[القمر جانا]

باح العزا من الحبيب الجنوبي
يا على كن العقل با لكف مجذوب
يا على تذكار اريش العين دوبي
زوله يزول لي وانا عنه محجوب
ابكي على فرقاه والعي واهبوبي
والدمع من عيني على الخد مسكوب
من حر نار الولف مزعت ثوبي
وطوحت بالونه على كل نبنوب
عقب الستر كل الخلايق دروابي
والسد ثار من الحشا ثورة الطوب
يا على لي نسنس نسيم الهبوبي
نود من الشرقي برى حالى النوب
يا على يافرز الوغا يا محبوبي
وش انت شايف يا حجا كل مكروب
عيى يطيب لي الكرى مع شروبي
كن الحشا يصلى على حر لاهوب
ليت الركايب يا على ما مشوابي
من ديرة المحبوب والرزق مكتوب
واليوم ياغافر عظيم الذنوبي
اسالك يا المطلوب خير مطلوب
تجمع بشملي مع حبيب عجوبي
محبوب ماغيره من الناس محبوب
اللي كما بدر قرب للغيوبي
او شمعدان في دجى الليل مشبوب
اصفر عفر والكف منه مخضوبي
ومجمله ربي ولافيه عذروب
هو ريف روحي ياعلى لو حكوابي
مصدود عن عذل العواذل ومحجوب
ما اطيق انا الفرقا رقاق جنوبي
وقلبي ضعيف ودايم متعوب
يوم الليالي عن حبيبي رموابي
غديت مكتوف الجناحين مصيوب
مثل الفقير اللي غريب عزوبي
مستاجع ماله حد يقضى النوب
والاكما طفل يتيم يحوبي
من قلة الوالي ورا الباب مذبوب
هذ سواتي عقب فرقا الجنوبي
اللي هجرني ما لفى منه مكتوب
هو يحسب ان البيض عقبه غدوابي
وانا بصوب وعن هوى البيض في صوب
غرو من البيض العذارى محسوبي
ترف الحشا ومعزل تقل مسيوب
كن الردايف لا اقتفاها الهبوبي
صيوان حكام با لاطناب مضروب
وعيونه الخرسات سود سطوابي
ونهود مثل التين والعنق مسلوب
يا على وين اسلى الهوى وين اتوبي
وين اقدر التجليد والعقل منهوب
ياعلى خلوني حزين الوبي
لوب الحمام اللي على راس نبنوب
غير الوصل ما شي لهوبي
وصلوا على المختار ما افتر دالوب

....."لعيون اهل الجنـــــــــــــــــــــــــــــــــوبـــــ ".....