رد: هل تبخر حلمي !!!!!!!!!!
يا قلبي أول شيء لازم تعرفي أن الدنيا ما انتهت فلا تزعلي عشان ما انقبلتي في العلوم الطبيه!!
حتلاقي هنا كتير كانوا يبغوا طب وما انقبلوا و بعدين تخصصوا كيمياء حيويه و الحين بعد هالسنين يحمدوا ربهم انهم ما درسوا طب << طبعًا اتكلم عن نفسي خخخخ
قبل ما ابدأ بأي شيء ، اقعدي فكري مع نفسك ليش ابغى علوم طبيه؟
لا تقولي عشان اشتغل في مستشفى << لأن للأسف شفت هالرد من ناس كتير !!! مرا ما هو جواب مقنع!!
يعني ممكن وحده معاها لغه و لا دبلوم ولا اي شهاده و تكون في الريسيبشن في المستشفى << هذي قالت تبغى تشتغل في المستشفى وبس..!
يعني قصدي لنفرض تبغي مختبرات؟ عندك فكره طيب عنها؟
عن نفسي بعد التدريب الميداني صرفت النظر كليًا عن اني اشتغل في مختبر ، والحمدلله الكيمياء الحيويه له مجالات اخرى مو متعلق بس بالمختبر! ولا أحد يقول لي ما حتلاقي و مدري شو انا متأكده و واثقه بالله أن رزقي بيده مو بيد اي احد من البشر و الله أعلم ايش حأكون بكرا..
بعد قرقرتي الطويله ( اتمنى ما ضايقتك او زعلتك بس لأن مرا ازعل لما اشوف ناس لما تنقبل بكلية العلوم يحسسوني ان الدنيا وقفت - للمعلوميه فقط : ترى كنت كذا بأول سنه خخخ بس لما عرفت كلية العلوم و التخصص حبيتها للأمانه يعني ، ترى ما اقصدك في كلامي او اي شيء انا اتكلم بشكل عام :) )
طيب يا سوكره نجي نشوف اسئلتك
استفساري للي عندهم تجارب او خبره او معلومه
1-ايش الافضل اتخصص احياء او كيمياء حيوي ؟؟
مو احنا اللي نحدد الأفضل ، انتِ اللي تحدديه لأن انتِ اللي حتدرسي :)
يعني مثلا اديكِ نبذه عن كل تخصص و شوفي ايش يناسبك أو لو مرا تبغي علوم طبيه ادرسي سنه في اي قسم بس انتبهي لما تختاريه اختاريه وانتِ مقتنعه عشان لو لا قدر الله ما انقبلتي تكملي على الأقل في شييء تحبيه :)
الأحياء ينقسم إلى 4 مسارات ( حيوان ، نبات ، احياء دقيقه ، أعتقد التقنيه الحيويه )
الكيمياء الحيويه ( عن العمليات الحيويه داخل الجسم مثلا كيف يتكسر السكر و يدينا طاقه...إلخ و يعتبر اساس كل العلوم و من ضمنهم الطب ما في دكتور في العالم ما درس الكيمياء الحيويه :) )
2-تخصص الاحياء هل فيه شي يتعلق بالمختبرات مثلا وايش وظايفه ؟؟ غير التدريس
ما عندي فكره ، لكن اعتقد اكيد في مجالات اخرى
3-اذا كان فيه امل احول للعلوم الطبيه ايش التخصص اللي يسهل عليا ؟؟
زي ما ذكرت قبل اختاري شيء تقدري تكملي فيه لو ما قدرتي تحولي ، يعني مثلا مو تقولي حأختار كيمياء حيوية وانتِ ما تحبيه ولا تفهميه زي هيك فهمتي عليا؟
و بالتوفيق و استخيري و الله يسهل لك و يرزقك ما تتمني :)
على فكره في طريقه حلوه ممكن تسويها كمان جيبي ورقة و حطي كلية العلوم و كلية العلوم الطبيه و شوفي إيجابيات و سلبيات كل وحده وليش تبغي تدرسي في اي وحده و شوفي كفة مين اللي ترجح :)
و اعتذر لو ضايقتك في كلامي او شيء بس لأن ذكرتيني بنفسي و كمان في كم بنت :)
|