سلام بنــــــــــآآت
مبروك للناجحين و الله يعوض كل بنوتة حملت مادة بدرجة طيبة المرة الثانية
نصيحتي لكم .. أنا قريت كثييير كلامكم وكل وحدة تتكلم وتقول رأيها وهادا حقها لكن رجاء محد منكم يتأثر ،، تره هنا تصير المصايب .. ممكن تخسري سنة كاملة ويتأخر تخرجك بسبب كلام البنات ..
كل بنوتة تتكلم من خلال تجربتها و قدراتها كمان
كل وحدة تختلف عن الثانية .. رجاء محد يتأثر
أنا المفروض اتخرج هادي السنة .. بسبب النصايح : لا تاخدي مع دي الفلانة
ولا تجمعي دي المادة مع الثانية و غيرو .. اتأخر تخرجي (سنة كاملة)
كل وحدة تشوف ظروفها وكل وحدة فينا عارفة قدراتها
و تعرف قوة تحملها و تعرف مستوى لغتها
*
*
فــ بلاش أي نصيحة سلبية ، أي رأي سلبي ، أي ذم بأي أستاذة
الأستاذة اللي انتي بتذميها غيرك بيمدحها
المادة اللي حملتيها غيرك نجح فيها وهكذا !!
*
*
مارح أتكلم عن موادي اللي حأضيفها الترم الجاي
لأنو احنا الانتساب مو بكيفنا .. اخاف اجهز نفسي و موادي وأتفاجأ بــ (التعارض)
فأنا طريقتي الإستخارة أولا وأخيرا
بالنسبة لبعض المواد اللي أخدتها هذا رأيي البسيط وكل وحدة وقدراتها
1- مورفولوجي مع منى صابر
المادة ذاكرتها خلال 5 أيام بس .. المادة بسيطة وخفيفة و موجود ملفات بوربوينت جاهزة من صفحة الأستاذة نفسها تحملوها، بالإضافة إلى الملزمة الكتاب المصور .. موجود فيه تمارين وأجوبة في الخلف وأيضا ملزمة كاملة فيها تمارين انتي تحليها وموجودة أجوبتها في الخلف برضو
يعني باختصار لطالبة الانتساب تقدري تذاكريها قبل الدورة الـتأهيلية براحة كاملة
حيصعب عليكي الباب الأخير شوية بس .. فما المانع انك تطلعي عليه أو تأجلي مذاكرته وتكتبي ملاحظاتك
عشان تشرحها و توضحها لك مس منى أثناء الدورة
الاختبار كان حلو وجبت فيه درجة جيدجدا لكن غلطتي اني مافتحت ملزمة التدريبات ودربت نفسي شوية
كنت أخدت ممتاز والله .. لكن خلاص مقدر ومكتوب ماينفعش الندم خالص
2- السيناتكس مع خولة زهران
الأستاذة عسل و شرحها لايعلي عليه ما شاء الله
ذاكرت المادة خلال 6 أيام بس كل يوم شابتر وكل شابتر 10-12 ورقة
اذا كنتي طالبة سريعة الاستيعاب وعندك صديقة أو اي احد من المنتدى تسأليه وجاهز يجاوبك
فما في أي مشكلة تذاكريه قبل الدورة لكن لازم يكون معاك أحد زي ماذكرت لأنك محتاجة شوية نصايح
وأنا جاهزة أستقبل أي سؤال عن دي المادة .. الحمدلله جبت ممتاز فيها
البنات كان يقولو انها مادة ثقيلة دم و تحتاج تركيز رهيب
و أنا شفت المادة حلوة واستمعت فيها وصح تحتاج تركيز لكن مو هالشيء اللي يخليكي تخافي منها
3- السيمانتكس مع خولة زهران
للأسف المنهج الجديد دسم و طويل جدا يعني لمن تنزليها لازم تذاكريها في شهرين مو بس بأيام. حلوة لكنها دسمة جدا و تحتاج وقت حتى تدخل المعلومات وتتثبت لكنها ممتعة والله. لو صار وأحد نزل السيمانتكس مع السينتاكس ياليت لو تبدئي تذاكري السينتاكس وتخلصيه بعدين تبدئي في مذاكرة السيمانتكس لأن المادة تعتمد على بعض المصطلحات من السينتاكس لازم تفهميها وتستوعبيها اول عشان ماتضيعي.
4- الدراما مع الدكتور عمر باقبص
المادة هادي مثل السيمانتكس والفيكشن تحتاج وقت يعني ماينفع أسبوعين مذاكرة مستحيل
أكبر غلطة يسووها البنات يرمو نص المسرحية ويقرو تحليل المشاهد وتجيهم أسئلة كوتيشن .. محد يجاوب !
ثاني أكبر غلطة لجميع طلبة الانتساب (الكتابة) لازم اياديكم تتعود عالكتابة .. يجي الاختبار مقالي كله ويضيع الوقت إما بسبب بطء كتابتنا أو عدم التعود على الكتابة بمعلومات مرتبة والأهم الاخطاء الإملاية والقواعدية. وأفضل طريقة لمذاكرتها تقطيع المسرحية مشهد مشهد والتدريب على كتابة التحليل اكثر من مرة ،التركيز على تفاصيل المشهد بكتابته على شكل نقاط وحطي في بالك المسرحيتين لغتهم قديمة .. لاتنصدمي وتسويلي من نفسك مسكينة
استعيني بالله وأبدئي من بدري .. ولاتخافي و أهم شيء هادي المادة بالذات مليان لها مراجع وأسئلة من كل الأشكال والألوان.
مفتاح النجاح في دي المادة .. ثبيت المعلومات على شكل نقاط وتحويلها لبراغرافات. اتعودو عالكتابة من دحين
*
*
الشيء اللي اندمت عليه اني ما أخدت معاهمفونتكس وفونولوجي و السبب مقدمة في الأدب
كل وحدة فيهم 4 شابترز وعاملين زي حكاية السينتاكس والسيمانتكس يعني لو نزلتي المادتين مع بعض ذاكري الفونتكس وخلصيه وأبدئي في الفونولوجي
لو نزلتي السينتاكس والسيمانتكس مع بعض .. نفس الحكاية
*
*
بنات كل وحدة تقوي قلبها ولا تخاف من المواد
احنا نخاف منهم وعندنا رهبة كبيرة لانو ماذاكرناهم ولا حتى نعرف محتواهم والله يرحم أيام زمان لمن كنت اخاف من المورفولجي والسيناتكس
أعرف بنت جمعت الفونيتكس والفونولوجي وماشاء الله نجحت لا اتشوشت ولاحصلها حاجة
أعرف بنت نزلت الشعر والنقد والسيمانتكس والفيكشن والدراما ونجحت فيهم كلها ما شاء الله
لاتسمعو .. لأي نصيحة بنت
لا تسعمو .. لأي نصيحة أستاذة أو دكتورة
قبل
قبل
قبل
قبل
قبل
ماتسمعي صوت نفسك .. صوت قدراتك .. صوت استيعابك !