رد: بصراحة لا أقدر المرأة
اولا اهنئك على شجاعة التفكير بصوت عالي لانو معظم شبابنا للاسف يحمل هذا الفكر
هاجمك البعض لانك اول واحد تقول دا الكلام بصريح العباره العاده يكون في لف و دوران
ثانيا انتا قلت انك لا تقدر المراه و فنفس الوقت استثنيت امك من الكلام <<< تناقض !!! هل امك تعتبر من الجنس الثالث "مع احترامي لها "؟؟؟
باعتقادي انك مؤمن في قرارت نفسك انو جميع النساء لا يستحقن التقدير بما فيهم امك
(وبعد أن رأيت تمرد كثير من فتيات هذا الزمن أشعر بالاشمئزاز و أتمنى أن يكون لهم عقاب صارم من الأهل أو الجهات المعنية ولا أقدرهم أبداً .)
في مجتمعنا غلطت البنت بالف عشان كذا تثير اشمئزازك البنت ازا غلطت ....مع اني ياما سمعت قصص تشيب الراس عن الاولاد ومصايبهم بس هل طاحو كل الرجال من عيني ؟؟ لا .. لانو من الغلط التعميم
ازا البنت دخنت بعضهم يعتبروها مفلوته و ماشيه على حل شعرها بينما الولد لو دخن حرية شخصيه و كيف
البنت لو اتعرفت على واحد يقولو الناس اهلها ما ربوها بينما الولد لو اتعرف على وحده يطلع رجال و ما يعيبو شي و اكيد حيطلع فله و اذا الناس الي حولينو فيهم خير حيدعولو بالهدايه
مين الي ضخم غلط البنت ؟؟ احنا .............مين الي خلى الولد عيبو فجيبو ؟؟؟ احنا برضو
ربنا ساوا بين غلط الذكر والانثى .... السارق والسارقه الزانيه والزاني لكن مجتمعك او الناس الي حولينك او يمكن مجتمعنا ككل يعتبرو غلط البنت بالف فدا الشي اثر على تفكيرك وعلى تفكير البعض
و للاسف احد الاشياء الي تخليك ما تقدر المراه انو امك -الله يخليها لك -ما علمتك احترام المراه و تقديرها
الام مدرسة اذا اعددتها اعددت شعب طيب الاعراق ... تطلع من تحت يد المراه اجيال(نساء ورجال ) ... جيلنا الحالي البعض طبعا اتخلت الام و الاب عن مسؤوليتهم تجاه الابناء و تركوها للخدم او الام ما كانت كفو لتربيه الاطفال
اغلب التصرفات السطحيه الغبيه الي بتشوفها من البنات بسبب الجهل و عدم تحمل المسؤوليه و بسبب انو الاهل هما الي يتحكمو فبنتهم في كل صغيره و كبيره فتركت البنت مهمة التفكير لاهلها فسارت جسد بلا عقل
تناقض تاني تبى المراه تكمل تعليمها الجامعي فقط و تتفرغ لزوجها و امورها الدينيه و فنفس الوقت تبى معلمات و طبيبات و غيرهم
شوف اش هيا مواصفات زوجة المستقبل الي تبغاها ؟؟
تجهل بعض امور الحياه ما عندها شخصيه ما ينفع تاخد مشورتها في بعض الامور التي تخصكم ما تقدر تجري معاها حوار متكافئ في مستوى التفكير .....و لكنها تقوم بامور دينها و فنانه في الطبخ والتنظيف ... هل هذه المراه الي تبغى تعيش بقية حياتك معاها او تبغاها تربي اولادك ؟؟طبعن يعتمد على تعريفك لمصطلح التربيه !!!
او تبغاها مثقفه وفاهمه و تقدر تاخذ رايها في امور حياتك و تقوم بامور دينها وتربي اولادك تربيه حسنه وتطبخ و تنظف و قد تستعين بخادمه اذا كانت تعمل ( بشرط ان لا تدخل الخادمه في تربيه الاولاد )
معا احترامي لك اول ما قرات موضوعك تزكرت ايام الجاهليه وكيفية طريقة تفكيرهم بالمراه ما الومك لانو بعض النساء في الاجيال السابقه ما عرفو قدر نفسهم فرضو بالقليل من حقوقهم و سكتو عن البقيه فاستمر الشي دا الى جيلنا ...
احد الاشياء الي خلتنا ننتقص من قدر المراه انو بعض الشيوخ هداهم الله اتكلمو عن واجبات المراه و حقوق الزوج عليها اكثر من حقوق المراه و واجبات الرجل عليها
|