أختي / وحدة من الناس..
الله يفرحك يارب بنتيجة ترضيك وتبسطك يارب..
بس ممكن تفيديني الله يسعدك:
أنا رحت المركز الثقافي السعودي وسجلت من عندهم مباشرة أعطيتهم الألف وهم سجلوا لي وطلبت على يوم الأحد 21 نوفمبر وبعدين كلموني انو راح يخلوني يوم 27نوفمبر اللي هو السبت الجاي وقلت لهم طيب ، قبل أمس وصلني ايميل لكن الموعد خلوه يوم 28 يعني الأحد وخلوا مركز الاختبار في كلية البترجي في أبحر الشمالية وأنا طلبت عندهم في المركز..فدحين ايش اعمل؟؟؟وهل ممكن لومافي امكانية انهم يعدلوا لي انهم يرجعوا لي فلوسي لأنو الغلط منهم؟؟
كمان كيف من الايميل أقدر أدخل على البروفايل تبعي؟؟
وكمان الله يسعدك ممكن تقولي لي قسم الكتابة كيف ممكن أستعد له ؟؟ يعني هل في جمل عامة ممكن أحفظها وأكتبها في البداية؟؟
الله يسعدك اشرحيلي أكثر عن الاختبار وايش جاء فيه؟؟
والله أبدا ماراح أنساكي من دعائي في ظهر الغيب لك..
وربي يرفع قدرك في الدنيا والآخرة ويعطيك حتى يرضيك ياااااااااااارب العالمين..
|
تسلمي على الدعوة الحلوة يارب يجعل لك منها نصيب
المركز الثقافي السعودي مرة خدماته متواضعه كل مرة اتصل فيهم كل وحدة تجاوبني جواب مختلف عن التانية الأفضل إنك تكوني وراهم وتتصلي فيهم وتلحي عليهم في الأسئلة وتطالبي بحقك إذا ما تحبي تختبري في البترجي قبل ما يسجلوكي وتروح الألف, حاولي تدبري نفسك عشان تروحي كلية البترجي وتختبري فيها امكن تكون احسن وأريح وخدماتها أرقى, هادي وجهة نظري في المركز لأني طلعت عيوني منهم تحسي يمشو امورهم بالبركة ماعندهم نظام
بالنسبة للبروفايل تبعك أطلبي من المركز اللي سجلك الباس وورد واسم المستخدم وادخلي موقع التوفل
http://www.ets.org/toefl/
في أعلى الصفحة من اليمين تلاقي عبارة MY TOEFL iBT ACCOUNT أعملي عليها كليك وسجلي اسم المستخدم وكلمة المرور وكدة بتلاقي نفسك في صفحتك الشخصية اللي فيها كل بياناتك واكيد راح تلاقي رابط فيه نموذج لإختبار التوفل, بس صراحة كان النموذج مرة صعب بصراحة احس الإختبار اسهل بكتير, لا تخافي إذا ما عرفتي تحلي بس انت افهمي طريقة الإختبار
بالنسبة لقسم الكتابة أنا ما اتدربت عليه نهائي , معتمدة على حصيلتي اللي درستها في المعهد ومع كدة مرة كان سهل في نظري, السؤال الأول كانت قطعة بتتكلم عن الحياة في كوكب مارس وعليها سؤال واحد مطلوب منك تحليه في 150 أو 200 كلمة خلال15 دقيقة او 10 دقائق والله اعلم, الإجابة تستنتجيها من القطعة اللي قدامك
وسؤال تاني كان المطلوب فيه أكتب رأيي في طريقة صرف الوالدين على أولادهم, ما أتذكر تفاصيل السؤال وكان خلال 20 دقيقة مطلوب منك تكتبي 300 كلمة, تحتاجي تدربي على الكتابة على الكيبورد على الأقل أربعة ايام تلاقي نفسك اتطورتي, فقرة الكتابة عليها 30 درجة لو عرفتي تجيبيها كاملة لا تشيلي هم باقي الإختبار
بالنسبة لباقي الإختبار اول شي حتكون مجموعة قطع ثابتة تقرئيها وعليها مجموعة أسئلة وكل سؤال محدد مكان اجابته من القطعة عشان لا تتوهي, لكل قطعة زمن محدد لازم تخلصيها فيه وأول ما يتبقى لك 5 دقائق من زمن السؤال حتلاقي الساعة بتومض عشان تاخدي بالك من الوقت اللي متبقي وتحلي باقي الاسئلة
قطع القراءة تقريبا تعتبر اطول سؤال في الإختبار
السؤال اللي بعده مجموعة محادثات ومقالات علمية, كل ما تخلص محادثة حيكون في سؤال عن مغزاها يعني مثلا حيسألوكي إيش كان الطالب بيطلب من البروفيسور في المحادثة ويعطوكي 4 خيارات, ويعيدو مقطع من المحادثة ويسألوكي إيش يقصد البروفيسور من هذي الجملة
السؤال الثالث حتسمعي محادثات مثلا بين زملاء في الجامعة بيتكلمو عن مشكلة واجهتهم وبعدها عدة أسئلة عن المشكلة وعندك فرصة 30-45 ثانية على ما أذكر لكل سؤال والله اعلم تجاوبي من المايك تبع السماعة
في سؤال تربطي بين مقطع تقرئيه ومحادثة تسمعيها بس ناسية التفاصيل
السؤال الرابع هو سؤال الكتابة اللي اتكلمت عنه اول شي
عموما لا تخافي ماهو صعب لدي الدرجة لا حد يخوفك خليكي ريلكس وانت تجاوبي
سجلي في دا الموقع وحاولي تجاوبي على الأسئلة وانت كدة حتكوني رايحة على بصيرة ان شاء الله
http://i-courses.org/?p=sample_tests&rmsg=1about:Tabs