[No murcy]

بدايةً احب اشكر الأعضاء اللذين ساهموا في ايصال مطالب طلاب الأنتساب الى المسؤولين بالجامعة.

ماراح اطول عليكم وراح ادخل في صلب الموضوع .

لاحظت بالفتره السابقه ان الكثير من طلاب وطالبات الانتساب يقومون بشن حملات لارسال ايميلات الى اعضاء هيئه التدريس والمدراء والمسؤولين بالجامعه لمواضيع او مطالب لاتستحق كل هذا الزخم والهيلمان ,وطبعا في ناس ماتصدق خبر وترسل على مواضيع لاتستحق المراسله (تحصل الشخص يقول بارسل ايميل ان جاب نتيجه والا ماخسرت شي) وطبعا هذا اكبر غلط ويعتبر سوء استخدام لوسيله اتصال قد نحرم منها .

اقول لكم ليش الغلط , لأن اعضاء هيئه التدريس لهم صلاحيات كثيره وليس من حق اي مدير او مسؤول بالجامعه التدخل فيها , من ضمن هذه الصلاحيات هي اختيار كتاب الماده والمراجع المسانده وحذف بعض الأجزاء من الكتاب .

طبعا بما ان الشباب ماقصروا, مئات الايميلات توصل الجامعه, حتى مدير الجامعه وصل له حقه منها, وذلك انعكس سلبا على هيئه التدريس لأنه تم لفت النظر اليهم من قبل مدير الجامعة وذلك بسبب ايميلات طلاب الانتساب .

هذه الاحداث سوف تنعكس سلبا على طلاب الانتساب , كيف؟

اولا:لما تشوفون مفردات المواد اللي نزلت للمستوى الرابع, مالاحظتوا انه لايوجد فيها اي درس محذوف !؟

ثانيا:كتاب جديد لماده اداره العمليات , وهذه الماده معروفه بصعوبتها , ولكن الصعوبه زادت بسبب ان الكتاب جديد وطبعا لايوجد اسئله اختبارات قديمه له ولاراح نعرف كيف راح تجي طريقه الأسئله عليه. لا ادري عن ماده المحاسبه الاداريه واساسيات الاداره الماليه لكن متأكد ان مدرس الماده جالس يبحث عن كتاب جديد لها , وراح يكون الوضع بالمادتين هذي مثل وضع ماده اداره العمليات.(لاتنسون ان كللها مواد علميه يعني صعبه)

ثالثا:الأختبارات : انا لا اريد ان اسبق الاحداث لكن أتوقع أن تكون الأسئله تعجيزيه على طلاب الأنتساب وسوف يتمنى الواحد انه ينجح بالماده فقط ولاراح يهتم من الدرجه من صعوبه الاختبار .

وكل هذا وللأسف يعتبر رد من هيئه التدريس على طلاب الانتساب وشكاويهم الكثيره اللتي ليس جميعها يستحق المتابعه.

هناك موضوع واحد فقط يستحق المطالبه به ولكن الكثيرين غافلين عنه والوقت يسرقنا, هو موضوع التخصصات.

ياليت شفنا حملات وايميلات على موضوع التخصصات لأنها من وجهه نظري اهم بكثير من موضوع مفردات المواد او زياده الساعات .

واخيرا هذه وجهه نظر تعبر عن رأي صاحبها فقط . واذا كتب لنا في هذه الدنيا حياه سوف ارفع الموضوع هذا مره أخرى وقت نزول نتائج الاختبارات للمستوى الرابع وراح تقولون فعلا كان صادق بكلامه .

وأشكر جميع الاعضاء على مجهودهم الملموس في مساعده الطلاب وتبسيط الامور لهم وعرض كل ماهو مفيد لدراستهم .

اتقبل النقد بصدر رحب وانا بالاخير منكم واليكم ....

أخوكم \ عبدالله