[نسووومة]

السلام عليكم

روح حبيبتي كيفك اشتئتلك كل سنة وانتي طيبه . هادا اول شي

طبعا انا من قرن ماخشيت المنتدى ..بس دوبي دخلت لقيت موضوعك قلت ارد عليك ..


اولاً .. فيه حاجه لازم الجميع يفرق بينها وهي (الحجاب=تغطية الشعر.. والنقاب= غطاء الوجه)

يعني صراحة انا مستغربة للناس اللي يقولوا هادا يقولك شيلي حجاب حرام ماقال كده .. هادي تعتبر جريمة اصلا ازا سواها لأن الحجاب فرض زيه زي الصلاه وباقي الفروض ..

تانيا .. طبعا ماله حق يطلب دا الطلب .. لكن دامها شركة خاصه فكل واحد يبى موظفينه على مزاجه ..

ثالثا .. اقولك حاجه .. دا الانسان مستحيل لو كان في اي دولة تانيه انو يقول دا الكلام تعرفي ليش ؟؟ عشان هناك اللي يبى يلبس الحجاب بيلبس (عن اقتناع مو عشان البلد او الاهل) ودا اختلافهم عننا (البعض وهم نسبة ظاهره) فأصلا خلاص معروفة المحجبة اصلا مستحيل طرحتها تتفسح من على راسها ولا يبان ربع شعره من شعراتها .. والمنقبه نفس الشي مستحيل تشيل النقاب (مو زي هنا المنقبة لما تروح مطعم تكشف) او قدام السواق او بالسياره تكشف ..طبعا الا مارحم الله ...

فالراجل دا مااضع كل اللوم عليه .. لأنه عارف انو فيه ناس بتقبل بدا الشي .. لان هدي القضيه عندهم ماهي جوهرية واساسيه وحياة او موت بالنسبة لهم .. والدليل انو فيه اعضاء ذكرو مواقف هنا ان فيه بنات بيرضو بدا الشي ...

لكن فعلا لو انتشر الوعي بين البنات والاهالي خصوصا انهم لما يبدأو يعلمو بناتهم على الاحتشام ولما يبلغو على الحجاب .. وشويه شويه على النقاب + مع الاخذ بالنظر تفهيمهم الفرق الجوهري بين الحجاب والنقاب عشان فيه بنات كتير عندهم اعتقاد انها لو كشفت وجهها زيها زي المنحرفه ومعناها كده انها ماهي محجبة فتشيل الطرحه كلها أحسن .. مع ان لبس الطرحة هي الأسااااس وليس فيها أي اختلاف ..

وكان المفروض انتي رديتي عليه قوليله انا لابسه النقاب عن اقتناع وصراحة دا حياتي ومااقدر ابدا افرط فيه .. لاني مو من الناس اللي لابسته عشان الناس او البلد او العرف .. حتى بسهولة تقول لي أتخيلي عنه !! وخليكي قوية كده وخشي في عينه وردي عليه رد كويس .. يمكن سبحان الله يقتنع الراجل .. وتكوني انتي سبب في انك تمنعيه يسوي دي الحركه مع البنات التانيين :)

معليه انا اخدت الموضوع من زاويه تانيه ..

علمني تخصص دائما أن أنظر الى السبب ومن أجلها أحدد النتيجة :)


أتمنى مااكون طولت عليكي .. والله يوفقك يااارب وتلاقي شغل أحلى واحسن ..



نشووفكم على خير :)