إحنا كمان جاتنا عجة ورياح قبل المطر
يا جماعة الخير اليوم سار لي شي مو في الحسبان والحمد لله أنعم علي وسترني فله الحمد والمنة
تخيلوا أنا كنت مع واحد من الأفارب في جامعة الملك عبد العزيز عشان هو يختبر قياس المهم إلا وحول 10 الجو سار عج تراب ورياح شديدة إلى متوسطة وحول 11 إلا والبروق القوية والرعد يخوف وزخات المطر كأنها رصاص لقوة الرياح الشديدة على جسمك تخيلوا من بوابة المبنى إلى السيارة أمتار بس لما تمشي ما تقدر تكون واقف ولا تقدر تتنفس من قوة الرياح والمطر تخيلوا انسدح بين سيارتين جنب بعض عشان اقدر اتنفس لأواصل سيري متجه لسيارتي لا يقل عن 10 دقائق والمسافة أمتار بسيطة.
تخيلوا عشان أروح من الجامعة لمنزلي بحي الصفا من 11 إلا ربع إلين 3 ظهرا بينما الوقت في الخط السريع في الظروف العادية ما تتعدى 10 دقائق. وأنا في شوارع جدة الغرقانة بسيول وسيارات خربانة معطلة العالم وسيارة في ظهر سيارة يسبحون السيل واصل فوق الصدام للسيارات الصغار والكبار على الشكمان والله يعينهم.
مشاهد :
- شباب ما همهم إلا التصوير هههههههههه أنا نسيت الجوال ولا كنت منهم.
- مصري معصب بسيارته ويصيح وين الفاسدين بجدة سرقوا أموال الدولة ليه ما يسوو تصريف ؟؟
- خط الحرمين السريع (مع ساهر خط الحرمين البطيء ههههه) مغلق وسمعت إشاعة أن أحد الكباري طاحت . ما أتوقع.
- جسر الميناء بعض أجزائه مغطى بالمااء !! طيب هذا جسر ما فيه تصريف ؟!!
- شوراع غرقانة والقادم أحلى
- المطر تقريبا أقل من ساعتين وعمل عمايل أجل لو كيف مثل العام 6 ساعات كان راحت أرواح وممتلكات والله لطف بنا.