[بحر الحرية]

أهلين أختي..
اعتبري الكلام اللي حقولو لكي مجرد رأي، يعني لازم تفكري فيه، وتتحملي مسؤوليته لو أخدتي فيه:

أنا بعرف وضعك كبنت حيكون صعب في جامعة الباحة، أول شي للبعد عن أهلك، ويمكن انتقالك من جدة للباحة راح يكون فيه شوية صعوبة بحكم اختلاف المنطقتين بشكل مره كبير..

لكن اللي اقترحه عليكي، كملي انتساب، وشدددددددددددددي حيلك ع الاخير، وجيبي معدل، وانشاا الله يحولوكي انتظام، لكن اداا مو ناوية من بدايتها تجيبي معدل عالي فلا تاخدي بكلامي لأنك راح تستمري انتساب طول الفتره الباقية.. واداا كان عاجبك فكرة تكملي الباقي انتساب ف داا شي راجعلك..

أو الحل التاني:
شوفي شروط التحويل لجامعة الملك عبد العزيز، وافهميها مزبوط واقريها، وكملي ف جامعة الباحة وبعدين حولي للملك عبد العزيز، لكن برضوو دي يبغالها اجتهاد ف مسألة المعدل ويبغالك تصبري ممكن ترمين أو تلاتة حتى تقدري تحولي هنا..

الحل التالت:
تختاري واحد من الحلول اللي الجامعة تسمحلك فيها، زي رابغ أو الأشياء دي، لأنها تابعة للملك عبد العزيز، وراح تدرسي نفس المناهج اللي ف جدة لكن الفرق اختلاف المنطقة، و ف نظري رابغ أقرب بكتير من الباحة، وأسهل ممكن ف مسألة التحويل، وأفضل لأنك راح تعادلي نفس المواد من هناك، وما يحتاج لك شغلة طويلة عريضة عشان تحولي من جامعة لجامعة، لكن دي تحويل من منظقة لمنطقة ف نفس الجامعة..

وشوفي وتأكدي واسألي واستخيري وانشاا الله ربي يخترلك اللي فيه الخير ياارب ويسهل عليكي كل امورك ويحقق لك اللي تتمنيه يااارب؛؛