[mashmawi]

المشاركة الأصلية كتبت بواسطة Rayan صحيح جدة غير بشوارعها المكسرة ببيارتها الطافحة ببحرها ال.......؟ بأسعارها النار بطرقها المقفلة نصها

1- يا اخ ريان لاتسخط على جده لان التكسير في خير وهو اما انو ماسوره مويه انكسرة او كيبل تلفون او كهرباء حصل فيه خلل وهذي خدمه بيعملوها لينا بس صحيح انهم بيتأخرو في الانتهاء من المشاريع وهذا مو ذنب اهل جده لأنو اهل جده مو هما الآ بيحفروا هذي الشركات الي اختارتها البلديه.
2- بيارتها الطافحه برضو مو زنب اهل جده ان هي مدينه ساحليه وتعوم على مياه البحر والبلديه برضو هي اللي تقدر تنهي هذي المشكله بعمل الصرف الصحي واهلها برضهم يحبوها..... بعدين دي كويس انها بتشيلي بيارتكم يا أخي يعني زي الام لمن تشيل من تحت طفلها .وعلى فكره عملوا حوالي خمسه محطات معالجه مياه الصرف الصحي عشان يسقو بها الزرع .
3- ببحرها ال .......؟ هذي ما عرفتها كان وضحت عشان ارد عليك ... لكن بسيطه مو لازم تروح البحر اذا كان البحر مو عاجبك سويلك مسبح في البيت ولا تسخط على جده لأن قد ما تقول اهلها طيبين ويحبوها قد عينهم .تحب اشور عليك روح عيش في مدينه ثانيه وانت بعد شهر تجي تجري وتبوس ارضها اللي فيها البياره وتقول قابل بيك وبياراتك .
4- اسعارها النار انت عارف البيع عرض وطلب والشي الى انت شايفو غالي عليك ادلك على سوق الميناء وسوق البلد وسوق الصواريخ روح من هناك واشتري اللي انت تبغاه مو لازم تشتري من الاماكن الغاليه وسبب ارتفاع الاسعار محكم موقعها الاسترتيجي فهي بوابة الحرمين قديما وحديثا وهذا هو سبب غلاء العقار بها وبالتالي عشان التاجر يسدد قيمة ايجار المحل يرفع سعر البضاعه وبالتالي توصلك البضاعه غاليه .
4- طرقها المقفله انا عرفت تقصد ايش قصدك شارع الستين وهذا بسبب المشروع اللي يحخلي اللي ساكنين في حي الجامعه يوصل البحر في خلال 6 دقائق بدل من اكثر من 25 دقيقه سابقا وبعدين عشان الجامعه وسبب الزحمه الي كانو الناس يعانوها من زمان الاب يوصل بناتو في فصل الشتاء والشمس لسه ما طلعت وبعدين إن شاء الله ما حيجي الحج 1426هـ والطريق شغال وتشوف السيارات في هذا النفق وتعرف انوا بيحاول المرور يعمل حلول لزيادة الحركه في المدينه والخير في اوله والجاي اكثر بس يا اخ ريان الصبر طيب وانت حتشوف جده في احلى صورها...... وعشان انت الظاهر مو من اهل جده الصبر عندك قليل وبتعيب فيها لكن في مثل عند اهل جده يقول البناء مو زي الهدم وهنا يقصدوا ان البناء يأخذ وقت ولكن العبره في الاخر .
شكرا على سخطك على جده عشان خليتني اوضحلك ان هذا كلوا في الاخر خير بأذن الله .
وانا برضوا جــــــــده