[the change]

لما كنت صغيرة

كنت متعلقة بأبويا بشكل كبير جدا

افتكر ماكان يخرج من البيت إلا وانا معاه - الله يحفظه ويخليلي اياه يارب ويطول في عمره على طاعته ورضاه يارب

من يوم ماعمري 4 سنوات تقريبا إلى 5 أو 6 ابتدائي - تعلق عجيب !

طبعا كل مكان يروحله انا معاه , يعني حتى المسجد ههههههه

افتكر مرة كان خارج يصلي وبعد الصلاة عنده مشوار وانا متعودة بمجرد ما اسمع الاذان اسنتر عند الباب

هو دايمن ياخذني شيء معتاد عليه يعني ومافي مجال , لكن يومها ماقدر لانو وراه مشوار ضروري

فيومها حاول يلهيني من هنا ومن هناك وانا مو راضية أبدا لاني فاهمته

فخرج بسرعة وقفل الباب وهاتك يابكى

ما أنسى ذاك اليوم أبدا إلى الان والله , لاني بكيت من قلب كنت حنفجر من البكا وحرقة ذاك الموقف إلى الان في قلبي << ياشيخه

وأمي ماسارت تعمل شيء , تعرف إني ماحوقف بكا ولا رح أرضى إلا لو رجع او اخذني معاه

ففضلت يومتها لين مارجع

وربي من المغرب لين بعد العشا آخر الليل وانا عند الباب لين مارجع << فديت أبويا والله

..........


كنت لما أدخل معاه المسجد معروف مكاني , يقلي اول ماتدخلي تعرفي مكانك على طول ترجعي ورا آخر شيء وتستنيني لين ماخلص صلاة هههههه

يقلي ولو حسيتي انك مضيعتني بين الرجال تجلسي تبكي لين مانخلص صلاة ونلتفت وتعرفيني , واكلوا وجهي الرجال هههههه

لدرجة بعد فترة كلهم كانوا بعد مايخلصوا صلاة يرجعوا يسلموا عليا , صار زي الفرض عندهم

وكثييير كانوا يجيبوا حلويات معاهم عساس اول مايخلصوا صلاة يدوني هيا <<<<<<<


قبل مدة كنت بسترجع الذكريات هذه مع ابويا فتذكرت العم سالم "" المؤذن""

فقلتله والله يابابا عم سالم هذا ذكريات بالله سلملي عليه

قلي ترا يسألني عنك يقول كيف حال بنتك عقلت ولا لسا ههههه

قلو ابويا لالا كبرت وعقلت خلاص , ويومتها كانوا خارجين كلهم من المسجد فواحد قال والله بنتك هذه سنين وبنين ماخلتنا نخشع في صلاتنا !