[البرق الاصفر]

قريت الموضوع باكمله تقريبا وطبعا نسيت ايش كان مكتوب لول
مابي اتفلسف ولا مدري ايش اكون بس بقول اللي في مخي حاليا
من العنوان افهم من كلمة " أرجوكم " ان صاحبة الموضوع تبدي رأيها فقط وبانفعال للكل على انها ما تسمح احد يتكلم عن الجامعة فلو كان العنوان بدون الكلمة دي اعتبره هجوم على الكل انهم يسكتو ويا تتكلم بالحلو او خلي البطال لك.
انا شفت الظلم وسمعت عنه وما اعتقد انه الطالب حيتكلم عن مدرسه افتراء غير انه حاب يفضفض يمكن يرتاح نفسيا. اكيد الكل عارف انه كبت الزعل والهم مو كويس للصحة <<<<< لسه ما دخلنا في الطب خخخخ

وجهة نظري هي

الله يسامح كل اللي ظلمني في الجامعة لاني بصراحة مو مستعد اوقف وقفة طويلة يوم الحساب بسببهم وربنا كفيل بهم دنيا واخرة. تضايقت وزعلت كثير ويا كثر القهر اللي مريت فيه بس على فكرة تقليب المواجع ما يغير شيء. يعني لو جلست ادعي على دكتور او اسبه واشتمه و و و ياترى حتتغير الدرجة ؟ أنا ما اقول الواحد ما يفضفض بس كمان ما تصير حلاوة على لسانه كل ما حب يفتح موضوع يتكلم فيه. ولكن لو تم فتح مجال للحوار والنقاش على كلللللل شي في الجامعة ( طبعا حوار ونقاش مع فايدة مو بس فضفضة وياخذونا على قد عقولنا ) وقتها اقول كل اللي عندي بس بادب واخلاق. ولا ننسى هي كلها فترة وتمضي يعني نصبر والصبر مفتاح الفرج وبعدها نرتاح. ان ما ارتقت الجامعة بسبب مشاكلها الداخلية فمع نفسها في الاخير ان ما كان ودهم يصحلو وضعهم فأنا في الاخير طالب جي اتعلم واخذ شهادتي ومع السلامة بشوف مستقبلي. بعد التخرج الجامعة لا تعرفني وانا اعرفها من ذكرياتها بس. ما انكر ولا ازال اذكر بعض الموظفين وبعض اعضاء هيئة التدريس اللي يدخلو القلب ويحطهم الواحد على الراس. ناس محترمة تقدرها زي ما تقدرك بس طبعا سبحان الله الدنيا زي الميزان كل شي وله عكسه تلاقي غرفة الدكتور الرووعة هنا وجنبه دكتور الله لا يوريك.

على كل دا رايي وكل واحد فيكم عبر عن رايه وياريت ما يتحول الموضوع من ابداء راي الى محاربة الكاتب.

والحمد لله الذي لا يحمد على مكروه سواه

-^.^-