[قلم الابداع]

بحر جدة

على شاطئ بحر جدة بدعت القاف والاوزان ..
وهيضني غروب الشمس يوم النفس زعلانه..


بدعته والزعل {مضمون} يوم ان البعد {عنوان} ..
الا يابلسم جروحي عليك الروح شفقانه ..


اسير بدنيتي كني سفينة مالها ربان ..
جسد منزوع منه الروح والانفاس حرانه ..


الوم الحظ واتشره واقول ان البخت مازان ..
واقول ان الزمن قاسي عليّه كشر اسنانه ..


غريبة ماطرى لك تذكري سلطان بعض احيان ..
وانا اللي ماغفت عينه وانا اللي جرّح اجفانه ..


وعيني في غيابك ياعشيري للسهر نيشان ..
وصارت في بحور الهجر والاحزان غرقانه ..


اخفّي همي وحزني وتفضحني به الاعيان ..
وحالي منتحي واذني لصوتك حيل ولهانه ..


ابي وصلك وابي قربك ومهما كانت الاثمان ..
وابي همسات تروي روح باتت منك ظميانه ..


ترى لو تختفي شمسي تعيش ابدنيتك حيران ..
لان الحب له ناسه وله ربعه وعربانه ..


تجي تنشد ولا تلقى يكون الا صدى سلطان ..
يقول انه توفى ثم كفناه باكفانه ..

سلطان المالكي