[LeLou]

المشاركة الأصلية كتبت بواسطة ميثان حلقي السلام عليكم انا طالب كيمياء و ابغى آخذ فيزيا 203 مقرر حر , اولا هي كم ساعة ؟؟ , و هل فيها معمل ؟؟ هل هي سهلة او صعبة و عن ايش يتكلم المنهج و هل هو ممتع ولا يجيب المغص و كيف القوانيييييييين كثيرة ولا لأ بنات او اولاد ارجو التكلم عن الكورس بكل ما تملك من خبرات تحياتي ميثان حلقي

و عليكم السلام و رحمة الله و بركاته..

بالنسبة لــ 203..
هي 4 ساعات،، 3 نظري و فيها معمل يوم واحد في الأسبوع 3 ساعات و طبعًا ينحسب في الجدول بساعة كالعادة..

المادة جدًا ظريفة و حلوة و سهلة،، لكن إذا الدكتور عرف يشرحها..
يعني إذا فهمتها صارت بالنسبة لك شربة موية..

بس هي مو بذيك الصعوبة،، هي فيزياء عامة..
يعني راح تاخذ فيها مقتطف من كل حاجة غير إللي في 110 و الكهرومغناطيسية..
تتكلم في البداية عن ديناميكا الموائع و بعدين الحركة التوافقية البسيطة و بعدين الموجات و راح تتعمقوا في الموجات الميكانيكية و موجات الصوت شوية،، بعدين في جزء بسيط من الديناميكا الحرارية و جزء عن البصريات..

أنا حبيت الكورس و حسيته مرة ظريف بس زي ما قلت لك فهمته صار سهل ما فهمته صار ثقيل دم..
فبالنسبة إذا ممتع و لا يجيب المغص هذا يرجع لميولك للمواضيع إللي في الكورس..
و هو دسم حبتين يعني مو مادة ينلعب فيها..
إذا تبغى تاخذ مقرر حر عشان تلعب و تريح شوية ما أنصحك تاخذها لأنها مادة محتاجة تركيز..
قوانينها مو كثيرة و مو قليلة بس هي كلها لو انفهمت من فين جاية راح تحفظها..

آخر شي توصيف المقرر في المرفقات..

أعتذر على الإطالة،، بس إنت قلت كل ما تملك ..
و بالتوفيق||~