وعليكم السلام ورحمة الله
انا هادي اول مشاركة ليا وحبيت اقولك القصة الطويييلة العريضة اللي باذن الله حتنبسطي بعد ما تقرئيه
انا طالبة منتظمة في السنة التحضيرية مسار علمي والقصة هيه انو وحدة من صحباتي انقبلت في الترم الاول بس متاخر كدا على شهر تماما من بداية الدراسة على اول ايام ذي القعدة
ولما سالناها انتي ايش قصتك قالت انا غير سعودية اختبرت القدرات والتحصيلي و قدمت عالنت وما قبلوني وقالت انها مررة اتحطمت وبعدين كدا على قبل شعبان حاول ابويا انو يشوف عند قسم الاولاد في عمادة القبول والتسجيل واعطوه استمارة يعبيها ويجيبها في اليوم اللي بعدو مع الطلبات اللي موجودة في الورقة اللي هيه كانت صورة من شهادة الثانوي وصورة من الهوية ونتيجة اختبار القبول بس واعطولو رقم معاملة وقالولو تعال في رمضان وراح ابويا على الوقت المحدد برضو قالو المعاملة لسه ما كملت لما تنقبل بنتك حندق عليك المهم بعدها مرررة ما دقو ولا سمعنا خبر طبعا وتقوللي صحبتي انو كل يوم كانت بتزن على ابوها روح شوف ايش سووا بالمعاملة فراح يمكن على كلامها مرتين او 3 بعدها وطبعا كل يوم بيعدي وصحبتي بتقولي انها متحطمة وماهي عارفة وووووو المهم بدات الدراسة بعد العيد باسبوع برضو ما جاهم خبر المسكينة راحت فيها ونفسيتها صعبة للغاية الا قالتلي بعد كدا انو الجامعة دقت على جوالها بعد شهر بالتمام والكمال وقالولها جيبي ملفك انتي مقبولة وعلطول اليوم اللي بعدو راحت والحمد لله كملت كل المطلوب بس حصلت مشكلة مع الجدول انو ما نزلولها هيه الابعد اسبوع تقريبا والمسكينة كان الاسبوع اللي بعدو علطول اختبارات الدوري الاول بس وكلمت بعض صحباتها الاجانب اللي تعرفهم واللي قدمو زيها ناس قالو انو الجامعة دقت عليهم برضو وقالت كتير كتير من صحباتها ما انقبلوا فاستغربت، بس وعرفت بعدها انهم ما قبلو اللي نسبتهم الموزونة اللي نصها من نتيجة الثانوي والنص التاني من اختبار القبول اقل من 90 % والحمد لله صحبتي اخدت فوق ال90% عشان كدا قبلوها هيه وكم وحدة زيها وترا قالتلي انو اللي انقبلو مرررة قلال يمكن ما يتعدو المية وكمان يمكن اقل بكتير حتى ما اعطولهم الخيار هم اي مسار كانو يبو يدرسوه حطوهم علطول في المسار العلمي لانهم متخرجين علمي وفي ناس تانية اداري وانساني هادول للي شهاداتهم ادبي، يالله انا فاكرة ذيك الايام واجهو صعوبة مرة كبيرة كانت العالم مخلصة شباتر كتيرة في كل المواد وهم المساكين فاتهم شهر كااااامل حتى فكرت انها تسحب ملفها بعد ما بكيت وشالت هموم المواد اللي بالانجليزي بس شدت حيلها وما سحبت، المهم في وقت امتحانات الدوري الاول اغلبهم ما اختبرو مع الطالبات المنتظمات من اول وقالتلي انو استاذاتهم في المواد العلمية حنوا عليهم وعملولهم زي المحاضرات الاضافية عشان يتداركو اللي فاتهم والحمد لله اختبروهم الدوري الاول لحالهم او على ما اذكر انها قالتلي اختبرت هيه والشلة المتاخرة مع شعب كلية العلوم اللي كانو بالمستوى الثاني في الترم الاول وبفضل الله مشت حالها وصارت احسن وتاقلمت وهيه منتظمة لا هي انتقالي ولا تاهيلي اللهم الشيء الوحيد اللي بيفرق عن الانتظام انها ما تاخد مكافاة وكمانة قالولها لما قدمت انو في احتمال انو الاجانب ممنوع يدخلو كلية الهندسة والطب وكل مشتقاتها << حلوة دي الكلمة بس هيه الحمد لله اخدت الموضوع ايزي ودايما دايما تحمد ربها انها انقبلت و قالتلي مؤخرا انو في احتمال يفتحو للاجانب في الطب لكن اهم اهم شيء هو المعدل في السنة التحضيرية لازم يكون عالي لو تبى طب مثلا على حسب كل كلية هيه ومعدلها المطلوب
طيب انا والله حبيت احكيلك عن اللي صار مع صحبتي عشان تطمني انو في قبول السنة الجاية بس والله هادا اذا كانو حيكملو نظام السنة التحضيرية ما ادري اذا ناويين يلغوا دي السنة يمكن تتغير القوانين والله يعينك بس باذن الله تنقبلي السنة الجاية اهم شيء نسبتك الموزونة فوق ال90% ونشوفك مبسوطة في الجامعة وربي يحقق كل امالك وامنتياتك وتدخلي قسم الفيزياء او اي قسم تاني انتي نفسك فيه بس طلب مني بسيط ليكي انك تدعيلنا ربنا يوفقنا ترا انا وهيه للان محنا مقررين ايش نتخصص الله يستر ويسهل لكل طالبات وطلاب السنة التحضيرية اللهم امين
اعذروني على الاطالة ويمكن طفشتكم بس معليه كان نفسي ابشر الاخت عن اللي صار مع صحبتي
وصلي اللهم وسلم على سيدنا محمد وعلى اله وصحبه اجمعين
والله الموفق والسلام عليكم ورحمة الله وبركاته