[مستفيض العبرات]

السلام عليكم ..

في الترم الصيفي قعدت اسبوع افكر ، هل آخذ الدولي العام عند الدكتور عبدالكريم أو لا !
لان لقيت آراء هنا من طلاب وحسسوني كأنه الجزّار الي يتصيد الدرجات ، وتصورت اني بقابل شبح فيقا مو دكتور ..



وقابلت طالب راسب عنده في القاعة وقال لي بالحرف الواحد : احذف المادة وابعد عنه نصيحة أخوية .
قلت ليه ما تحذفها انت ، قال لي ما بقا لي الا هـ المادة ومافي غيره يعطي هذي المادة .

وجرت الأيام وجاء موعد الاختبار الأول .
اختبار أقل ما يقال عنه ، أسئلة من أسهل الاسئلة .
كلها سطور واضحة وأشياء سهلة جداً ، أخذت عنده 24 من 25 .

المحاضرة الثانية لقيت الطلاب يسبّون فيه ، استغربت منهم .
سألتهم انتم مذاكرين أو لا .
واحد قال مسكت الكتاب ساعة ، والثاني قال مسكتها وانا بالجامعة في السيارة .
والثالث خير شر ما مسك الكتاب .

سبحان الله الحين يوم انك تسبه وتنتقد اسئلته السهلة ، ما فكرت شوية انك اصلا بايع امها !

الاختبار الثاني أسهل من الاختبار الأول ونفس الحالة ، ماخذ 25 من 25 والبقية من 10 و 5 و 15

وانواع الانتقاد !!


الاختبار النهائي اليوم ، كل الاسئلة والله العظيم اني انقهرت يوم جيت اجاوب ، قاعد اقول بعد هـ المذاكرة تجيني هـ الاسئلة التافهة والبسيطة ..
لا وبعد جايب سؤالين من اصل 5 من الاختبار الثاني والأول .
لا وبعد يقول حط سؤال لنفسك وجاوب عليه .





الزبدة من كلامي : لا تاخذوا على رأي أي طالب ، ترا بعضهم همهم الوحيد انه ينجح في المادة ، وبعضهم شغلهم الشاغل ان الاسئلة ما تكون مقالية ، وانا من ناحيتي اكره الاسئلة الي تجيك صح وخطأ واختيارات ، يعني يا صفر يا واحد .
اذا حبيتم تاخذون رأي الطلاب ، خذوا من الطلاب الي هم معروفين انهم يذاكروا ( دوافير + المتوسطين )

ادري غثيتكم ، بس حبيت أكتب وأعلق وأدافع عن هذا الدكتور ، والله العظيم من أروع الدكاترة الي واجهتهم في الجامعة .


قبل الختام ، لا يجي واحد ويقول لانك ماخذ صيفي وحاذف لكم كثير ويبغا يفتك ومن هـ الأمور .
الدكتور ماله سنة او سنتين بالجامعة واسئلته كانت تقريباً نفسها لاني راجعت أسئلة السنة الماضية وكانت في نفس المستوى بالضبط .



يعطيكم العافية