السلام عليكم ورحمة الله وبركاته
أول ما انقبلت في الجامعة كنت فرحان بشكل غير طبيعي والبطاقة الجامعية في يدي كل شوي أطالع فيها ماني مصدق من الفرحة
أما بالنسبة للدفاتر و الأقلام اول اسبوع لا تجيب إلا مفكرة صغيرة و قلم واحد عشان تسجل ملاحظات الدكاترة و أنظمتهم و طلباتهم
بالنسبة لكليتكم ما أدري بس أنا في الآداب كنت اداوم من أول يوم والدراسة مابدأت الا يوم الثلاثاء
بس استفدت ان الدكاترة عرفوني من البداية عشان الطلاب اللي كانو يحضرون في أول 3 أيام قليلين مره
في أول محاضرة اسأل الدكتور عن الكتب المطلوبة لو في كتب محددة و تسأل عن نظام الغياب يعني كل مادة لها عدد معين من الغيابات و تسجل أسم الدكتور و نظامه في المحاضرات هل يسمح بالتأخير أو لا بعض الدكاترة يسمح لك تتأخر الى 10 دقايق و بعضهم لو جيت بعده مايدخلك القاعة
بالنسبة للجدول فلا تستعجل باقي ماتحددت المباني مكتوب Tba يعني المبنى غير محدد
ممكن تداوم و في محاضرات ماتحددت مبانيها روح تأكد من كليتك تلقى أوراق مكتوب فيها كل شي معلقة داخل الكلية أو اسأل الطلاب اللي تلقاهم في الكلية
ممكن يكون جدولك مضغوط و تتعب أول اسبوعين استعين بربك و توكل عليه و راح تتعود
بالنسبة للزي عادي خذ راحتك أي شي مسموح خصوصا أن عندكم مختبرات بس (في حدود الدين و الأخلاق) قبل كل شيء انت طالب جامعي و لبسك يعكس مستوى تفكيرك , بعض الشباب الله يهديهم كأنه طالع السوق مو الجامعة
ملاحظة أخيرة : أهم ترم في الدراسة الجامعية (الترم الأول) كثييييير ناس متخرجين بمعدلات طايحة بسبب الإهمال في الترم الأول و راح تلقى كثير من الطلاب المتقدمين في الدراسة يقولك (أحاول أرفع المعدل) و السبب تلقاه جايب في الترم الأول حوالي 2,50 و يكمل باقي دراسته وهو يحاول يرفعه و كل ترم تلقاه تعبان و هلكان و في الأخير يتخرج بمعدل 3 و لا حوله و بعضهم ييأس و يترك الجامعة ليش لأنه أول ترم دخل الجامعة يفكرها فلة و لعب و يتورط بس أنت بدع في الترم الأول عشان بعدين ترتاح و تدرس بدون هم و غم .
أتمنى أكون أفدتك باللي أقدر عليه.