السلام عليكم و رحمة الله و بركاته
كيف حالكم ي اسنانيات و اسنانيين؟
.. ان شاالله بخير و بصحة و عافيه
الصراحة ما ادري ايش جابني هنا ف دا الوقت
ما عندي سؤال ولا استفسار بس اللهم ودي أستشيركم ف حاجه
ممممم امنيتي من اول يوم دخلت باب الجامعة أني ما اخرج من التحضيري
الا وانا جايبة معدل عالي عشان اتخصص أسنان
الأسنان كان حلمي من سنيييين .. لو تلاحظو،
اول موضوع ليا كان ف قسمكم، كنت اقرأ عنو كتيررر و منجد حبيتو.
بعد ما رد عليا الاخ مزاج والاخت نانووك اتحمست بزيادة مع كلماتهم
و من يومها بقوة شديت حيلي في الاختبارات النصفية، النهائية، قدرات و تحصيلي....
و بتوفيق من الله الحمدلله اجتزت اول عتبة و دخلت الجامعة
لكن للأسف لسبب حتى انا اجهلو.. دا الحلم بدا يتلاشى مع مرور الوقت
مع أني الحمدلله ما أواجه ضغوط في المزاكره
خطة ب جداً سهلة و بما أني مستوى رابع ف الانجلش
تقريبا تلاتة ارباع اليوم اجلس فاضيه ...
ادري المفروض استغل الوقت دا لكن زي ما قلت هدفي بدا يتلاشى
و سرت مرات أتردد و اقول لنفسي ادخل حاسب و أريح دماغي
و مرات اقول احول انتساب و اتخصص أنجلش لانو مادتي المفضلة و استمتع احسن
و تجي ايام والله أسير زي هديك الضايعة، ما ادري ايش أبغى
أممممم المهم ما أبا أطول عليكم
ودي لو احد يعطيني دافع للاجتهاد عشان اتخصص أسنان بإذن الله
^ هادا ازا كان ف بالكم وحده كسلانة تحب الاكل و الشرب و متابعة انمي و دراما معظم الوقت
تستحق تدخل قسمكم الخونفوراشي ._.
بيني و بينكم انا عارفه نفسي من يومي ما احب ازاكر
و أخاف ادخل أسنان و استمر على دا الحال
و بعدين الطب يبغالو نزاكر اوووووول باول لانو رح تكون ارواح الناس بين يدنا من بعض الله
و هادي مسئولية جداًاا كبيرة قدام ربنا و ما أبغى أتهاون فيها ..
مممم مو من عادتي اكتب عن مشكله تواجهني ف يارب تكونو فهمتو ايش ابغى
أسفة ع الإطالة .. ادري انو الاكزامز ع الأبواب و محد فاضيلي
لكن اتمنى و لو كلمتين تِِِعيد ليا همتي و اجتهادي
ولكم مني دعوات من صميم قلبي
شكرًا مقدما :$