رد: يوميات....^_________^
سلام عليكم
كيف حال الجميييع وكيف الدراسه ان شاءالله الامور تمام
انا يومي كان في المؤتمر حق الجراحه شي ممل جدا ماعدا الجزء الاخير كان شويه فيه حالات عرضها دكتور مشاط يعني اتحمسنا شويه
الاكشن كان يوم الجمعه يوم كنت مناوبه في قسم الولاده -كل الاكشنات في المناوبات-
طبعا كان تاني يوم ليا في قسم النساء والولاده ولسه مااعرف ايش السالفه وكيف الشغل
اول مادخلت ..الدكتوره: يلا يابنتي تعالي الحرمه بتولد ..وعلى بالي قصدها تعالي اتفرجي زي سنه سادس والاخت تقولي يلا غيري والبسي الجونتي..وانا انواع الذهول..المهم عبال ماالاخت تلبس طلع الولد(مستعجل الاخ عالدنيا)قلت بكل براءه لااااا خليه يستنى<<دوبها فاقت اختنا ...طبعا الكل فرط علي ضحككك والحمدلله لحقت اطلع المشيمه(ماكانت مستعجله) وعملت خيااطه هع هع هع
الحاله الثانيه كانت توأم ..وكنت مستعده من قبلها وجاهزة للاستقبال الحمدلله
ولدنا الاول الحمدلله واخدت البيبي ورحت اتفرج عليه واتامل ونسيت التاني ..شويه الاقي الدكتوره تقولي استلمي الاخ التاني .. مااتوقعت يطلع بسرعه كدا ..دايما اسمع التوائم يقولو انا اكبر منه بخمس دقايق ..احسب السالفه من جد ..واثاري الاخ الثاني مستعجل كمان ..
وطبعا كان في وحده ولدت في الطوارى مالحقنا نطلعها ولانوصل لها بس الحمدلله
كان يوم مرهق جدا جدا
وسط دا الاستمتاع كله ..كنت اطالع في وجه كل ام وحالها وهي تولد ..سبحااان الله شي عجيب ..تحس من تعابير الوجه مقدار الالم والمعاناه ..ومنهم اللي تمسك يدي وتتعصر انا يدي مو متحمله مسكتها .. احس كانه احد بيخلع روحها وقت الالم ويرجعلها هيا ثاني!!!
الله يأجر امهاتنا ويبلغنا رضاهم عنا
|