[حلاووووي]

هذي بعض النصايح للجادين في تعلم اللغة الانجليزية على الوجه الأفضل
في البداية يجب حفظ أكبر حصيلة من المفردات ..
وهذا الشي مو صعب لأن في كلمات كثيرة تكون مشتقّة من كلمات ثانية أصلية لكن بزيادة بعض الحروف الي تغيّر المعنى
مثلا كلمة Jutice معناها " العدل " .. وكلمة Unjustice معناها " الظلم " .. لاحظ أن الكلمات متشابهتين لكن تختلف الثانية عن الأولى بزيادة Un في البداية . وهذي الزيادة عادةً تدل على عكس الكلمة .
واذا عرفت الكلمات الأساسية في اللغة وعرفت استعمال مثل هذي الحروف الزايدة ( آخر أو أول الاسم ) راح تقدر تدبّر أمورك في كثير من الاوقات بشكل يسير خصوصاً اذا ما كانت عارف كلمة لكن تعرف ضدها مثلاً .

الشي الثاني هو القاعدات Grammars .. أنا اعتقد ان دراسة القاعدات ما يجب تكون دائماً على سبورة مثل الكيمياء والفيزياء والرياضيات .. القاعدة في البداية يمكن شرحها على سبورة لتوضيح الفكرة العامة منها .. وفيما بعد تكون دراسة القاعدة عبارة عن تطبيق للقاعدة بحيث انها ترسخ في مخك وتعرف متى تستعمل القاعدة .
بحيث انك مع الممارسة راح توصل لمرحلة انك تستطيع استحضار القاعدة في مخك وترتيبها وتغيير الأفعال والكلمات بشكل عفوي مثل ما تتكلم اللغة العربية .
يعني ما راح تكون مضطر أنك ترسم خرايط في مخك للقاعدة وتفكر لازم احين احول الفعل الى كذا ولازم الاسم يصير بعد هالكلمة ..... الخ .
هذا اسلوب فاشل في التعليم والهدف منه هو تمشية وضع الطالب الى ان يختبر المادة ثم ينسى القاعدة , والأسلوب الصحيح لتعليم القاعدات هو الممارسة .

أيضاً مهارة الاستماع مهمة جداً وما أعتقد راح تقدر تتعلم انجليزي بدونها .. لأنها أولاً تعلمك طريقة نطق الكلمات ونطق الأحرف .. لأن لو حاولت تنطق بعض الكلمات لوحدك بدون استماع راح تشوفها صعبة جداً في النطق وثقيلة .. مثلا كلمة Months لو حاولت تنطقها لحالك راح تشوف المقطع الاخير منها صعب لأنه يتكون من 3 حروف ساكنة ورا بعضها .. ( النون والثاء والسين ) ونطق حرفين ساكنين ورا بعض صعب على اللسان .. فما بالك بثلاث ورا بعض, او اذا صارت في جملة كاملة .. بينما لو تسمع الأجانب كيف ينطقوها راح تعرف كيفية نطق الكلمة بشكل سليم وسلس وسهل على اللسان .


أيضاً من فوائد الاستماع تدريب الطالب على استعمال قواعد اللغة .. لأن من التكرار راح تعرف متى تستعمل القاعدات وكيف تستعملها وفي أي موضع تستعملها .


والشي الثالث هو متابعة الأفلام المترجمة .. أولاً تستفيد منها كلمات . ثانياً تدرّب أذنك على الاستماع وتحصل فوائد الاستماع الي قلناها .
ثالثاً هو معرفة التعابير المجازية عندهم Phrases .. يعني في بعض الجمل لو استطعت ترجمتها حرفياً ما راح تشوف لها معنى .. لكن لو عرفت معناها مجازياً راح تشوف انها معناها متناسب مع الجملة.
مثلا جملة I need a space
لو ترجمتها حرفياً راح تكون : أنا أحتاج مساحة
يمكن تكون مالها معنى
لكن معناها المجازي هو أني أريد أختلي بنفسي .. يعني أكون لحالي

لو انك ما تعرف معناها المجازي ما راح تعرف وش المقصود منها .
ولما تروح دولة اجنبية وانت بلبل في الانجليزي وحافظ لك قاموس اوكسفورد كله وتستطيع ترجمة أي جملة
لكن ما تعرف هذي التعابير المجازية , راح تشوف نفسك ضايع في هالدولة الفلانية ولا تدبّرها

لأن الشعوب عادةً ما تلتزم بالقواعد والمعاني الأساسية Formal English .. بل تعتمد على الـPhrases حتى يكون كلامها سهل وجميل ومعبّر.

ولو لاحظت انك انت تستعمل تعابير مجازية طول الوقت في حياتك اليومية وتخاطبك مع الناس .. بحيث أن لو زائر يجي من دولة خليجية ثانية وسمعك يمكن ما راح يفهم بعض كلامك .




هذي النصايح حبّيت أقدمها لكم وان شاء الله تستفيدوا منها