رد: استفسار بخصوص Tofel _ iBT
بالنسبة للـ IBT
هوا اختبار مدته 4 ساعات يتكون من 4 اقسام
القسم الاول Reading وفي هذا القسم راح يجيبولك 6 براجرافات وعليها اسئلة اختيار من متعدد لازم تحليها الستة كلها خلال 30 دقيقه او على حسب ما يقدرولك زمن لحلها ولو ما قدرتي تخلصيها خلاص يروح عليكي هادا القسم .. وفي هذا القسم تقدري تراجعي اجوبتك وترجعي للسؤال وتغيري الاجابة بعد ما تخلصيها كلها .. بالنسبالي كان صعب لانو مو بس يعتمد عالقراءة يعتمد عالاستيعاب لانه المواضيع علميه وفي اشياء عميقة جدا وتفاصيل كثير في البرجراف
القسم التاني .. Listening وفي هذا القسم حتستمعي الى حوارات بين اشخاص وبعد ما تنتهي من الاستماع تجاوبي على اسئلة اختيار من متعدد بناء على اللي سمعتيه .. عادة يكون الحوار بين صديقين او بين طالب والبروفيسور .. وبعد كدا حتسمعي محاضرة كاملة في مادة من المواد سواء لغويات او احياء او كيميا او حاسب او ادب وتجاوبي عالاسئلة تبعها وبرضو الاسئلة اختيار من متعدد .. يمكن في هادا القسم 4 محاضارات تقريبا
في دا القسم الوقت يوقف اثناء الاستماع ويبدا يمشي وانتي بتجاوبي عالاسئلة .. بالنسبالي كان سهل بس تعبت في محاضرة جاتني عن الانزيمات في الحشرات وانواعها وفوائدها وكانت الاسئلة صعبة حبتين
القسم الثالث Speaking وفي دا القسم اول شي يطلبو منك تتكلمي عن اي توبيك او اي شي .. مثلا تتكلمي عن الاحتفال بعيد الميلاد في بلدك .. وحيحددولك الوقت اللي تتكلمي فيه ولازم تكوني سريعه وتختاري كلمات بسيطة وواضحة وتختمي كلامك قبل ما ينتهي الوقت .. بعدين حتقراي برقراف صغير وتسمعي محاضرة عن نفس البرجراف .. وحيقولولك كيف يلقي الضوء البروفيسور في المحاضرة على البرجراف ويخلوكي تتكلمي عن الموضوع في حدود 30 ثانية ... هادا كان ابسط واحلى قسم مواضيعو خفيفة وسهلة مره
القسم الرابع Writing وهادا يتكون من جزئين الجزء الاول حتقرأي برجراف صغير وتسمعي محاضرة ويجيكي سؤال تجاوبي عليه بالكتابة .. طبعا لازم تكوني سريعه في الكتابة عالكيبورد وحيحددولك عدد الكلمات المطلوبة
الجزء التاني .. عادي يطلبوا منك تكتبي حوالي 300 كلمة عن موضوع معين ..
وبرضو القسم هذا كان سهل جدا
وبين القسمين التاني والثالث فيه بريك حوالي ربع ساعه
بالنسبة للكتاب .. في في المكتبات كتب توفل قديمة فيها غير هذي الاقسام انتبهي لا تشتري منها لانه فيها قسم قرمر وهما دحين شالو القرمر من التوفل احسن كتاب ممكن تحضري منو التوفل IBT - barrons
لونو اخضر فاتح راح انزلك في المرفقات صورة الكتاب ومعاه سي دي وموجودة فيه كل الاجوبة في لكل الاقسام
انا اختبرت التوفل قبل شهرين يعني قريب مرره .. اتمنى تكوني استفدتي من المعلومات واي سؤال انا حاضرة
|