رد: نداااء لكل الاخووان والاخووات وغلا روحي
نفس الشغلة اللي كانت محيرتني .. وموعدي السبت !
بس جلست كتير مع نفسي ، واقتنعت الحمدلله إنو وجودي في جدة مو مع أهلي في المدينة لكن بالقرب منهم أفضل
ومو يعني اترشحت فلازم أطلع ، وصح إنو احنا البنات كلنا متحمسين للبعثة وكل مين يقلي يا هبلة لا ترفضي روحي عيشي حياتك
لكن خلينا نفكر مزبوط في الوضع ، و أنا لما فكرت بالنسبة ليا طلعت بهادي النقاط :
1- فيك تبعد عن أهلك كل هادي السنوات ؟! من 8 وانت طالع ؟
حتى لو كنت مغترب في جدة ، فهادي غربة بسيطة .. و وقت ما طفشت وتعبت ادفع شويتين من جيبك
واطلع لأهلك بالطيارة وشوفهم وارجع تاني ، مو شغلة صعبة ؛
2- تخيل لا سمح الله تصير ظروف صعبة ، صديق ليك يموت ، غالي على قلبك يمرض .. أمك تتعب
وانت ماتقدر تكون جنب أي أحد؟!! شغلة توجع القلب وتخليك تكره نفسك ^ ^ - وبتصير مع عمي المغترب طول عمره مابين أمريكا وأستراليا -
3- متأكد إنك ماحتتأثر بالفساد اللي هناك والأديان؟
في ناس أقارب ليا راحوا أمريكا دراسة وهما ملتزمين ومن آل البيت لكنهم خلعوا الحجاب
واتغيرت للأسف أخلاقهم ورجعوا هنا صاروا يصافحوا أولاد العائلة اللي كانوا زمان يتحجبوا عنهم !
وكتير قصص عن ناس أعرفهم إنهم ارتدوا ولا تركوا الصلاة لإنو هناك مافي رقيب غير الله
هنا على الأقل المجتمع مسلم بيحفزك تصلي وتعمل ، و في أهلك يزكنوا عليك كل شوية قوم صلي
ليش مو صايم؟ روح اعمل ... صح؟
وانت إن شاء الله ولد متربي وعارف كل شي ، لكن ضامن نفسك ؟
في صحابة ارتدوا .. فما بالك بينا ؟
4- لو درست البكالوريس هناك ، و رجعت معجز :d
حابب تريح شوية ، وبعدين تطلع تاني للماستر والدكتوراه .. حتقدر ولا حتقول تعبت ومافيا ؟
وخلاص آخد الماستر والرسالة من عزوز :p
مو حلوة !
لإنو أصلاً ماحيقولوا دا دكتور متخرج من جدة ودررررس البكاالوريس في ألمانيا فرضاً
مافي شي يعتبر غير الدكتوراه من فين أخدها الواحد ، فخد الدكتوراه برا وانت كبير ومتزوج إن شاء الله :)
5- لا تنسى إنك دحين عمرك 18 ولو رحت حتغيب عن أهلك في أحلى عمر ، في أكتر عمر يمكن تبرز فيه وتكون سند ليهم ومكان ثقتهم .. فخليك جنبهم وأسعى لرضاهم
ترى الدنيا كلها يومين ومو محوجتنا نقطع نفسنا عشانها :D
و برضو فكر انت كمان .. وأستخير واستشير أهلك
وربنا يوفقك للي فيه الخير ويحفظك :)
|