[Respect me Respect U]

بسم الله الرحمن الرحيم
السلام عليكم ورحمة الله وبركاته
مساؤكم رضا وسعاادة
اولا اشكر صاحب الفكرة بصرااحة
راح اتربع لكم واقولكم مافي جعبتي من كلاام
اولا حااجة الثقة ثم الثقة ثم الثقة بربنا اذا طبقتوا هذي الجملة حتمشوا في السنة التحضيرية بالطول والعرض بإذن الله
رضا الوالدين والمحاافظة على الصلاة مو علشان بس السنة التحضيرية علشان تتوفقوا في حياااتكم
بالنسبة للدراسة عندنا خطتين خطة في الفصل الاول وخطة في الفصل الثاني ممكن تبدأوا بخطة أ وموادها ( رياضيات وفيزياء وحااسب ومهارات اتصال ) وممكن تبدأوا بخطة ب و موادها ( احياء وكيميا واحصا ) وبالنسبة للانقلش للي يبدأ من المستوى الاول حيكون في كل فصل دراسي مستويين لانه الانقلش اربع مستويات ((بالنسبة للانقلش انا افضل تبدأو من المستوى الاول حبة حبة تطلعوا على السلم وجهة نظري) لكن اختبروا اختبار تحديد مستوى يمكن تتعدوا المستوى الاول والثاني وتوفروا عليكم ساعات دراسته لانه هوه يدرس 4 ساعات كل يوم
بالنسبة للمذاكرة اول بأول وترجمة كلمات اول بأول ( لانه درستنا كلها انقلش ) ومسك نماذج سنوات رااحت ومالكم الا الفل مااارك وفيه حاجة ماله لزمة انه نجيب مدرس او مدرسة خصوصية شدوا الحيل واتبعوا النصائح ومالكم الا الدرجات اللي ترضيكم (( وفي النهاية هيه حرية شخصية تجيبوا او لا ))
بالنسبة للحياة الاجتماعية راح تاخذ الدراسة من وقتكم كثييير راح تفتقدوا الجلسة مع اهلكم وناسكم الا اذا قدرتوا توازنوا بين الدراسة والجلسة مع اهلكم واذا ماقدرتوا وضحوا لاهلكم الشغلة وبينوا لهم انها سنة مصيرية علشان تتخصصوا التخصص اللي تبغوه وان شاء الله هما حيتفهموا (( بس مو لدرجة ماتشفوهم ولا يشوفوكم مررررة صعبة ))
في السنة التحضيرية تحس نفسك في حلبة مصااارعة من كثرة الطلاب والطالبات الدوافيير راح تصااارعوا كثييير علشاان توصلوا
لا تسمعوا كثيير للقيل والقال وكثرة الهرج والكلام خذوا الاخبار الااكيدة من الشؤون التعليمية اومنسق مادة او من استاذ او استاذة موثوق بهم
اخدموا نفسكم بنفسكم وخلصوا اشغالكم بنفسكم
وفيه حااجة كمان اللي يقولك حول على طول او روح او روحي عند استاذة او استاذ سمعته ممتازة ماتسمعلهم على طول فيه حااجة اسمها فرووق فردية عن تجربة فيه استاذة كانت سمعتها في مادة من المواد سيئة وكانوا كثيير من البنات قالوا حولي لااستاذة ثانية انا جربتها ومشيت معاها واتقبلت طريقة شرحها وجبة درجااات حلووة يعني الخلاصة جربوا بنفسكم بعدين حولوا علشان تكون الشغلة عن اقتناع وتجربة شخصية مو من كلام الناس يعني خذني جيتك
الحين الكلام موجه للبنات (( في كلاام يقولك انه في السليمانية الاستاذات الافضل والبنات هناك اشطر وانه الشرفية مبناها مبنى مدارس حكومية واستاذاتها سيئات وطالباتها مو شطار مافيه حاجة زي كذا كبرنا على هذا الكلام احنا اللحين طالبات جامعة يعني عندنا اهدااف واضحة وهيه الدراسة وليس شكل المباني وبالنسبة للاستاذات في كل فرع منهم السيء ومنهم الممتاز وبدلالة كثيير من الشرفية جايبين معدلاتهم خمسات لانه المعدل خمسة من خمسة يعني الخلاصة اللي تنقبل في الشرفية لا تزعل ولا تحزن لانه كل الفرووع زي بعضها )
ايش كمان ممكن اقلكم عليه ممممممم..
كلام الحين عن الي جاين من خارج جدة ( انصحكم بالصبر لانه انتوا تاركين اهلكم وناسكم وراح تتغربوا علشان توصلوا لهدفكم لاتتهاونوا ابدا ابدا ابدا راح تتحطموا راح تحسوا بخوف راح تحسوا انكم خلااص ماتبغوا تكملوا تبغوا ترجعوا لاهليكم لا تسمعوا لهذا الصوت الداخلي اللي يحبطكم وقولوا راح نوصل واحنا ماجينا هنا وتركنا اهلنا واتحملنا مسؤولية نفسنا الا علشان نوصل ونحقق طموحاتنا وفيه اشياء كثييييييير راح تفتقدوها ( جلسة الاهل والماما اللي تغسل وتطبخ وترتب وتنظف ) بس صدقوني ماراح تخرجوا من هذي التجربة الا وانتوا نااسة قيادية وعاارفة ايش تبغى وقاادرة تتحمل مسؤولية نفسها ومسؤولية قراراتها
آآآه تعبت
وعليكم بالصبر والعزم والعمل بجلد لانه نياتكم طيبة واهدافكم وااضحة
اللي يعتب بوابة جامعة الملك عبدالعزيز لازم يكون محدد تخصص بعينة تخصص اللي يبغاه (( اتخصصوا التخصص اللي راح تبدعوا فيه تبدعوا فيه تبدعوا فيه لا تدخلوا تخصص علشان اهلكم والا علشان راح يصيروا اهلكم ابو المهندس او ابو الدكتور ام المهندسة او ام الدكتورة لااا كثييير دخلوا اقساام علشان اهاليهم وبعد سنة او سنتين حولوا )لانه اذا ماكنتوا محددين ايش تبغوا تحسوا نفسكم تايهين ماانتو عاارفين ليش جااين ولايش تبغى توصلوا ؟؟
السنة التحضيرية تعجيزية ولكن مو لدرجة انك ماتجيب درجااات تدخلك التخصص اللي تبغاه انا ما اخوفكم بس لازم تكونوا نااس فاهمة وعاارفة ايش تبغى ولايش تبغى توصل
والله كل الكلام اللي قلته ياحبيايبي من قلب ومن تجربتي وخلاصتها واعتبرتكم زي اخواني واخواتي
لا تنسوا انكم اختبرتم اختباراات دراسة + قدرات + تحصيلي تصفية وبتجي السنة التحضيرية وتصفي بقوووة فشدوا ولا تتكاااسلوا ابدا ولا تنسوا انكم عديتوا مشوار طويل وبس سنة وبعدين ترتاحوا بالتخصص اللي تبغوه ولا تندموا على سنين على تخصص معدلكم هوه اللي دخلكم اياه مو التخصص اللي تبغوه علشان سنة ضيعتوها بسبب توتروخوف وتسويف اتوكلوا على ربنا وافعلوا بالاسباااب ومالكم الا الرضا والنجااح
وربنا معاااكم وهيه سنة حلوة وفيه كم حاجة سيئة يعني شعور مختلط
دعوااتي لكم بالتوفيق والتيسير ان شاء الله ( اتمنى انكم تستفيدوا من تجربتي البسيطة وغيري من الطالبات والطلاب راح يفيدوكم اكثر واكثر ) ^_^

مرررة معلييش اذا طولت عليكم بس والله لمصلحتكم