[Kaira]

المشاركة الأصلية كتبت بواسطة dr~nanoook طيب عشان يصير الموضوع تفاعلي وتشاركوني بتجاربكم ومو انا لوحدي أقعد أهرج بالموضوع :p ياليت كل واحد منكم يحكينا عن تجربته.. مشاعره.. ردة فعله ! أو لما عرفتوا أنكم اتخصصتوا في .. طب الأسنان وشفتوا هذه العبارة مكتوبة في الـ odus ^_^ << على فكرة الاوديوس لونه أزرق (شكله زمان) .. عشان أول لما عرفت بالتحويل للأسنان عملت برينت سكرين للشاشة << مؤرخة اللحظة بالوقت والثانية

بالنسبة لقصتي أنا يوم أنقبلت كان يوم ما يتنسي بصراحة أبدا

أصلا أنا الصراحة الصراحة أي تخصص طبي أو صحي ما كنت أبغا مرة ولا كان في بالي
لا طب بشري ولا أسنان ولا صيدلة ولا شي
ما كنت عارفة هدفي من الحياة دي كل يوم أبغا تخصص ..
مع انو الكل متوقع ومتأمل فية اني أدخل طب بشري والكل يقولي أدخولي طب بشري هوة إلي لايق عليكي لأنك ماشاالله شاطرة وعقلك كبير ومن دا الكلام يعني
فوق كدا ماما تبغاني كمان أدخل طب بشري >> تبغاني زيها
حتى اختي الكبيرة هلكتني كل شوية تقولي أدخولي طب يعني طب وبشري
بصراحة عشت في رعب وضغط نفسي مررررررررة في السنة التحضيرية
لأني كمان دخلتها وحاسة نفسي بدرس وبأتعب نفسي وبأعيد كل شي اخدتو قبل وما أستفيد شي

المهم
شوية شوية كدا بدأت أتعود على أجواء الجامعة والتحضيري
الترم التاني كان حالي الحمدلله أفضل من الترم الأول حتى درجاتي أعلى الحمدلله بكتيييييييير
وأحاول أجيب الفل مارك في كل شي ونفسيتي الحمدلله تحسنت كتييير بس ضغوطات ماما وأختي كانت موجودة >__<"

المهم
قبل لا تنزل التخصصات بكم يوم جلست أفكر مع نفسي وسألت ماما وحدة مرة وهية مآخدتني من الجامعة وقولتلها: ماما خلااااااص قررت أدخل طب أسنان ^_____^
ماما استغربت لأني ما عمري في حياتي فكرت بيلو أو انهم فكروا اني أدخلو أو يجي يخبط على دماغي وكمان لأنو ولا أحد من عيلتنا من جهة ماما دخل طب أسنان كلهم ماشاالله بشري
بنات وأولاد خالاتي وخالي =)
>>> يعني أنا جاية كدا بالغلط مررررررة بالنسبة لهم أهاهاهاهاهاهاهاها
قالتلي الأسنان يبغالو معدل عالي مرة أكتر من البشري وزي كدا بس لو تبي تدخوليه عادي أهم شي انو طب مو خارج الطب بس تتحملي انك تدروسي 6 أو 7 سنين في فم البني أدم >_< ..
قولتلها جزء معين أهون من الجسم كلو
قالتلي خلاص زي ما تبغي بس أجتهدي ..

ولما جا التسكين حطيتو أول رغبة أسنان والتانية بشري
بس مرررررررررررررررة كنت خاااااااااااايفة ما أنقبل أسنان بسبب انو ماشاالله البنات في التحضيري كانو شطااااااااار مررررررة وساعات أرجع البيت أبكي
أقول لماما خلااااااص شكلو لا أسنان ولا بشري ولا حتى صيدلة كمان
مع انو الحمدلله علاماتي عالية بس كان يتهيألي انو الكل جايب 5 وكلهم راح يدخلو
وفوق كدا كمان أختي الله يهديها كل يوم محاضرة وضغوطات علية

وبعد ما خلصنا الاختبارات
عشت أسابيع رعب وما أنام كتير وقلقاااااااااانة وخالاتي وصحبات ماما يسألو ايش دخلت بنتك
ولسع ما نزل التسكين
وزواج بنت خالي رحتو وأنا مالي نفس كلو بسبب التسكين إلي جنني مرة

المهم
يوم التسكين كان مفاجأة بالنسبة لية كنت أتفرج أنيمي ياباني وكنت فاتحة المسن
والمنتدى ما سرت أدخولو ولا الأوديس لأنو جاتني حالة يأس
وكان يومتها المباراة إلي بين أسبانيا وهولندا ووحدة من صحباتي قاعدة تتفرجها ومتحمسة
وفجأة كدا
وحدة من صحباتي إلي أعرفها في التحضيري دخلت المسن وقالتلي: هآآآآآ إيش أتخصصتي
قولتها وي هوة نزلت التخصصات
ووقتها صحبتي التانية تقولي أسباااااانيااا فااااااااااااازت
أنا أتشتت معرف أكلم مين ولا مين
أسبانيا فازت + التخصصات نزلت
2× 1 حمااااااااااااااااااااااااس
أنا على طوووووووووول دخلت الأوديس وعالصفحة الرئيسية ومو قادرة أنزل خااااايفة إني أنقبل طب بشري وأنا خلقة خلاااااص كارهتو وما أحبو ومو داخل مزاجي وكمان لأني صليت الاستخارة كتيييييير في الطب البشري والأسنان وحسيت انو قلبي أرتاح للأسنان أكتر ..

المهم
نزلت الصفحة على تحت ومااااااااااصدقت عيوني لما شفت مكتوب طب أسنان
وفتحت عيوني بأقوى شي عندي بس المشكلة ما قدرت أصرخ عشان أختي كانت نايمة معية في الغرفة
أنا مو عارفة ايش أسوي مررررررررررة طرت من الفرحة ورحت لماما صحيتها كمان قلتلها ماما ماما أنا أنقبلت أسناااااااااااااان وبستها على راسها وهية عالسرير
بس وقتها بابا وأختي الكبيرة مسافرين برة بس ماما اتصلت عليه وبشرتو وباركلي ومررررة أنبسط بابا وماما قالتلي متأكدة انك أسنان ؟؟ طيب قفلي وأرجعي أفتحي تاني
وسويت الي قالتو وقلتلها أطمني يا ماما أنا طب أسنان خلاص الحمدلله وسجدت لله سجود شكر
روجعت لصحبتي إلي قالتلي عالتخصصات وبشرتها وكمان صحبتي التانية إلي بشرتني بفوز أسبانيا
قلتلها وفرحتلي مرررررررررررررة

من جد كانت ليلة مافي زيها وما تتنسي بصراحة حتى تاني يوم ماما كانت في الشغل واتصلت علية
قالتلي يا بنتي أتأكدي مرة تانية أفتحي الأوديس وشوفي أهاهاهاهاهاهاهاهاها
محد كان مصدق إني فزت الحمدلله بالتحدي إني أنقبلت في أفضل كلية في جامعة الملك عبدالعزيز كلها

اللهم لك الحمد والشكر كما ينبغي لجلالك وعظيم سلطانك ^^

وآآآآآسفة على روايتي الطويلة دي