[Dr~NanoOok]

المشاركة الأصلية كتبت بواسطة hadeel a لو سمحتو أبا أسأل عن طريقة المداكرة يعني بتداكرو من الكتاب و لا من سلايدز و لا ملازم وادا في أشياء لازم تكتبوها في المحاضرات مع الدكاترة ((هدي النقطة مره تهمني لأن ما أحب اكتب شي و قت المحاضرة )) ؟؟ الله يعطيكم العافية لأنكم بتجاوبو على أسئلتنا الله يستر مننا شكلنا حنوصل الموضوع ل100 صفحة

بسنة ثانية المذاكرة كلها من الشيتات "الملازم"
ما عدا الامبريو و الهيستو من الكتب حقت القسم .. وصراحة ما أعتبرها كتب "^^ لأنها مبسطة وصغيرة وفي المختصر المفيد
مو زي كتب المراجع التانية

بسنة ثالث بتبدؤوا تدرسوا بعض المواد ولازم ترجعوا للكتب فيها
والدكاترة بيصوروا الجزئية اللي تحتاجوها من الكتاب .. وتاخدوها نسخة تصوير اذا ما عندكم الكتاب

بس الأفضل ليكم تبدؤوا تتعودوا على المذاكرة من الكتب .. عشان تتعلموا كيف تمسكوا الكتاب وتطلعوا منه المفيد

لأنه كتاب بـ 600 صفحة مثلا أكيد مو كله حتاخدوه ومو كل كلمة فيه مهمة

وكيف تختصروا صفحة فيها 1000 كلمة .. لـ 100 كلمة فقط هي اللي تفيدكم (المختصر المفيد )

بسنة رابع .. حتكثر عليكم المواد اللي ما يعطوا الدكاترة فيها شيتات

وانتوا لازم تدوروا على المعلومة بالكتاب .. أو يعطوا شيتات مختصرة جدا وفقط فيها رؤس أقلام
اذا اعتمدتوا عليها فقط ما حتقدروا تحلوا بالمره

النوتز مره مهمة .. وتساعد على المزاكرة بشكل أفضل وأسرع

أنا كنت من النوع اللي ما احل أكتب نوتز بالمحاضرة

لكني اتعلمت الخصت المعلومة بطريقتي واكتبها من جديد
واكتب المهم اللي بيركزوا عليه الدكاترة وقت المحاضرة

طبعا جروبات المواد والبنات اللي حددتوهم لكتابة نوتز كل مادة
مره حيسهل عليكم الوضع

ودايما حطوا موضوع بالمنتدى حقكم عن كل كورس اخدتوه
وخلوا كل أحد يكتب النوتز والاضافات حقته .. يصير تتساعدوا كلكم


ومعليييش هرجي كتيير "^^
بس ما اقدر أشوف اي استفسار بدون ما أجاوب عليه من قلب ! ههههههه

المشاركة الأصلية كتبت بواسطة purple_boxer يعطيك العافية دكتور مادا ع النصايح الحلوة و حلو لمن الواحد يبدأ من حيث انتهى الاخرون بس عندي كزا سؤال تقدرو تقولو لقافة بس حابب اتعلم دحين تقويم الاسنان لمن البيشنت يبا يعملو هل لي عمر معين ولا في اي عمر عايدي ؟؟ وكمان تبييض الاسنان ما فيلو ضرر ع الاسنان ؟؟ وسمعت انو في تركيبة يحطوها ع الاسنان نسيت اسمها بالانقلش بس انو تتركب ع السن وتكوت بيضة وكدا بالليزر يثبتوها ع السن بس سؤالي هوا لو ما تثبت زي الناس وبدأ يتراكم عليها الاكل هل في ضرر ؟؟؟

بالنسبة للتقويم ..

أفضل عمر أنه بنعمل بعد 12 سنة .. عشان عضام الفكين تقريبا اتكونت
وتقريبا أغلب الأسنان نزلت بالفم ما عدا ضروس العقل

الى عمر 21 سنة .. وقتها يتوقف الفك عن النمو

اذن افضل عمر ينعمل فيه التقويم ما 12 و 21 سنة

واذا الواحد عملها وهو أكبر من كده عادي ما يصير شي.. لكن ياخد فترة أطول
لأن نموه خلاص اتوقف وما حيكون سريع زي ما كان في طور النمو

--

بالنسبة لتبييض الأسنان .. فالأخت رولا ربي يسعدها حطت الرابط حقت المشاركة
وريحتني من اني اروح وانسخها هنا ..
تسلميلي رولا ^_^


والشي اللي يحطوه على السنّة هو الفينير
وبرضو اتطرقنا لليه في الكلام اللي سبق

وو لو ما انحط كويس وفيه فراغات مابينه وبين السن
ممكن يتجمع فيه الأكل والبكتريا وتعمل تصبغات ومشاكل للأسنان

المشاركة الأصلية كتبت بواسطة * رولا * وسؤالي هل مبنى 10 حق كلية الأسنان حيكون فيه فصولنا الدراسية؟ وهل هو كمان اللي حنروح له أول يوم ويجمعونا فيه؟

شكرا ياعسل على الرابط .. دايما تساعديني ربي يسعدك ^^
يب مبنى 10 فيه كل شي حق الأسنان
أما بعض مواد البشري ومعاملها حتاخدوها في مبانيهم .. وهم وقتها حيدلوكم

أول يوم تعالوا على مبنى 10 .. ورووا الشؤون التعليمية وهم حيفيدوكم بكل شي