[Dr~NanoOok]

المشاركة الأصلية كتبت بواسطة Glamor Mada كالعاده ماشالله دايما مواضيعك حلوه وتخلي الواحد متفائل .. وقسمنا صاير احلى قسم في المنتدى كله لاننا مو بس بنسأل بعض ونجاوب وخلاص زي الباقيين..قاعدين نستفيد من بعض وناخد فكره عن السنين اللي قدام ونحكي تجاربنا

اهلين مادا .. مطول الغيبة وما شفناك بالقسم من فترة :p

الحمدلله .. والله أكثر شي يسعدني بالحياة إني أقدر أدخل الفرحة و التفاؤل بقلب أحد
وحرصت انها تكون صفة فيا.. وأي أحد محبط ولا مكتئب يجيني و ممكن أقلب مزاجه ع الآخر "^^
صفة أعتز بيها.. والحمدلله قدرت أشعركم بها هنا ع المنتدى ^__^

ويارب يبقى القسم دايما كده .. صحيح مو بس كلام واجابات .. هنا بنتعلم نكون قلب واحد وكيف ممكن نساعد بعضنا بكل اللي نقدر عليه =)

ويصير أمانة عليكم تنتبهوا على القسم وتبقوه "مولع" حماس وتعاون
اذا تركته أو شي

امممممم انا متأكد اني بعد كم سنه رح احن لبداياتي في الكلية وبالتحديد لشغل الدينتال اناتومي لانه بتخصصنا .. الحين ماني قادر احس بحلاوة التخصص زيكم .. صح اني احبه بس برضو ما وصلت لمرحلتكم لأني ما كنت حاط الاسنان في بالي فيوم من الايام الفيديو حق يوم في حياتي شوفتو قروبنا عالفيسبوك وحده حطته .. ما كنت متوقع انه بيعانو لهالدرجه بس عندي سؤال دكتوره نانوك .. ايش صار ع الاعتماد الاميريكي ؟ لانه الشغله طولت افتكر لما جانا دكتور معتز وكلمنا من قبل ما يجي الوفد الاميريكي .. بس للحين ما سمعت شي عنه ياااارب يجينا وتصير كليتنا احسن كليه بالمملكه

سنة ثانية ما تعتبر البداية الفعلية لطب الأسنان.. فعادي اذا ما حسيت بأنك تردس أسنان ولا تعرفت عليه
وحط ببالك.. أنك بتحب التخصص و حتستمتع بيه وتتعرف عليه اكتر وأكتر
وصدقني أي مصاعب حتواجهها حتسهل باذن الله


بالنسبة للاعتماد الأمريكي

كليتنا قدمت عليه من كم سنة.. والسنة اللي فاتت وافقوا على الحضور لكليتنا وتقييم وضعها.. ومن بعدها يقرروا هل تستحق الاعتماد ام لا

والنتيجة ممكن تكون شيئين..
يا انهم يرفضوا تماما الكلية وانها ما توافق معاييرهم ابدا
أو
انهم يعطونا فرصة ثانية عشان نطور أكثر ومن بعدها يقيموا من جديد وممكن نحصل على الاعتماد

علما بأن الاعتماد الأمريكي من أصعب الاعتمادات حصولا عليها بالعالم.. ونادرا ما تلاقي كلية تحصل عليها من أول مره !

وباذن الله احنا قدها ونقدر نطوّر بالكلية ونحصل على الاعتماد الامريكي
وبكده نكون أول كلية بالشرق الأسط تحصل عليها

وعلى فكرة كليتنا عندها الاعتماد الاوروبي واخدناه من كم سنة
وفايدته اننا لما نتخرج من الكلية.. شهادتنا تعتبر كأنها متخرجة من كلية أوروبية وبقوتها

ههههههههههههههههههه دكتوره نانوك صورك تحممممممممسني لدرجه اني نفسي الحين اروح لاب الدينتال واقعد اشتغل ههههههههههه ماشالله تصوريك روعه متحمس لمعمل الفانتووم .. واحد من سنه ثالثه قلي انه يبغالو دقه مررره ودكتور هشام هيخلينا نكتب حرف S ونكتب جمبه حرف s ثاني بفرق واحد مليميتر او نص ! مره صعب ودقيق.. الرسامين واللي يعرفو يرسمو هيستفيدو بالتخصص ونفعهم في رسم الاسنان والكراسات وحتا في الاختبارات .. بس للاسف انا ماعرف ارسم يمكن في حاجه انا متأمل انها تنفعني بالمستقبل مدري اذا ايوا ولا لا .. انه انا يدي واصابيعي خفيفه واقدر احركها بخفه لانه اللي يلعب عالجيتار والبيانو لازم يعملوه تمارين في البدايه عشان تكون يدو تكون خفيفه ويقدر يحرك اصباعين او 3 او حتى اربعه بنفس الوقت ونفس الاتجاه .. استفدت منها وانا بقلب البودره مع المويا عشان نركب المودل عالارتيكيوليتر كنت بحرك بسررعه واصحابي متفاجئين ههههههههههههههههه عاد إن شاء الله نطلع منها بفايده ثانيه في تخصصي هههههههه شكرا دكتوره عالكلام الحلو والصور .. حمستني

مو دكتور هشام.. د.فاضل أعتقد
هو اللي حيقعد يدقق في كل شي بالمعمل .. وأول تمرين خلالنا نعمله
هو رسم خطوط طولية البُعد بين كل واحدة والثانية 1 ملم \ نص ملم \ ربع ملم

طبعا بالبداية كان مررره صعب ولا نعرف نفرق لكن مع الوقت صار الـ سم بالنسالبنا شي جدااا كبير
واتعودنا على الملم

ومره كويس انك متمرس باستخدام أصابعك
مره حيساعدك في الشغل إن شاء الله
وخليك مستمر على ممارسة هوايتك ولا تتخلى عنها مهما كان

كثيرين للاسف لقلة الوقت وضيقه.. ما صاروا يمارسوا أي شي .. وخلوا الدنيا بس دراسة !
ويقهروني اللي يقولوا بأن "الطب" مقبرة المواهب !

معليش الواحد لما يوفق مابين الاتنين يقدر يعملهم على أكمل وجه

ومن ذوقك أن صوري عجبتك =)

المشاركة الأصلية كتبت بواسطة Glamor Mada اممممممممم وانا كمان هحكيلكم كيف انقبلت بالكلية .. قبل كل شي .. انا ما كان لي ميول لأي تخصص عن الثاني ابدا يعني ما كان في بالي هدف محدد .. بس كانت تجذبني كلمه " دوكتور " فا لما جا وقت ترتيب الرغبات ماعرف ايش احط وكنت جدا محتار .. فا دخلت عالمنتدى هنا وبديت اقرا عن كل تخصص وقضيت اياام وايام وانا اقرا .. ولما عملولنا اليوم الارشادي تخيلو اني اخدت بروشرات عن اغلب التخصصات ما عدا الاسنان ! ما رحت الركن حقهم ! رجعت البيت قعدت اقراهم كلهم وايش الخطه الدراسيه والمواد وتقريبا كونت في بالي الهدف والرغبات بالترتيب ( طب بشري - صيدله - علوم طبيه - هندسه - حاسبات - اسنان ) وانا قاعد ارتب الرغبات ابويا كان جمبي وقلي ها ايش تبي تتخصص ؟ قلتله والله مدري ومن ذا الكلام .. قام قلي ادخل اسنان تخصص حلو ومستقله حلو واريح من البشري .. من يوم قلي هالكلام دخل في بالي الاسنان وقعدت اقرا عنه هنا .. لكن مدري ليش ما فضلته على البشري .. فا رتبت الرغبات ( بشري - اسنان - صيدله - علوم طبيه ) بس الى الان ما حددت قرار نهائي وماني مقتنع .. صليت استخاره .. وفكرت في كلام ابويا مره ثانيه وقلت خلاص لما اصحى بكره احط الاسنان رغبه اولى لاني كنت وقتها عالسرير بنام صحيت اليوم اللي بعده وحطيتها رغبه اولى وخلاص معد فتحت الاودس بعد كذا ابدا .. اصلا انا ما كنت متوقع اني انقبل في الرغبتين الاولى ابدا ابدا ابدا .. لاني كنت رايح جاي عالمستشفى .. وقبل اختبار الكيميا الفاينل بيوم كنت في المستشفى دوبي مسوي عمليه .. بس اصريت اني اخرج عشان اختبر وما اعيد ترم كامل .. طبعا اختبرت وانا مني مذاكر ولا كلمه وكنت رح ارسب اصلا جبت درجه جدا سيئة بس الحمدلله نجحت فيها .. لكن كنت فاقد الامل اني انقبل في الاسنان او البشري .. ما علينا المهم .. ليله نتايج التسكين كانت ليله مرررره مميزه وحلوه وكنت مره فرحان يومتها صارتلي حاجات حلوه .. رحت اتفرج الفاينل حق كأس العالم بين اسبانيا وهولندا تقريبا الساعه 9 بالليل برا البيت عشان احس بحماس اكثر.. وطبعا انا كان قلبي مع اسبانيا وابغاهم يفوزو.. لانها بلدي الثاني عشت فيها 4 سنين وشويا فا المهم لما فازو مررررررررررررره انبسطت وقعدت اكلم اصحابي في اسبانيا ومبسوطين اكثثر شي ههههههه .. واصلا قبلها جاتني اخبار حلوه فا كنت مبسوط من اول وبفوز اسبانيا اكتملت الفرحه .. رجعت البيت تقريبا على 12 قعدت اححتفل مع اصحابي الاسبانيين عالفيسبوك مع انه نتايج التسكين صارلها تقريبا اكثر من 3 ساعات طالعه .. بعدها فتحت المنتدى لقيت الجماعه كلهم غيرو تخصصاتهم اللي في البيانات من تحضيري لتخصصهم الجديد .. وشوفت التواقيع والمواضيع واللي مبسوط واللي زعلان.. علطووول جري عالاودس فتحتو لقيت مكتوب طب اسنان (خطه جديده) .. ولما رحت ايقونه نتيجه فرز السنة التحضيريه .. اتفاجئت اني انقبلت رغبه ثانيه ! مع اني حطيت الاسنان رغبه اولى .. بس بعدين اكتشفت انه لما انا حطيت الاسنان رغبه اولى كان يومتها ترتيب الرغبات قفل وماكنت ادري فا اللي اتخزن رغبه اولى هوا الطب البشري .. فا شوف سبحان الله كيف ربي خلاني ادخل الاسنان مع انه البشري كانت محطوطه رغبه اولى واللي فصل بينها وبين الاسنان اقل من نص نسبه .. الشعور اللي جاني انه انبسطت اتقبلت اللي كنت ابغاه لكن كنت زعلان اني ما انقبلت رغبه اولى ههههههه مع اني ما كنت ناويها .. بس عشان حسيت اني خسرت التحدي وما انقبلت رغبه اولى ! هههههههه فا علطول رحت قلت لابويا انقبلت اسنان قام باركلي وحضني .. اول مره فحياتو يحضني وصار يناديني دكتور من ساعتها هوا واخواتي .. والحين الحمدلله بديت احب تخصصي واحمد ربي اني اخترته بعد ماكان اخر شي افكر فيه

مادا ممكن طلب ...
بلاش تكتب كتيييير .. لأني حقعد أكتب واتكلم معاك كتييير وما حنخلص للفجر :p
زي ما انت شايف :p
ههههههههه امزح
بالعكس ماشالله عليك بتذكر كل التفاصيييل و بتسردها لينا بطريقة مشوقة

وماشالله سارد قصة حياتك هنا ومليانة اكشنات كمان :p

الحمدلله على الخيره اللي اختارها لك ربنا .. وباذن الله تحقق أعلى الطموحات
و ترفع راس والدك يارب