[Loveless]

السلام عليكم و رحمة الله و بركاته ،،

أنا طالبة اداري انساني و سنة تحضيرية و حطوني في المستوى الرابع في الإنجليزي ،، و لله الحمد ..

لكن ما فات إلا أسبوع و جاتنا الأستاذة و تقول ماعد في إنجليزي لنا في هادا الترم ..

يعني بأسأل أنا .. في الترم التاني راح يدفسونا بالإنجليزي ؟ ولا خلاص مرة محا ناخد ؟؟!!

يعني بالعربي الترم التاني في إنجليزي بس لغوه للترم دا ؟ ولا خلاص بح ؟ :( نفسي اخلص و ارتاح من الهم عشان انا خطتي ب دحين و مرة سارت خفيفة من دون الإنجليزي يعني 3 مواد بس مهارات و احصاء و تفكير !
و الترم التاني لو حطولي انجليزي راح تكون صعبة :'((((( لأني خطة أ بكون !!

----------------------------------------------------------

هادا الموضوع الأول .. نجي للموضوع التاني ..
و انا في محاضرة مهارات التفكير اليوم اعطتنا الأستاذة ورقة مكتوب فيها (( اليوم الأرشادي للطالبات المستجدات بكلية الآداب و العلوم الإنسانية ))

و هوا يوم الربوع من الساعة 9 إلين الساعة 2 !!

و ابغى استفسر يعني انا طموحي علم نفس دحين !! و لمن قرأت الورقة هادي التخصصات الي مكتوبة ::

1- قسم الجغرافيا
2- قسم التاريخ
3- فسم اللغة العربية
4 قسم الإجتماع

و بس !! يعني فين راح قسم اللغات الأوروبية و اللغة الفرنسية و الإنجليزية و علم النفس ؟؟ يعني هادي ما تندرج تحت كلية الآداب ؟؟ انا مرة زعلت قلت محا احضر :(

بس فهموني قسم اللغات الأوروبية و قسم علم النفس ليش ماهي في ؟؟ ما تندرج تحت كلية الآداب ؟

و كاتبين انو حيتكلموا عن الخدمات البنكية و الخدمات الطبية و و و و ... الخ !يعني نفس الي قالوه في اليوم الإرشادي يبغو يقولو تاني يوم الربوع !!






و بس سلامتكم ،،

و سامحوني لو كان الموضوع مو في محله .. انا جديده شوية في المنتدى :(