[lovely one]

المشاركة الأصلية كتبت بواسطة ملآكـ بطبعي تعبت من كلام الناس والاهل )=

دا اكتر سبب مكرهك في عيشتك


معليه بس طز في كلام الناس لانو عمرو محا يخلص
ازا لسا ما جاكي النصيب حيقولو عنست و يعيبو فيكي
ازا اتزوجتي حيطّلعو في زوجك مية عيب وعيب او ممكن يقولو دا اش خلا يطالع فيها
و بعد ما تتزوجي بشهر حيقولو دي ما حملت شكلو المشكله منها
وبعد ما تتزوجي حيقولو دي بيتها مو نظيف ما تعرف تطبخ ما تهتم بنفسها عفش بيتها معفن
وبعد ما تحملي حيقولو دي مهي عارفه تمسك بزوتها و رميتهم عند امها او الشغاله
و يستمر هرج الحريم الفاضيين ......
هل هما دولا الناس الي يهمك كلامهم ؟؟ هل حتخلي ناس تافهه و فاضيه ما عندهم حاجه تشغلهم في حياتهم فيجلسو يطقطقو على راس غيرهم ياثرو عليكي وعلى نفسيتك ؟؟

اولا الناس التافهه الي زي كدا ابعدي عنهم حاولي انك تنعزلي عنهم
اشغلي نفسك باشياء تانيه قراءة كتب دورات او شغل او خرجات معا صاحبات او نادي
بعض البنات يحسبو انو الزوج هو الحياه كلها و يتخلو عن كل شي ( هواياتهم ، صاحباتهم ،دراستهم ) يحسبو انو الزوج 24 ساعه في وجههم ترا هوا كمان عندو حياتو الخاصه ومستحيل يتخلى عنها عشانك (اصحابه . هواياته ، خرجاته ) ترا الزوج اضافه لحياتك فقط مهو محورها وانتي كذلك بالنسبه له ...


عالعموم الله يرزقك بابن الحلال و احمدي الله مية مره في ناس اتزوجو واكتشفو انو ازواجهم يسكرو او يزنو او ما تطلع منهم كلمه حلوه او يهينو الزوجه او يضربوها او بخيلين او عندهم عقد نفسيه
تخيلي لا سمح الله لو اتزوجتي واحد من دولا اش احسنلك العيشه في بيت اهلك ولا معا شخص زي كدا عشان انتي يهمك كلام الناس ؟؟

حاولي تخلي فبالك دي الكلمه ( لعله خير ) انتي ما تدري

بعض الاهل ال* يضيقو عيشت بنتهم فكل ما طلبت بنتهم شي يقولو ازا اتزوجي او خلي زوجك يعملك وهكذا.. لدرجه انو البنت سارت مستنيه سي السيد لانها على يقين انو الفرج على يدو عشان يطلعها من السجن والكبت الي عايشه فيه و بعد ما تتزوج تعرف انها خرجت من سجن الى سجن اخر لا اكثر
وبعدين يجي واحد يقولنا انو المراه عندنا تعامل كملكه ما اعرف ازا هوا عايش معانا في السعوديه ولا في كوكب تاني