[LeLou]

بسم الله الرحمن الرحيم..

راح أبدأ بإذن الله أتكلم عن مواد قسم الفيزياء الخاصة بالمستوى الثالث..
و راح أقول شي قبل لا أبدأ..
في قسم الفيزياء كل المواد راح تكون مفتوح لها شعبة واحدة و دكتورة واحدة هي اللي راح تدرس المادة..
باعتبار أنه التخصص هذا أقلية إللي يدخلوه..
فما راح تكون عندكم خيارات كثيرة..

نبدأ:~

فيزياء 202..
اسمها: فيزياء عامة 2..
رمزها و رقمها: Phys202..

المادة هذي باختصار اسمها أساسيات كهرباء و مغناطيسية..
يعني تتكلم عن الكهرباء الساكنة و الكهرباء المتحركة و المجالات الكهربائية و المجالات المغناطيسية و و نبذة بسيطة عن الدوائر الإليكترونية،، و ما إلى ذلك..

المادة بصراحة مو صعبة و لا سهلة..
يبغالها فهم..
و الدكتورة إللي بتعطي المادة دي هي دكتورة واحدة مافي غيرها..
ما أبغى أغتابها بس ما أقول غير الله يهديها و يسامحها..
ما راح تستفيدوا منها كثير..
فإنتوا من بدري دوروا لكم على مرجع أو أقروا المادة ترى ممكن تفهموا لو حاولتوا تفهموها نفسكم هي مو مرة صعبة..

بالنسبة للاختبار راح يكون اليكتروني على كمبيوتر..
و الأسئلة كلها اختيارات،، و بمجرد ما تضغطي أنهاء راح يتصحح لك الاختبار..
الدكتورة هذي كريمة في الدرجات،، يعني لو حضرت معاها دايمًا و حليت الهوم وورك و أديتيها هو تديك درجة أحسن اختبارين..
و هي جدًا مدققة عالحضور و لو اتأخرت و دخلت بعد ما حضرت تحطك غياب..
بس ما تعطي DN..

و بالنسبة لمعمل المادة هذي هو أسهل معمل بس لا تستخفي بيه..
لأنك ممكن تجي وقت النهائي ناسية كل شي فحاولي انك تشتغلي بنفسك و تشوفي طريقة شبك الأجهزة..

و بس كدا قلنا تقريبًا أهم النقاط في المادة دي..
.................................................. .............

فيزياء 203..
اسمها: فيزياء عامة 3..
رمزها و رقمها: Phys203..

المادة هذي بتتكلم عن الديناميكا أكثر شي..
ديناميكا يعني حركة..
بتتكلم عن ديناميكا الموائع و الحركة التوافيقة البسيطة و الموجات و الديناميكا الحرارية و آخر شي في جزء لزيز و خفيف عن البصريات..

المادة هذي تدرسها الدكتورة سناء أباظة..
أكيد غنية عن التعريف..
ما شاء الله تبارك الله شرحها قمة في الروعة..
و أسلوبها مع بنات التخصص مو زي التحضيري..
هي متشددة صحيح بس لو احترمتيها تحترمك و أخلاقها جدًا عالية..
و تتقبل أسئلة الطالبات مهما كانت سخيفة و تجاوب على أي سؤال و تتقبل أي شي..
يعني لا تخافي من انك تجاوبي أو تسألي في كلاسها..

و بالنسبة لأسئلتها لا تسمعوا كلام إللي يقول لكم أنها صعبة..
هي أسئلتها مو سهلة بس مو تعجيزية..
يعني باختصار الأسئلة تبين البنت الفاهمة كويس و اللي مشي حالك..
يعني لو انك فاهمة راح تشوفي الأسئلة سهلة و معقولة..
و الدكتورة دايمًا تعطي هوم وورك حاولي تحليه لأنه عليه درجات غير كدا تستفيدي منه..
و الهوم وورك عادة سؤال أو سؤالين مو شي صعب ممكن ينحل بــمدة ما بين 5 دقايق إلى نص ساعة..
و كمان بتعمل كويز كل اسبوع 5 دقايق أول المحاضرة في يوم هي تحدده..
الكويز يكون على محاضرات الأسبوع كلها..
يكون فيه اختيارات أو فراغات يعني ما يبغاله مذاكرة يبغاله قراءة بتركيز أو مذاكرة بسيطة..
يعني تجي يوم الدوري بإذن الله و إنت متمكنة من المادة مع الهوم وورك و الكويزات..
و تحضر كل محاضرة و تعطي DN..
هي دائمًا تقول أنا كل بنت عندي تاخذ مستواها..
إللي مستواها A+ تاخد A+..
و إللي مستواها C تاخذ C..
و إللي مستواها F بعيد عنكم تاخذ F..
هي بصراحة ما تظلم أحد حقه..

بالنسبة للمعمل هذي المادة معملها فيه شغل و حسابات و رسم فأنصحك لا تفوتي منه و لا محاضرة لأنك راح تضيعي..
و هو حلو و راح تستفيدي من المعلومات اللي راح تاخذيها فيه..
بس يبغاله تركيز و أهم شي تشتغلي و تسوي الحسابات بيدك عشان ما تضيعي عالاختبار..

و بس هذا أهم شي بالنسبة للمادة دي..
.................................................. .............

بعد كذا رياضيات 202..
اسمها: تفاضل و تكامل 2..
رمزها و رقمها: Math 202..

المادة هذي أغلبها تتكلم عن التكامل و قوانينه..
و في جزئية عن الدوال الزائدية و متطابقاتها و تفاضلها و تكاملها..
المادة هذي أتعب أقول لكم سهلة..
بس في نفس الوقت يبغالها انك تعطيها جزء من اهتمامك..
مادة ظريفة جدًا تضمني فيها درجه عالية لو شديت حيلك..

أنا درستني هي غادة مطر و هي ما راح تدرس المادة السنة هذي..
في بنات أخذوها مع آسيا زقزوق و يمدحوا فيها..
و أنا كمان لاحظت أنها جدًا مهتمة بالبنات و تساعدهم مرة كثير في الاختبارات..
تقول لهم اكتبوا أي شي لا تسيبوا السؤال فاضي و هي تديك درجة على أي شي صح تكتبيه لو نص درجة حتى..

المادة فيها هوم وورك أون لاين عليه 10 درجات من المية..
يعني لازم ينحل..
لأنك ما تقدري تفرطي بعشرة درجات مو قليلة..
و بالنسبة للاختبار راح يكون زي اختبارات الماث تبع المدرسة..
فيه ما لذ و طاب من أنواع الأسئلة و راح يكون مقالي..
و أهم شي انك تدربي يدك على الحل و تحلي سيكشن و أسئلة بيدك عشان يوم الاختبار ما تضيعي على نفسك الوقت..
و لو فاهمة ما راح يكون بإذن الله صعب عليك أبدًا..

نصيحتي الأخيرة لا تفرطوا في المادة هذي لأنها راح تساعدكم بإذن الله في رفع المعدل..

و بكذا نكون قلنا أهم شي بالنسبة للمادة دي..
.................................................. .............

بعد كذا معمل الفيزياء..
اسمها: معمل فيزياء عامة..
رمزها و رقمها: Phys 281..

المعمل ده مو صعب بس صراحة دمه ثقيل..
تجاربه جدًا مملة و طويلة و فيها شغل و رسم و حسابات كثير..
أنا عن نفسي ما أنصح انك تاخذيه مع فيزياء 202 و 203 لأنك راح تضغطي على نفسك بالمعامل و راح تندمي أشد الندم..
زيي و زي كل واحدة أخذت هذا المعمل مع 202 و 203..
الواحد مو ناقص تأخير في الجامعة و شغل و ريبورتات مرررة كفاية..
بس هو بصراحة أسهل معمل لكن زي ما قلت دمه ثقيل أنا أبدًا ما هضمته و لا شفت أحد هضمه..

معملين 202 و 203 ترى كفاية..
و إذا مصممة تاخذي معمل خذي كيمياء 281..
و خلي الفيزياء للمستوى الرابع عشان ما راح يكون فيه معمل غيره و تقدري إن شاء الله تتفرغي له و ما يعمل لك ضغط إن شاء الله..
.................................................. .............

بالنسبة للمواد العامة و الحرة كثيرين اتكلموا عنها..

أعتذر منكم على الإطالة و أتمنى أكون قدرت أفيد بنات الفيزيكس بشي..

و نصيحتي الأخيرة،، التوكل ثم التوكل على رب العالمين،، وإخلاص النية لله في العلم إللي بتتعلموه،، و ربي بإذن الله راح يفتحها بوجهكم و عشان تاخذوا أجر طلب العلم بإذن الله..
.................................................. .............

و أخيرًا//
اللهم ما كان صوابًا فمنك و ما كان خطأً فمني و من الشيطان..
و كل عام و إنتوا بخير..
سبحانك اللهم و بحمدك أشهد أن لا إله إلا أنت أستغفرك و أتوب إليك..

تحياتي:~
LeLou..