[عندما يتكلم الصمت]

بسم الله الرحمن الرحيم

أول حاجة أنا من زمان مسجلة في هذا المنتدى من سنين طويلة والله / صح ما بأشارك ولا بأدخل مواضيع بس بأتابع قسم الوظايف والمآستر أشوف نهاية الجامعة إيش بالضبط , و برضو أثناء مشاركتي عمري في حياتي مادخلت في مواضيع إستفتاءات الحب والزواج إللي بتنطرح في الساحة العامة لأن هذي المسآلة مهي قاعدة تُعمم والإنسان بيمشي عليها بل تختلف بإختلاف الظروف والأشخاص والعوامل المحيطة .. معليش بحاول قد ماأقدر أتكلم كلام واضح وبسيط لأن أنا عارفة كلامي شوي ممكن يكون معقد ..

أولا ً تفكير الشخص هذا كيف ؟؟ لو بحجم الخردل تتوقعي ممكن يشك فيك على طول أنسحبي و السبب يطول شرحه
وإللي قاعدته في الحياة إللي كلمتني كلمت غيري هذا معناه واحد سـطحي و مهو عارفك كويس أجل حبك كيف ؟ إذن = هذا شخص كاذب و ممكن تكون نزوة أو حب مهو عاطفي بقدر مهو مسمى رائج متداول الآن ..

طيب ح تقوليلي أنا إللي حطيت نفسي في موضع شك من علاقتي فيه ؟؟

طيب ياما نساء تزوجو بطريقة تقليدية وأزواجهم شكاكين بيقفلو عليهم الأبواب والتلفونات والشبابيك حتى .. !

يعني المسألة ماتعتمد إعتماد كبير على علاقتكم ..

وشوفي ياعزيزتي مسألة خنتي أهلك وخنتي دينك ومن هذا الكلام إللي بيقولوه إنتي أكثر وحده تقدر تحدد هذا الشئ
لأنه إحنا الأعضاء مانعرف حدود العلاقة بينكم إيش ؟؟

ممكن تكون علاقة فيها إحترام وتقدير وكل واحد فيكم فاهم الطرف الثاني ومرتاح مو لازم تكون علاقة ( حمراء) يعني عشان يقولو خنتي أهلك ودينك وربك
وإن كان كذلك يعني على بعض الأراء لأن الآراء تختلف ومستحيل تتوحد أهو إنتي ناوية تصححي هذا الشئ وتبدئي بداية طيبة ..

وفي أسوأ الإحتمالات إيش ممكن يصير لاسمح الله ؟ الطلاق صح ؟؟

طيب ممكن تآخذي واحد وبرضو تطلقي أو يتزوج عليك أو يطلع واحد لمن يسآلو عنه أهلك ملازم الصفوف الأولى في المساجد و هو أكبر صاحب للسوابق
بس الناس بـ تداري وتـ غطي وتقول يمكن يتصلح لمن يتزوج .. !

وياما شفنا قصص عيانا ً بيانا ً من هذي الشاكلة ..

أنا ماأأيد هذي العلاقات أبدا ً مو عشان شئ عشان مو أغلبية الناس لها تفكير و وعي فاهمتني ؟

و كل الإحتمالات السيئة لو أتزوجتي غيره واردهـ :)
وكل الإحتمالات الحلوة من إقترانك به برضو واردة والعكس في الحالتين صحيح .. !

لذا راجعي نفسك وحدود العلاقة بينكم
راجعي حتى تفاصيلها البسيطة راجعي تقديره لك ولا حظي بأقول التقدير وليس الحب
لأن الحب معروف ممكن يزيد وينقص مع العوامل المُساندة / إللي بأوصل له إنه ممكن بيتغير ..

لكن التقدير شئ ثابت .. إما هذا الشخص يقدرك ويحترمك
وإما لأ ..

و أولا ً و آخـرا ً توجهي إلى الله في هذه الأيام الفضلـى و استعيني به ..

و أخيرا ً ياعزيزتي رئيس جمهورية دولـة عظيمة في قارة أفريقا نُزع من كرسيه من خلال النت .. !
فـ إيش المانع من إرتباطك بـ شخص عن طريق النت .. !

الزمن اختلف و , اختلف كثيرا ً

كلامي هذا ليس قاعـدة لأن القاعدة لابد أن تكون أطرافها ثابته ..

والحب بما فيه كل يوم في شآن .. !


الله يختار لك الطـيب ..

صمت ..