[بنوته لزوزة]

وعليكم السلام ورحمة الله و بركاته

طيب بما إنو الكل بيتكلم خليني أتكلم أنا كمان و أقول كم حاجة

أولاً سلايدات الأحياء مافيها أي تعديل وكلنا بادلناها ببنات السمستر الأولاني ومافي زيادة إلا في المصطلحات !

و دكتورة حنان قالت نفس الكلام

ثانياً في الكيمياء دكتورة ليلى شرحتلنا جزء بسيط عن الفواصل وقالت إنو تعّب البنات في التريننق لكن ماجا في اختبار و لا حاجة بس عشان في التريننق اتلخبطو و هوا برّا المنهج أساسا ف شرحتلنا هوا عشان التريننق

الإحصاء والله ماعندي فكرة ايش حصل تغيير

ثالثاً بشكل عام وبغض النظر عن خطة أ و خطة ب كلنا بداية الدراسة والترم الأول و لسا محنا متعودين على نظام الجامعة فكل واحد حيشوف خطتو أصعب !!

بس دحين ماشاءالله سارت عندنا خبرة و ع الأقل فهمنا نظام الجامعة , عن نفسي أول إختبار كان جدا صعب ف يكل المواد لأني ماكنت عارفة من فين حذاكر و لا كيف طريقة الأسئلة بس الدوري الثاني رتبت أفكاري وعرفت من فين اذاكر و ماشتت نفسي

موضوع التست بانك الي أنا أعرفو إنو صحبتي كانت ب و من أول محاضرة قالتلهم الدكتورة 99% مافي تست بانك ..

ومن صحباتي الأغلب كان خطة ب و ماشاءالله معدلاتهم 5 و جايبين في الأحياء 97 و96 يعني أبداً مهي صعبة اللهم هيا لحقت نفسها وذاكرت بينما الكل كان يتكاسل ويستنى التست بانك والبونس

كلللل المشكلة في إننا ماكنا مرتبين نفسنا بداية الدراسة و لا كانت عندنا فكرة عن طريقة الجامعة لأنها تختلف تماما عن طريقة المدرسة و الفرق بين كل طلاب التحضيري مو الشطارة .. لا الفرق إنو في ناس اتعودو واتكيفو ماشاءالله بسرعة مع نظام الجامعة و كانو مابيسمعو للناس الي مابيزاكرو و بيقولو إنو المنهج صعب !! وفي ناس طنشوا و اهملوا وسارو يختلقوا صعاب ماهي موجودة أصلاً

معليش ردّي جاي قوي حبتين .. بس انقهرت يوم الكل بيقول اختصرولكم و مااختصرولكم و هوا مهو فاهم الهرجة اساسا :/

وصلّوا ع النبي ياجماعة واستهدوا بالله و سيبوكم من الكلام الي لا بيودي ولا بيجيب " وانتو اكتر ناس اتكلمتوا وماحد سمعلكم فطبيعي محد حيسمعلكم دحين " وزاكرو كويس و لا تستهونوا بموادكم

ومو معناتو خربتوها بالترم الأول و معدلاتكم كانت مو حلوة يعني تستلمو الترم التاني ..

بالعكس المفروض دا الشي يخليكم تثبتو نفسكم أكتر ..

والله يعدّي الترم دا على خير ونكون كلنا مبسوطين بنتايج التسكين يارب و لا تنسوا " أنا عند ظن عبدي بي إن ظن خيرا فله وإن ظن شرا فله "