[ُزمرد]

المشاركة الأصلية كتبت بواسطة ممههنندد ماشاءالله تبارك الله .... يسلمو الأيادي دكتوره زمرد ....هوا صح كلامك لازم نستغل الوقت ولاشك بمجرد دخولنا الصيدله لازم نحترم الوقت .... طبعا بتكلم بخصوص المدرس الخصوصي لأكن ان شاء الله أنا بحاااارب اول شهر الين أبدا أتأقلم مع الوضع ويصير عادي عندي لانو زمن التحضيري والدلع ولا وراح ........لنفترض انو كل يوم بنخرج الساعه 5 وبننرجع تعبانين يدوب ننام عشان نقوم نصلي المغرب ونقوم. نفتح الكتب يدوب تقري كم كلمه وجات الساعه 11 وقولي ساعه مع الأهل وعشا وكدا جات 12 لازم ننام لان ورانا يوم طويل ويبدا من 8 ولازم نرتاح عشان نقدر نجمع ونركز طبعا أتكلم عن الايام اللي مافيها خصوصي ....... يعني ب العربي لازم لازم نحاارب الوقت عشان نتعود ونكون مرتاحين من تاني شهر وأكيد التعويض والتركيز والاساس هوا ف الخميس والجمعه ..... وإن شاء الله مافي شي صعب دام الله فوق

اهلي د.مهند ماشاء الله شكلك فعلا مهتم بالدراسه لذلك انا ح اكون صريحه معاك حتى فعلا تستفيد من كلامي
بالنسبة للدوام ف خصوصا الترم الاول الواحد مو متعود عالسرعه في الشغل في المعامل ف يخرج متأخر احيانا كنت ادخل بيتي 5 العصر وغالبا 4:30 دا وانا بيتي يعتبر قريب
االدوام مو ممل ومتعب بالعكس الوقت يمر بسرعه اذا كنت حابب التخصصح تستمع لكن المشكلة ترجع البيت تناااام نوم غير طبيعي بالقوة تصحا العشا تصلي ح تجيك حاله تتنيح يا انك تجلس مع اهلك او تنبسط شوية او انه كالعاده ح يكون عندك كويز ف تضطر تسنتر عالشيت
سنة ثانية صيدله تختلف عن 3 و 4 و5
فيها كويزات .. يعني كل شوية ناططلك كويز ..
بصراحه انا اضمنلك باذن الله_ لو تركز مع الدكتور ماتحتاج مدرس اما لو تحضر وحضورك زي عدمك شي طبيعي ماراح تستفيد من المحاضره
معظم اللي يروحو عند المدرس يا يكونو خلقه مايحضرو وما انشرحلهم شي ف مضطرين يروحو او انهم يحضرو ومايركزو يجلسو يتكلمو وعالجوال يلعبوالخ


ماشاء الله دكاتره الصيدله مرا كويسين ف ركز معاهم و حتفهم ان شاءالله
المهم اذا مرا مصر تروح ف خلاص خدلك ماده وحده لاتزود ع كدا عشان وقتك

غير انو مرواحك للمدرس ح يربطك ماحتقدر تمسك الماده ولا تذاكرها الا من بعد ما المدرس يشرحلك الكورس

واساساً مستحيل المدرس يكون مُلم بالماده زي دكتور الماده .. و كللل الدكاتره يقولو اسئله الاختبار اثناء الشرح
ف الذكي هو اللي يعرف يكتبها ع جنب
لكن اللي مايحضر ومسرّح! تروح عليه

وبصراحه اعتراضي الرئيسي على ان الواحد يروح ل مدرس مو عشان عامل الوقت ..
بس ان الواحد خلاص كبر واصبح في وضع لازم يعتمد على نفسه كلياً

لازم تتعود تشغل مخك يعني تتوقع كل حاجه مرت عليا فهمتها من الدكتورة؟ لازم اعصر مخي واسال صحباتي يفهموني وافتح المواقع والمراجع عشان افهم المعلومه والحبيب اليوتيوب ماشاءالله مايقصر

احنا طلاب جامعيين وبكرا ح نكون صيادله بإذن الله، ف لازم من دحين نتعود نشغل مخنا

سوري عالاطاله بس حبيت افصل كلامي.. وبالنهايه هي مجرد وجه نظر قد تكون صائبه وقد تكون خاطئه ^^