وأتمنى انك تجاوبيني بكل صراحة وما تجامليني أو تخفي علي بعض الأشياء عشان أهيئ نفسي مو لما أدخل الكلية أنصدم
الصراحة انا بجاوب من وجهة نظري الصراحة انت لازم تاخد اكتر من وجهة نظر لانو في اختلاف بين الاشخاص انا لما اخترت مستشفى الي راح اخد في الامتياز امكن سالت مليون شخص وكل شخص كان لوا وجهة نظر انا انصحك انو تسال اكتر لانو انت بتسال عن رائي والاراء بتختلف وخاصة الناس الي تخرجوا لانو هما توظفوا وعاشو ا المشاكل انا الصراحة بقرر من خلال كلام الدكاترة والتدريب والاشخاص الي عملوا محاضرات عندنا في الكلية.
جزاك الله خير والله يرزقك كل ماتتمنيه