[همس الحزن]

الله يسعد قلبك حبيبتي .. واللهم امييين ربي يثبت قلبك وقلوبنا على ذكره وطاعته ياااارب..
دامك يابعدهم فكرتي بالتغير وحياتك ماهي عاجبتك .. هذي أول نقطه بالتغير .. القناعة الداخليه..
ثاني شئ حاولي قد ما تقدري ما تتركي صلاة الوتر حتى لو ركعة واحده مو مشكله .. انا بدأت في البداية كذا ..
الأغاني اذا عندك إراده قويه احذفيها من جوالك مره وحده مو تقولي بكره وبعده .. لا اعزمي وتوكلي على ربك وامسحي.. وقولي ربي حيعوضني خير بالجنه ان شاء الله ويسمعني كلمات واشعار احلى من هذي مليون مره ..
حاولي تستغلي وقتك .. خليك على اطلاع بالكتب الجديده .. كماان حلو تشاركي بالمنتديات النسائيه .. حتى لو مختلطه اذا انتي ماسكه خيرك شرك وما رديتي على احد بشكل غير لائق مافيها مشكله .. السيدة عائشة رضي الله عنها كانت بعد وفاة الرسول عليه الصلاة والسلام تعلم اصحابه أمور دينهم ..
فخلي كل همك وأملك انك تعلمي وتفيدي غيرك بالطاقات والخبرات اللي عندك وتستفيدي منهم كمان .. بشي يفيدك بحياتك بالدنيا ويزيد رصيدك بالاخره ان شاء الله ..
كمان شفت قروب بالجامعة ما شاء الله تبارك الله يحفظ القرآن .. يجلسوا كل صباح يحفظوا كم آية وبنفس الوقت يسمعوها لبعض .. فكرة مرررره جيده.. مع الاسف ما لحقت الا على آخر اسبوع قبل الاختبارات معاهم .. اذا حابه نعمل مثلهم قروب ونتعلم ونحفظ القرآن .. ومنها كمان نتعرف على بعض ونكتسب معرفه وخبره جديده ..
في الصيف لاتخلي وقتك فاااضي ابداا .. اشغليه بآي شئ .. مثلا كل اسبوع تعلمي طبخه معينه او اجلسي مع اخوانك وعلميهم شئ يفيدهم .. او اجلسي معاهم على التلفزيون وشوفي ايش يتفرجوا واذا في شئ ما عجبك علقي عليه بكلام يستوعبونه ويدخل دماغهم .. وبكذا أفدتي نفسك وافدتيهم معاك ..
اممممم خليك اهم شئ قريبة من ربك .. الصلوات لا تضيعينها صليها بوقتها .. وحاولي قد ما تقدري تتمرني على صلاة السنن .. وربي تشرح الصدر وتفك الضيقة اللي بصدرك .. بعد الله ..
رضا امك وابوك اهم شئ بالحياااة .. شوفي ايش اللي يحبونه واعمليه .. وابتعدي قد ما تقدري عن الاشياء اللي تضايقهم منك..
خليك قريبه من اخوانك .. الشئ اللي تحسي نفسك فاقدته حاولي تعوضيه فغيرك .. وخااصة اخوانك .. حتحسي بطعم الحياة والانجاز وقتها ..
اممم كمان خلي لك دفتر صغير .. تكتبي فيه النوتز تبعك .. اذا في شئ عجبك او ضايقك اكتبيه .. وحلو كمان تعملي مكافأت لحالك .. يعني انجزتي صلاة الوتر مثلاا اسبوع بشكل متتالي .. اعطي نفسك مكافأة خرجه معينه ان شاء الله حلاوه اهم شئ هديه عشان عملتي شئ حلو.. ونفس الشئ لو عملتي شئ غلط .. احرمي نفسك من شغله ..



وقبل كل هذا حطي فبالك ياعيوني .. التغير حبه حبه .. هو التغير المستمر بإذن الله .. يعني كل شئ بالتدريج يجي ..

الله يوفقك ويفتح على قلبك ويسهل عليك وعلينا امور الدنيا .. ويثبتنا عند الشهادة ياااارب..

موفقه ..ْ~