[M7mmd.Y]

حياكم شباب وبنات

بالنسبة للبنات مو اكيد اللي موجود عندنا يكون عندهم.. لأنهم دخلو الكلية متخصصين مو زينا

*

بالنسبة للأولاد, ازيد على كلام اخوي ميشو

اول خطة تكون اجبارية ولازم تخلص 50 ساعة + مادة البحث IE200 عشان تتخصص

يعني رح تذوق حلاوة التسكين مرتين :d

المواد ممن الخطة الأولى موجودة عندك اكيد

رح اعطيك فكرة بسيطة عن المواد

IE200

مادة البحث العلمي .. مادة كل الطلاب قالولي صعبة ومستحيلة ومني عارف ايش

والله اخذتها استمتعت فيها .. لأنها فعلاً تعلمك كيف تستخدم اللغة الانجليزية بطريقة علمية

الفكرة عالسريع انك تختار موضوع سواء هل هو مشكلة ام شي تبغا تحسنو في المجتمع

تتكلم عنه بإختصار في البداية .. بعدين تتعمق في الموضوع بإنك تقرا عنه ولازم تكون فاهم فيه

بعدين رح تسوي استبيانات .. اعتقد تفتكر الاستبيانات اللي ملينا بيها قسمكم =)

وبعدها تسوي الريسيرش كامل .. الموضوع فيه تفصيل اكثر من كذا

IE201

ما اكذب عليك المادة هذي اكرف مادة في كلية الهندسة .. تنكرف فيها مزبوط

نظامها تيمات .. لو رحت مع تيم تمام رح تستمتع في المادة .. لو رحت مع تيم سيء

شد حيلك فيها ونصيحة قبل لا تنزلها .. لا ترتكب نفس الغلط اللي سويته انا .. نزلها في ترم خفيف

لأنها ضغط ضغط ضغط بمعنى الكلمة .. عشان تفهم ايش هي دور بأسمها هنا

بحث سكاو

Math202

اكرف مواد الماث في الخطة.. ممتعة لكن كرف وفيها صعوبة يبغالها شدة حيل

خصوصا لأن منسقها شوي شديد

Math203

تعتبر من اسهل مواد الماث لكنها طويييييييييييلة ولو ما ذاكرت اول بأول بتجيب فيها العيد

EE201

ماتلاب اسمها, هذي تطبيقات الماث بإستخدام الكمبيوتر.. المادة يعيبها دكاترتها صراحة

تعتبر متوسطة بل اجزاء منها سهلة لكن الدكاترة للأسف غير متمكنين منها .. فيها معمل مرة في الاسبوع

من دحين اقلك شد حيييلك فيها ولو بتنزلها نزل البرنامج تبعها Matlab واتدرب عليه وافهمه

لو ما اتدربت كل ما تاخذ درس فيها بتجيب العيد بقوة

Phys202

فيزياء الكهرباء.. تدرس الشحنات والمجال الكهربي وقانون جاوس و و و .... كلها كهرباء

جالس اخذها حالياً.. لين الآن مافيها شي .. من رأيي يعيبها معملها اللي مالو اي علاقة باللي تاخذو في النظري

ومعمل شوي طويل.. لما يسوي الدكتور التجربة قدامك تحس انك من جنبها ومو فاهم شي لكن وقت التطبيق غير

بالنسبة للنظري فيها عليه 75 درجة.. اختبارات 70 وبيد الدكتور 5..

كان زمان الموضوع كله تجيب القانون وتعوض وتحل المسألة لكن الفترة هذي الدكتور علي زين صار المنسق

وصراحة اللي بيسويه اشوفه الصح.. انه بدل النظام القديم صارت الاسئلة النظرية كثير .. اكثر من الحسابية

عشان يبين انتا فاهم ولا لأ.. وكمان لأنها فيزياء مو ماث =)

Meng102

رسم هندسي بأستخدام برنامج SolidWorks ..

مادة ممتعة لكن لااااااااااازم واحط الف خط تحت كلمة لازم .. انك تطبق وتدرب على اللي تاخذو في البيت

واضمنلك من عندي A وفوق ..

شوف المادة هذي والماتلاب لو ما طبقت واتدربت في البيت .. الله يستر عليك =(

IE255

الاقتصاد الهندسي

مادة ممتعة حلوة خفيفة ... يعيبها اختباراتها اللي مدري من فين يجيبوها :d

فيها اختبارين ميجور واختبار نهائي ومشروع.. الميجورين دايما يجيبولك سؤال صعب والباقي سهل

واخص المادة هذي ان اختباراتها حل/كتابة مو اختيارات .. ومسائل من النوع الطيب :d السؤال بصفحة

لكنها ممتعة


يتبع...