السلام عليكم و رحمة الله و بركاته
صباح و مساء الخيرات و الانوار لكل اخواني و اخواتي
صارلي زمان عنكم و عن منتدانا الرائع
عالعموم اختكم في الله و بعد عناء طويل مع الوظائف و الهم و البحث قررت اخيرا تسجل دراسات عليا بدل الملل و الكابة و الجلسة في البيت علفاضي لكن يبدو انه قرارها جاء في وقت متاخر حيث انه اكتشفت انه انتهى التسجيل من بدري في الدراسات العليا
قرات كم موضوع و كم رد بخصوص موضوع الدراسات العليا في منتدى جامعتنا الموقر و ضاقت نفسي اكثر... اللي يقول مافي قبول الا لعدد معين و قليل و اللي يقول السنة الراحت ما قبلوا اللي العدد الفلاني هذا غير اختبار اللغة
رغم ان هذا الاخير اختبرته في مركز القياس الوطني للقدرات و اللي هوا الستيبstep كبديل للتوفل و لكن ايضا حطم معنوياتي و جبت فيه 67 سبعة وستون
الاقيها من ايش و لا من ايش كل مالها تتعقد و احساسي يقول لي انه ضيعت عمري في دراسة بكالوريوس لغة انجليزية لانه في ايام الدراسة كانوا يقولوا لي انه التخصص هذا مرغوب في سوق العمل و انه حاحصل وظيفة على طول اتخرجت و لا حصلنا شي اللي مريح بالي انه مازلت اعتبر حديثة تخرج لاني اتخرجت السنة اللي فاتت يعني الدور و الباقي على اللي متخرجين لهم سنين و مولاقيين وظائف
قدمت على كم من الوظائف في كذا شركة من الشركات الكبرى جاني عائق اما الاختلاط بالرجال او المقابلة الشخصية تكون مع رجل و اللي ارتبكت فيها و ماعديتها
المصيبة اللي قاهرني اني جايبة نسبة حلوة 4.18و هم يتصلوا على هالاساس و بعدين لما يجي وقت الجد كل شيء يخبص
وفي احدى المدارس قمت بشرح درس امام معلمة واخذت بياناتي و قالت لمن نحتاج بنتصل مع العلم انه لما اتصلت قالت احنا بحاجة بس نبغاك تقدمين درس
قدمت في جدارة وظائف تعليمية قالوا الاولى اللي عندهم دبلوم تربوي حسيت انه لو درست في كلية التربية للبنات كان افضل
يا ناس احس و الله انه احنا مظلومين بجد بحاجة لتدريب في مجال عملي و لسنا بحاجة لمقابلة او اختبار يكفي اللي اختبرنا ايام الدراسة
و ختامها في الماسترز قلت بدل مااضيع عمري عالفاضي و بدل الطفش و بعدين ابعد عن الدراسة كثير اكمل ماستر ....لكن ما اقول الا حسبي الله و نعم الوكيل على كل من عقدها و صعبها علينا
حسبنا الله سيؤتينا الله من فضله انا الى ربنا راغبون
معليش طولت عليكم بس ما لقيت حد اشكيله همي
هذا كله مقدمة..
استفساري الان:
1-ماهي الشروط العامة للدراسات العليا؟ و بالتحديد كم الدرجة المطلوبة في اختبار التوفل او بديل التوفل الستيب هل الدرجة التي حصلت عليها تؤهلني ان اقدم ام لا و هي 67 سبعة وستين
2-انا بكالوريوس لغة انجليزية لكني بصراحة كرهته و ما افكر اخذ ماستر انجليزي بل ادارة اعمال او ادارة عامة او ادارة معلومات ايها الافضل ؟؟ و هل مسموح لي بدراسة الماستر في غير تخصصي؟؟
3-سمعت انه لازم احضر صورة من كشف الدرجات و انا عندي واحدة F في مادة الكتابة 1 أول ترم في التخصص استفتحت ب F لكن الحمد لله ما تكرر هالامر.. فهل يؤثر في قبولي في برنامج الدراسات العليا الرسوب في مادة و لا المهم المعدل بس؟؟؟
4-بالنسبة للتوصيات كم توصية لازم اجيب ؟؟و كيف ؟؟و من فين اجيبها؟؟ و انا اتخرجت و على بال ما ينفتح القبول في البرنامج الدراسات العليا مرة ثانية يكون مر سنة او اكثر بشوي من تخرجي و هل يطول الحصول على التوصية؟؟
5-هل صحيح انه تخصص الدراسات العليا لازم تكون من نفس التخصص البكالوريوس؟؟
و جزا الله كل من جاوبني كل الخير و السداد و التوفيق و جعله في ميزان حسناته لانه لا يدري انه قد فرج عني الهم الكثير الله يفرج همه و يوسعله من كل ضيق مخرجا
تم بحمد الله