[Majed7]

في البدايــــه ما توقعتـ أحط موضوع وألقى تفاعلـ كبير زي اللي شفته منكمـ .. أخجلتمـ تواضعيـ

أولـ ما حطيت الموضوعـ نمت بعدهــا وقمت العشـــاء ..

لقيت 6 اتصالاتـ من أمي - أنا كلمت أبوي الله يحفظه عن موضوع التحويل الظهر وقالـ انتظر لمن أرجع البيت وكلمنا وقتها - فـ وصل أمي خبر وكانت على أعصابها ..

قمت على طولـ واتصلـت وردت ..

قالت كلامـ كثير وكيفـ كانـ وضعيـ بعد ما فصلت من الجامعه قبل سنتيــن وإنها شافتـ ردة فعليـ كيف ومرحلــه الاكتئاب اللي مريت فيها ..

بس قلت لها أنا برتاح لـ طبيعة دراسه الهندســه .. قالت بس إنت ما تبغى تصير مهندس ولا إنت متحمس لهالشيء ..

أولـ ما تخرجت من الثانويه كانـ قداميـ خياريـــن إما الملك سعود - تحضيرية كليات صحيه - .. أو هندسة بـ جامعة البترول

وقالت إنيـ ما احترت وقتها واخترت الملك سعود ..

بعد ما فصلت من الجامعه جبت قبولـ من جامعة كآمبردج في بريطانيا - هندســه مدنيـــه - مشروط بـ فاونديشن في معهد تابع لها .. وبس مجرد ما لقيت البعثات مقفله رجعت وهذا الشيء يثبت عدمـ تمسكيـ بهالتخصص ..


كلمتنيـ ساعه ونص وبعد كلامـ كثيـــــر قالت إذا تبغى رضايـ ورضا أبوكـ .. إنت ولدنا ونحنا أدرى فيكـ

لا تحولـ وهذي المرحله راح تعديـ بسرعه .. بسـ خليكـ قريب من ربك ودروسك وخليك على نفس اجتهادك , ولو حولت هندسه راح تنصدم صدمه أكبر من فصلك من الجامعه العام لأنكـ إنسانـ يطالع ورا كثير :) ..

قبل لا تقفلـ قالت اتصلـ على خاليـ محمد - هذا ولد عم جدتيـ استشاري أطفال - وقالت هوا ينتظر اتصالك ( كلمته في الموضوع لمن كنت نايم ) ..

اتصلت وكلمته .. أولـ ربع ساعه قاعد يسألنيـ عن أشياء مالها أي علاقه بالدراسه وأنا على أعصابي
وبعدها قالـ أبغاكـ تطلع من جو التوتر وإنت تكلمنيـ ما حبيت أبدأ على طول في الموضوع ..

يقولـ كلنا واجهنا صعوبات في البدايــه لان الجو جديد علينا وطبيعة المواد مختلفه عن التعليم العام .. وإنت ما شاء الله قدراتك تأهلك تدرس إلى ما تصير إستشاري في أي تخصص تميل له ..

وتكلمـ عن تجربته وعن الصعوبات والمواقف اللي واجهته وكيف عدت عليه .. وإنه راضيـ الحمد لله عن اللي سواهـ وعن النتيجه اللي وصل لها :)

قبل لا يقفلـ قالـ شوفـ دفعتك بتلقى أغلبهم نفسـ الشيء مصدومينـ في البدايه لكن ما يفكروا بالتحويل لانهم دخلوا رغبتهم .. إنت إشـ رغبتك في الدراسه ( قلت له ما عندي شيء محدد أنا ممكن أدرسـ أي تخصص لانه ماليـ ميول مسبقه لـ تخصص معين ) ..

قالـ بعد 10 سنوات إشـ تبغى تصير :-

أخصائي في مستشفى .. مهندس في أرامكو ولا سابك .. ولا تتخصص حاسب وتشتغل بشركة ولا بنك ..

قلتـ له أخصائي بيكونـ شيء راضيـ إنيـ أوصل له ..

قعد يضحك .. قالـ وليه محتار طيب شوفـ إنك تبغى تصير أخصائي وبعدها استشاري ولكنـ عندك حساسيه من طبيعة المواد .. وترا 90 % من اللي كانوا يدرسوا معايـ جاتهمـ هالمرحلــه !

لا تحولـ واستخير ربك وشوفـ رأي أصحابك في الطب - ما أعرف غير واحد من التحضيري و 3 من المنتدى فـ عشانـ كذا كتبت هالموضوع في البدايه لانيـ ما أبغى أتخذ قرار إنفراديـ وأبغى أشوف أقرانيـ من الطلاب والطالبات ونظرتهم للموضوع - ..

قفلت منه ..

وعلى طولـ بعدها فتحت اللاب توب وعلى الموضوع ,,

والله - وما أجاملـ أحد فيها - إنه ردودكمـ هيا سبب راحتيـ واتخاذيـ قرار الإكمالـ .. وكلامكم خلانيـ أقطع الشك باليقين

أبغى أرد وأعقبـ على ردودكمـ لكنـ ما شاء الله كلامكمـ عيــن العقل وحاولت أرد عليــهـ وأوضح وجهة نظري لكنـ ما تركتوا ليـ فرصه ^_^


اتصلت على اهلي قبل شويه - لقيت أبوي وأمي ما ناموا ( دايمـ يناموا على 12 بس شكله كلاميـ خلاهمـ على أعصابهم ^^ )

قلت لهم خلاصـ أنا راح أكملـ إن شاء الله .. وبس قعدوا يدعونـ لي ويقولوا فكر بكره وبعده إلى آخر موعد تحويل وبعدها اتخذ قرار نهائي ..

قلت لهم لا خلاصـ إن شاء الله بكملـ .. وبسـ أبغى وقفتكمـ معايـ



الحين بقومـ وأستخير بعد ما سمعت كلامـ كلـ الاشخاص اللي حوليـ ,, والله يكتب ليـ اللي فيه الخير :)

::


شكرآ لكمـ كل واحد باسمه وكلـ وحده باسمها

شكرا على وقفتكمـ معايـ بالموضوع وأسعدنيـ تفاعلكمـ الكبير اللي شفته ^_^

وشكرا على كلماتكمـ وآراؤكم والله يكتب لكمـ أجرها يااا رب ..



وبس شكرا مره وألف ومليون وربي ما يحرمنيـ منكم ^_^