[white rose]

موضوعك جنان والله وجا في وقته تمام أكثر شيء أحسه يعيقنا في تخصصنا انو احنا نسمع كلام البنات وما جربنا نعتمد على نفسنا في دراستنا

أذكر مرة في إحدى المرات أستاذة حنان جبر الله يسعدها في مادة رايتينج2 أثناء شرح كتابة المقالة قالت: في بنات جابوا في المادة الدرجة النهائية في التسعينات وهم انتساب مجرد ماقالت هذه الكلمات كل البنات صاحوا ماهو مستوعبين قالوا لا مستحيل يلا يلا نجاح بالتسعينات وجالسة تحلف لنا انتو ليه مو مصدقين؟.... قالوا البنات:كل البنات كذا يقولوا قالت: دامك إنتي عرفتي أخطاء غيرك وحاولتي قدر المستطاع تبتعدي عنها هنا في هذه اللحظة مافي أي مشكلة حتعديها بتفوق بعد.. بعدها حقيقة أنا صدمت بذهول وأضن كل البنات كذلك..

صراحة من جد تسعين في هذي المادة احسها خيالية او حلم لكن ما في شيء على الله بعيد..
وبالنسبة لتجاربي في المواد القسم تبعنا انصح ..
اولا: بالاعتماد على النفس في المذاكرة ..
ثانيا: لا تقولي صعب بإذن الله يكون سهل..
ثالثا:دوري على الاستاذة اللي تكون تخاف ربها في التصحيح ..
هذولا اهم الاشياء اللي من جد تعلمتهم من خلال تجاربي في المستوى الثالث والرابع في كل المواد..
في writing 1-2
اللي ساعدني الكتابة والكتابة وبس كمان الجرامر لا تسيبوا شيء مروا على كل شيء وانا الحين في رايتنغ 2 ان شاء الله اعديها كويس دعواتكم..
في /Listening1-2
هذي المادة الحفظ فيها مرة كثير بس اللي يتعب اكثر انك تكتبي معاني كلمات ما تعرفيها لكن اللي ساعدني اني قررت اتحدى نفسي واكتبها حتى لو ما عرفت معناها تمام هذا في ليسننغ 1.. في ليسننغ2 كان في الاختبار فنكشن مرة كثير فكتبت اشياء كثيرة من عندي لاني ما افتكرت الفنكشن تمام وكمان كان السؤال الاخير ضعي في امثلة وانا رحت عرفت الكلمات لانو مع السرعة ما انتبهت تمام لكن قدرالله وما شاء فعل..والحمدلله عديتها بدرجة ما توقعتها..
في Reading2-1
كانت تجربتي في ريدنغ 1 كويسة لانو كنت انصدمت قبلها لكن رجعت بقوة وبالنسبة للريدنغ 2 اكثر شيء ساعدني فيها قراءتي الخارجية لانها تعتمد على المخزون اللغوي اكثر من مذاكرة الكتاب وكمان على القطع اللي في موقع الكتاب ..
سيرة نبوية وخلفاء راشدون
المادة هذي طويلة كتابين هذا اللي تعبني كمان في الاختبار تبعها كان التركيز على الشخصيات والاحداث وطبعا المنهج حلو وممتع بس للي يحب يقرأ وتجربتي كانت صعبة في المذاكرة لكن الاختبار كان سهل الحمدلله ..
الثقافة المستوى الثالث
هذي المادة تجربتي فيها صعبة لانو الكتاب مرة كبير والمعلومات كثيرة وكمان ما دورت على أستاذة كويسة تشرح اللي كنت معاها بس تشرح اشياء من برا الكتاب وطول المحاضرة ضحك وفلة بس طلعت من عيوني في الاختبار..
الثقافة الرابع:
تداركت نفسي ودورت على استاذة كويسة تشرح وتعطيك ايش الاشياء المهمة واللي تركزي عليها في الكتاب ..
أخيرا يعطيك العافية يا أحلى أمواج على موضوعك اللي ساعدنا على تفريغ ما بداخلنا من مشاعر وأشجان وبالتوفيق..