[وفاء جدة]

السلام عليكم ورحمة الله وبركاته...

عبدالعزيز بالاستراحه .. بين اخوياه يلعبون بلوت ..
وهذولي يسولفون وذوليك يلعبون بلاي ستيشن
رن جوال عبدالعزيز .. طلع برى .. طوّل وهو يكلم
احمد : وين عبدالعزيز
العيال : شكله .... خخخخخخخخخخخخ ( يعني يغازل اللهم عافنا )
( بكل بساطه تصير .. كل واحد حطه بذمته )


××××


ريما تلبس عباية كتف رايحه زواج ..
وذاك اليوم ستايلها تقريبا لبس قصير شوي
البنت من اطهر مايكون ومن اعف مايكون ..
لكنها وهي طالعه شافها خالد خوي اخوها تركي ..
..
خالد : الووو
عبدالله : هلاا
يسولفون . فجأه شطح خالد
تصدق شفت اخت تركي اليوم لابسة لبس اعوذ بالله
ياخي مدري وشلون يسكت عنها ذا الزلابة اخوها
شكلها راعيه غزل وتطلع مع شباب
( حطها بذمته علطول )


××××


محمد صاحب مركز وظيفي متوسط
له تجارته الخاصه واللي مايعلم احد فيها .. مؤسسه صغيره على قد حاله
اثبت نشاطه وترقى وظيفته لين مسك مدير عام .. ومشت احواله بالمؤسسه
فتح ربي عليه الرزق .. ورست عليه مناقصه حلوة .. وضبطت اموره الماديه
صارت سيارته المانيه << -- همااه خخخخخخ .. وسكن في قصر
قالوا ايييييييييه هذا الي سرق الله لايبلانا .. مسك مدير ..
وصار يسرق من حلال الدولة
( وكلن حط بذمته .. والرجال مايوكل عياله الا حلال )

××××

عضو نزل موضوع مشترك مع عضوة مثلا .!!
او نزل خبر عن فلانه .. والعكس صحيح
يجونك نص الاعضاء اللي تفكيرهم مدري شلون قايل
اووه وش بينهم اكيد انه يعرفها اكيد خويته
اكيد اكيد .. وغسلوا شراع هالاوادم وهم منسقين الموضوع
بالرسايل الخاصه او بطريقه او باخرى بحدود الادب والذوق العام
( وطبعا الذمه وسيييعه مرره )

بعض من المواقف اللي تحصل لنا فى مجتمعنا
ومنها الكثير والكثير ...
الذمة هذه رفعها الإسلام ,
كما في المأثور عن عليّ بن أبي طالب رضي الله عنه "ذمتي بما أقول رهينة وأنا به زعيم"
إذن فصاحب الذمة أقرب إلى أن يكون رهينة لا مُرتهِنا،
والذميّ الداخل في الذمة داخل في الحرمة، أي الحرم أو الحرام.
الكل منا يعرف ان الدخول فى الذمم نوع من انواع( الغيبه)
ومحد فينا يرضى الغيبه على نفسه ,
وانتم عارفين الايه الكريمه


قال تعالى :
{يَا أَيُّهَا الَّذِينَ آمَنُوا اجْتَنِبُوا كَثِيراً مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا
وَلَا يَغْتَب بَّعْضُكُم بَعْضاً أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتاً فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ }الحجرات12


وفي الاونه الاخيره كثرو الناس الي يبيع ذمته
ويتكلم في ظهر فلان وعلان ولا يبالي بلي جالس يسويه !!
هالحين
ليش الناس بدات تتكلم ؟
وليش كثر هذا الشي بين الناس ؟
وش الهدف من هذا الشي ؟
وليش الناس تستهين في هذا الشي ؟
تعليقاتكم ومواقفكم والاحداث الى صارت او الي مريتو او سمعتو عنها