رد: السلام عليكم ممكن استفسار
انا ادرس في ابن سينا و دحين عادلت موادي وباكمل هناك
صراحه ( مرتاحه)
الحمدلله اني روحت هناك
والدراسه حلوه مافي اي تعقيد بس تلحقي اول بأول مع محاضراتك وتسيري تمام
انا اهلي كلهم في جده الا ماما وبابا برا فا ساكنه في سكن خاص واروح عند اهلي كل يومين او ويكند ما عندي مشكله
سكن ابن سينا يخوفني شفتو من بعيد جاني اكتئاب بعدين اظن انو سكيريتي تحت بس وما احسو أمان
اصلا المنطقه هناك مره مو طيبه السكن فيها
انا جري من السياره للكليه ومن الكليه للسياره وارجع سكني او بيت اهلي
بس لاتخافي انا ماعشت هناك عشان احكم بس المنطقه هناك ( كسكن) بالأمانه مره ماتريحني
لاتوسوسي ولاتخافي حياه السكن مو بطاله
بس اهم شي تصاحبي الطيبين
لأنو في ناس في السكن يالطيف
انا غيرت موقع غرفتي كم مره الين ماعزلت نفسي انا وصحباتي في سيب لحالنا سرنا جيران بس بعيد عن الدوشه عشان نعرف نزاكر وناخد راحتنا
اهم شي في السكن انك تبعدي عن ( عارفه الشلل المزعجه دي) الكبيره دولا الكوليين بعدي عنهم حيضيعولك وقتك
اربعه وعشرين ساعه حفلات وسهر وهبل ومش عارفه ايه ( غيابهم جماعي جماعي)
احسهم يخربو بعض يالطيف
فا انتي من البدايه اعرفي مين يناسبك ومين لأ
ايوا بس خلي موقف يسير بينكم كلهم يقعدولك فا انتي في غنى عن دا كلو في ناس اصلا ماتحتكي معاهم من البدايه بس السلام بينكم وخلاص =)
بس مايخوف قلتلك بس الصنف دا من البنات مصيبه في السكن لازم ماتحتكي في ناس كده والله كلهم الي كانو كده عادو السنه يالطيف
غير كده انصحك تاخدي غرفه خاصه لحالك ( حاتحسي بوحده) بس دا في البدايه
بعدين تتعودي عادي يسير الوضع
كمان ماتضمني الي معاكي
انا كنت مع وحده لمده شهر مره اضايقت
صحباتها يدخلو و إزعاج ومايحترمو
اشيائي تتحرك من محلها وما اعرف فينها يحرجوني كتير ما اعرف انام ولا ازاكر ولا أسوي مكالماتي ولا اتنسم مره ما اتفقنا
فا خرجت وروحت في غرفه خاصه
نقطه تانيه
لاتعزمي احد غرفتك
في صالات وجلسات عامه اتجمعو فيها احسن
والله يبشكو عندك البنات للصبح وتنحرجي تقوليلهم تبغي تنامي ولاتزاكري وبس تلمحي كلهم يزعلو
وبعدين لاتعودي احد يخش غرفتك
والله حيجيكي وقت مره حتتضايقي
( وبنات السكن ماتضمني يعني ماتعرفي كيف طيبين ولا بطالين ولا كيف مايندرى كيف تتضمني تدخليهم غرفه نومك الخاصه) صعبه
فا خليكي كده من البدايه اعمليلك سيستم معاهم
انا صحباتي الي معايا الان عشره سنين من يوم ماكنت صغار فا نراعي بعض ومافي مجاملات ولا زعل
وعادي والله في ناس طيبه لاتخافي
انا قلتلك اهم شي في السكن
قاعدات من جد محد حيقولك عليها
Please feel free to ask me anything
|