[dhomi]

السلام عليكم ورحمة الله وبركاته
تحية طيبه مني انا اختكم في قسم علم النفس من كلية الاداب وكل اخت "طالبه " تهديكم هذي التحيه ..
عام دراسي موفق لكم ولنا بإذن الله..
بطلع من مصطلحات اللغه لانه ودي اتكلم بالعاميه واحسها اقرب لتعبيرات الي استخدمهااا
اخترت عنوان مشاركتي لاني من جد حابه اهديكم من هناااااا تحيه ...وبعد اضفي نوووع من الترفيه والمأساه الي نواجهها من يوم مابدءت الدوره التأهيليه

ـــــ
الم والاهم // تفضلتم علينا نحن طالبات الانتساب بإقامة الدورات التأهيليه لدعم الطالبات ومسانده منكم ...برغم انه لسنا كاطالبات مجبرات على الحضور..
ولكن لحرص الطالبات واكيييد عددهم لايستهان فيه في فهم المواد ..يتحرون"ينتظرون" وقت الدورات للحضور...
المفاجاءه الكبرى لنا عند حضورنا بعد ترم صيفي كامل او بالصح من ايام الاختبارات.. الصيانه في بعض المباني مااكتملت ؟؟ليش ؟؟
وش كان المانع عسى خير

المهم وبعد الاهم ...وش قصة الجداول الي ماراح تخلص كل ترم نحوس نفس الحوسه ...يعني راح وقت المحاضرات ونحن لانزال نعدل في الجداول ..
. اما بسبب ضيق الشعب الي مازالت خلال الدوره كل يوووم تتوسع ..
..او بسبب ضيق وقت الاخوات الاستاذات الي ماسكين الحذف والاضافه ..
او بسبب قفل النظام يوووم نكون في بيوتنا والعطل الي يحصل في الاوديس الكريم
وهناك اسباب كثيره ...
لو تطلعون وقد اطلعتم على مناظر الطالبات ومنهم امهات وقد يكن حوامل وهم يتكرفسون فوق بعضهم للحصول على ارقام لتعديل الجداول ....""وكأننا في مقصف مدرسه للفصول العليا من رابع وانتم فووووق"" القوي ياكل الضعيف

................
اوكي ماابغى اطول بالجداول >>>>اعتبروا عدلنا جداولنا ...

الان بدء وقت الجد >>>وجايين متحمسين نبغى نستفيد من الوقت لعل نلم شتات المواد الي بالجدول وكلنا شغف كذلك للعلم والتعلم
وننصدم بما هو اعظم ^_* ""الداتا "" معطله نادوا الفنيات خلوهم يعدلون الوضع وهات من هيك حكي >>>واخيرا تتوصل الفنيه الى اختيار قاعه شاغره لقضاء ماتبقى من وقت المحاضره
ـــ
والا يجيكم العلم الحلووو " بكل ثقه بالنظام ""فجاءه يضرب فايروس لفلاش الدكتوره ..ويروح عرضنا اليوووم كله ببلاش ... يعني لو جلستي مع عيالك في البيت او امك الي تحتاجك كان ابرك

ـــــــــ
طبعا ماذكر فوووق يخص الماده العلميه وش تجد من صعوبات حتى تصل لنااااا ...بس مو دايم تحصل لانه في استاذات يتداركون الوضع ويتصرفون
......
غير التكيييف الي منتوا عارفين حنا بالصيف اوووو بالشتاء
اول يووم كنا مصيفين وياحلاتنا واليوم الثاني يالطيف مابقى جاكيت او بطانيه " شال" الا واخذناه احتياط ؟؟ ومافي فايده
افكر بكره اجيب لي كيس احتياطي "" اجيب بنطلون قطن "" لانه وصل البرد من اخمص قدميه لااعلى الدماااغ
او يمكن اسوي لي تشحيم وادهن نفسي بالفازلين من فوووووق لتحت احسن لي >>>خبره بتشحيم السيارات

وياليت نلاقي ماكينة الكوفي تشتغل ..تبلع الريالات ولاتعطيك كوفي >>>>للاسف كل هذا وحنا من الظهر مافطرنا ولاتغدينا ولاتعشينا يعني الدماغ وولد عمه المخ ...متيبس او مصدي !!! كيف نستفيد من المحاضره وحنا كل تفكيرنا نبي شيء يدفينا اذا ماكان المكيف يتخفض نبي شااااااااي كوفي
ـــــــــ
بتقولون ياستي في كافتيريا نروح نجيب منهاااا شاي وساندويش او كوفي والي تبغين !!!

اوكي انا معاكم مااختلفنا فيه كافتيريا بس وينهاااااااااااااااااااااااااااا في اخر الجامعه تبعد عن المبنى الربع ساعه ركض او تضاربي البنات عشان تشتري وتلحقي المحاضره ...والا تلحقي تصلي وترجعي تلحقي لايفوتك شيء من المحاضره
ــــــــــــــــ
احبتي هذا الكلام حاصل معانا ... ونعاني منه معاناه
الا يحق لنا نحن كاطالبات نتلقى المحاضره والفائده في جو من الراحه والاستقرار ؟؟
والا برأيكم كيف نستفيد من هذا الوقت الي سخرته الجامعه الكريمه لطالبات الانتساب والخدمات غير متوفره ؟؟؟
الوقت غالي علينا وعليهم ...هم من الصباح الدكاتره شغالين غير الفنييين ..
وحنا تاركين مسؤلياتنا وعيالنا ومرضانا عشان نستفيد اكثر وهذا من باب الحرص
لانه لو توفرت لنا الفرص الافضل كان نافسنا الاخوات في الانتظام ...
ــــــــــــ
طبعا كله كوووم وهذي الملاحظات نراها من كم ترم وتتكرر
والكوووووم الثانيالمضحك المبكي ...ندخل القاعات للاسف في قمة الوساخه ""زباله بالهبل""
ليش؟؟ وين النظافه ....هذي الملاحظه للامانه فقط لقيتها هالترم بس ...جدا شكل القاعه مقزز اكياس واشياء مكبوبه في الارض والزبايل يالطيف لطفك يارب وكنت اتمنى ادعم هذا بالصور
>>>>بس ماني حامله جوال كاميرا والا كان سويتهااااا اليووووم ممكن تفيد وتأكد بكلامي الاخوات الي حضروا محاضرات بـ420 وكيف كان شكل المبنى وكيف كانت دورات المياه ؟!!!!

ــــــــــــ
يعني بذمتكم كيف الواحد يرتاح كذا ؟؟ واي معلومه تجي بهالطريقه وانتي قرفانه من المكان الي جالسه فيه ؟؟؟
هو عاملات النظافة جالسين بس كذا ....مانبي نقطع ارزاقهم بس مااشوفهم الا جالسين يأكلون طيب كلوا ياعزيزاتي بس قدموا خدامتكم
ــــــــ

بصراحه لاحظت وممكن يلاحظون معي خواتي انه الاهتمام من الجامعه بطالبات الانتساب جدا قليل من ناحية الراحه خلال انعقاد الدوره التأهيليه ...
يعني انتوا تجملتوا معانا ""فكملوا الجميل ""

الاستاذات وعشان اكون منصفه معامتلهم اكثر من رائعه ...ويعاملون بكل اريحيه ويحاولون يقدمون لنا من خلال هالوقت الفائده الكبرى ...فالاستاذات ماعليهم اي ملاحظه والشهاده لله وربي يجزاهم كل خير..
ــــــــ

وهذا كل ماكتبته مو من طالبه جايه الجامعه تتسلى او تقضي وقت فاضي ...
من طالبه ومثلها كثير تركت مشاغل واولاد في حاجة لرعايتهم وكمان اباء مسنين في امس الحاجه لهم ............ يعني بالعربي الوقت مهم وغالي غالي غالي بالنسبه لهم ... ولا نقل اهميه في حرصنا على العلم او التعلم ..ولكن قد تكون ظروف الحياة حدة من تواجدنا في مقاعد الانتظام وليس كما يعتقد البعض "نسبهم قليله او لتمضية وقت الشغله جت بالصدفه ""
ــــــــــــــــ
هل ياجامعتي الكريمه يصلك صوتناااااااااااا من خلال هذا الصرح الذي نثق فيه
هل يهمك ياجامعتي مدى تطور العلم ؟؟؟ وهل من الممكن تنظري لتطوره من خلالنا ..؟؟
هل ياجامعتي من الممكن اجلس في قاعة محاضراتي وانا مرتاحه ؟من كافة النواحي؟؟

لااطالب بالملائكيه والاعجاز في ذلك ولكن اقلها نجد اقل من هذا وذاك مايسدي لنا حاجتنا
مكان نظيف ..كوفي شوب في سنتر كل مبنى ..
ــــــ
اتمنى تفهم رسالتي بنظره ايجابيه لتحسين والتغير وان كان من نقد فيما كتبت فليس في ذلك حرج
كل مافي الموضوع رساله اتمنى تصل لمن يهمه الامر لرقي بجامعتنا ..فكم اعتز وافتخر باانضمامي لها...
واعتذر اذا كان فيه سوء في التعبير او خطأ فيما كتبت والله من وراء القصد
ـــــــ
ابنتكم /..........ام دحوووم