[LeLou]

هلا ميسو..
ما شاء الله موضوع متألق و مرتب زي ما اتعودنا منك..
إن شاء الله أيامك كلها أفراح يا رب ..
--------------------------

بالنسبة ليا هذا العيد غرييييب جدًا..
أول حاجة صحيت من النوم يوم 29 راسي و حلقي و أذني يوجعوني من ضرس العقل..
و تعبانة و حاسة عظامي مكسرة و موقادرة أتحرك..
و كان ورايا تجهيزات كثيرة و قلت أستاهل ما أحد قال لي أتكاسل أمس كنت بصحتي و ما قمت أتحركت..
لازم أخلع ده الضرس خلاص من 2 ثانوي و مو راضي يفكني ألمه يروح فترة و يرجع لأنه نما نمو خاطئ..
خخخخخ عارفة الحكاية عن العيد مو عن ضرسي<< برآ ..

المهم نرجع للعيد طبعًا كان ورايا حملة تنظيفات لغرفتي الجميلة و طبعًا لازم أتجهز و ما سويت حاجة..
السبب:~
أنه أنا اشتريت فستان للعيد و ما اشتريت عليه صندل أو شوز الله يكرمكم..
و جالسة ألف الأسواق و ما لقيت شي عجبني و أضربت عن العيد..
و قلت ماني طالعة من البيت و لا معيده على أحد..
اشتريت عشان الأمانة ذرة و لأختي سلاش من كشك الذرة إللي في السليمانية بلازا..
و وصلت البيت الساعة 3 و نص تقريبًا الفجر..
و الغرفة يبغالها كنس و مسح و كنت ناوية عالعيد أعمل تغييرات في ترتيب الغرفة..
و الألحفة يبغالها غسيل،، صح اتذكرت اللحاف في الغسالة لازم أقوم أنشره..
أول عيد في حياتي يأذن عليا الفجر و أنا لسا لا أخذت دوش و لا اتجهزت و لا لبست بيجامة العيد..
و طبعًا ما عملت طقس العيد المعتاد حقتي إللي هو أول ما يأذن الفجر لازم أشرب فنجان قهوة تركي أو نسكافيه،، و السنه هذي كنت ناوية قهوة تركي..
و ما شربت شي ..
و بعد ما خلصت من غرفتي و بديت في تجهيز نفسي نمت..
و صحيت الظهر أخذت دوش..
و كملت التجهيز..
و قاعدة في البيت حاليًا و الله يستر لا أحد يقول لي أخرجي ما عندي شوووووز..
و لا شنطة،، بس أنا ما تهمني الشنطة كثير تتدبر..
و ما اشتريت محفظة كمان فوق هذا و الذي..
هذا عيد غرييييب جدًا حاسته كله مكركب..
و أختي سافرت ليلة العيد المدينة تعيد عند أهل زوجها يعني حتى البيت فااااضي..
--------------------------

خلاص Enough عارفة كثرت هرج بس أنا مررررة مستآآآآآآءة..
و جيعانه و مافي أكل و ما أبغى أسوي شي عشان لا تصير ريحة بيجامة العيد طبخ..
بروح أسوي لي فنجان قهوة تركي يعدل لي مزاجي..
و بقوم أصلي العشاء خلاص..
--------------------------

ميسو سوري اجتحت موضوعك برد طويييل جدًا..
شكله يفجع..
إن شاء الله أشوفك بداية الدراسة،، و كل عام و إنتي بألف خير..