[Jeddah Glamor]

انا راح انزل جدولي للصيف واشرح لك عليه ...

لو جدولك غير صوريه ونزليه لنا ونشرح لك ..




بالنسبة للمادة تحتها ثلاث نقاط : رمز المادة ELCS ، ورقمها " مستواها " 102 فمثلا الانجليزي مستوين 101 و102 مستوى أول وثاني ..
وبعد كذا الشعبه SA يعني انت بأي شعبه .. زمان بالثانوي أنتي مثلا كنتي بصف ثالث /2 وغيرك ثالث؟3 وهكذا .. بالجامعه عندنا SA,AB وكثير رموز ..

اذا بداية الرمز S يعني علوم .. إذا بدايتها A يعني آداب .. وإذا بدايتها B إدارة واقتصاد ..

بعدين اسم المادة .. لأنه في كثير مواد لها نفس الرمز ولكن تختلف بالاسم ..

الوحدات يعني عدد الساعات .. انا أخذ الانجلش 3 ساعات .. ولكن تختلف فيه بعض المواد 3 ساعات بالاسبوع .. وبعضها 3 ساعات باليوم نفس الانجلش عندي ..

الأيام ..
S.S.M.T.W يعني من السبت للأربعاء .. لكن لو مثلا جا كذا .. S..M..W يعني سبت واثنين واربعاء.. لو كذا .S.T. يعني أحد وثلاثاء .. شايفه لو حرف S قبله نقطه .. يعني يوم الاحد .. لو ما قبله نقطه يعني يوم السبت ..

عموما بالجامعه فيه نظام .. انه الماده تأخذيها يوم السبت والاثنين والربعاء بنفس الموعد .. والاحد والثلاثاء نفس المواعد ..

فرضا: مادة الفيزياء .. عشان هي 3 ساعات .. تقدري تأخذيها سبت واثنين واربعاء ومدة المحاضرة ساعه وحده .. وتقدري تأخذيها أحد وثلاثاء لمدة ساعه ونص .. عشان يصير المجموع 3 ساعات بالاسبوع ..

وبعد كذا الوقت .. بنظام الـ 24 ساعه .. يعني لو قريتي مكتوب 14:50 معناها 2:50 يعني 3 الا عشر دقايق ..

وبعدين المبنى .. بالارقام وبس تجي الجامعه اسألي وتلاقي المبنى ..بعض المباني مشهورة باسماء ثانيه ..
المبنى السابع = العلوم .. المبنى 42= الخنساء .. المبنى 8 = الاداب .. المبنى 2= الاداره والاقتصاد ..

ورقم الغرفه .. احيانا جنبه رمز A,B,C يعني الدور الاول او الثاني او الثالث ..

المبنى الجديد بالعلوم له طريقه .. رقم الغرفه من اربع خانات .. يعني مثلا رقم 1123 يعني الدور الاول من رقم 1000 .. ولو 2134 يعني بالدور الثاني من رقم 2000 ولو 3145 يعني بالدور الثالث من رقم 3000

لو جدولك نفس الشي اتمنى تكوني فهمتي ..

لو غير عن كذا ارجع اقول نزل الجدول واحنا نشرح لك ..

لأني فاهمه مشكلتك .. مو عارفه كيف جدولك بالضبط .. متى تروحي الجامعه ؟؟ متى عندك بريكات ؟؟ متى تبدأ المحاضره هذي ومتى تنتهي ؟؟

نزلي جدولك ومستعدين نرتبه لكي ..